Homber y Muher​—Crea pa Pas cu Otro

SEMPER homber y muher a anhela pa ta hunto. Ta Dios mes a crea hende cu e deseo aki. Jehova a mira cu no tabata bon pa e prome homber, Adam, sigui su so. P’esei Dios a traha “un yudado [pa e homber] cu ta pas cu ne.”

Jehova a pone Adam pega un soño profundo, y despues a tuma un di su repchinan y “a traha un muher cu e repchi . . . y a hib’e pa e homber.” Ora Adam a mira e bunita creacion aki di Jehova e tabata asina emociona cu el a declara: “Esaki ta awor weso di mi wesonan, y carni di mi carni.” Eva, e muher perfecto cu su cualidadnan femenino, en berdad tabata hopi atractivo. Y Adam, como un homber perfecto cu su dignidad masculino, a merece respet. Nan a ser crea pa pas cu otro. Bijbel ta bisa: “P’esei un homber lo bandona su tata y su mama y lo uni cu su esposa. Y nan lo bira un carni.”—Genesis 2:18-24.

Sinembargo, awe famianan ta habriendo for di otro, y hopi esposo y esposa ta trata otro masha malo y di un forma egoista. Un spirito di competencia entre homber y muher a fomenta un esfera di conflicto y discordia. Tur esaki ta contrario na e proposito di Dios pa nan. E homber a ser crea pa cumpli cu un papel maraviyoso riba Tera. E muher mester a ocupa un luga unico y digno a lado di e homber. Hunto nan mester a traha na harmonia cu otro. For di cuminsamento di existencia humano, homber y muher cu ta respeta Dios a haci esfuerso pa cumpli fielmente cu e papelnan cu Jehova a duna nan, y esaki a aumenta nan felicidad y satisfaccion. Kico e papelnan aki ta, y con nos por cumpli cu nan?

[Plachi na pagina 3]

Homber y muher a ser crea pa cumpli cu un papel digno den e areglo di Dios