Homber y Muher​—Un Papel Digno pa Cada un di Nan

JEHOVA DIOS a crea Adam prome, despues Eva. Prome cu Eva a ser crea, Adam a haya experencia den bida. Durante e tempo aki, Jehova a dun’e cierto instruccionnan. (Genesis 2:15-20) Sirbiendo como vocero di Dios, Adam mester a pasa esakinan pa su esposa. Ta logico anto cu e lo a hiba delantera den tur asunto cu tabatin di aber cu adoracion.

Den e congregacion cristian ta existi un areglo similar, y lo ta beneficioso pa nos analisa esaki. Apostel Pablo a skirbi: “Mi no ta permiti hende muher ... eherce autoridad riba hende homber, ma pa keda keto. Pasobra ta Adam a wordo forma prome, despues Eva.” (1 Timoteo 2:12, 13) Esaki no ta nifica cu hende muher mester keda completamente keto na reunionnan di e congregacion cristian. E mester keda keto den e sentido cu e no ta debati cu e homber. E no mester menosprecia su posicion nombra of purba instrui e congregacion. Ta hende homber a haya e asignacion pa dirigi y instrui e congregacion, pero hende muher ta contribui hopi na reunionnan cristian dor di participa den nan den varios manera.

Apostel Pablo ta yuda nos compronde e respectivo papelnan di hende homber y hende muher den e areglo di Dios. El a skirbi: “Homber no ta origina for di muher, ma muher for di homber; ... den Señor ni muher no ta independiente di homber, ni homber no ta independiente di muher. Pasobra mescos cu muher ta origina for di homber, asina tambe homber ta naci di muher; y tur cos ta origina for di Dios.”—1 Corintionan 11:8-12.

Hende Muher Tin Privilegio Excelente

Bou di e Lei cu Dios a duna Israel, hende muher tabatin hopi privilegio y tabata liber pa tuma iniciativa. Por ehempel, Proverbionan 31:10-31 ta papia di “un bon esposa” [BPK] cu ta cumpra material excelente y traha bunita bisti pa su famia. Imagina bo, “e ta traha paña-di-bisti di tela di lino, y ta bende nan”! (Versiculo 13, 21-24) E muher excelente aki ta ‘manera barco di comerciante’ cu ta bai busca cuminda di bon calidad, asta si e mester trece esei for di luganan leu. (Versiculo 14) “E ta inspecta un tereno, y ta cumpr’e”, y “e ta planta un cunucu di wendruif.” (Versiculo 16) Siendo cu “su negoshi ta bai bon”, su actividadnan ta produci ganashi. (Versiculo 18) Ademas di “tene e camindanan di su famia bon na bista”, e muher diligente aki cu ta teme Jehova ta cla pa saca man pa yuda otro hende. (Versiculo 20, 27) No ta nada straño cu e ta haya elogio!—Versiculo 31.

E leinan cu Jehova a provee mediante Moises a duna hende muher amplio oportunidad pa crece spiritualmente. Por ehempel, na Josue 8:35, nos ta lesa: “No tabatin ni un palabra di tur loke Moises a ordena cu Josue no a lesa dilanti di henter e asamblea di Israel, incluyendo e muhernan, e mucha chikitonan y e stranheronan cu tabata biba meimei di nan.” Relaciona cu e sacerdote Esdras, Bijbel ta declara: “[El] a trece e lei dilanti di e asamblea di homber, muher, y tur hende cu por a scucha cu comprondemento, riba e prome dia di e di shete luna. Y el a lesa for di dje dilanti di e plasa cu tabata keda dilanti di e Porta di Awa, for di mainta tempran te merdia, den presencia di homber y muher, esnan cu por a compronde; y henter e pueblo tabata scucha atentamente na e buki di lei.” (Nehemias 8:2, 3) Hende muher a beneficia di tal lesamento di e Lei. Tambe nan a celebra fiestanan religioso. (Deuteronomio 12:12, 18; 16:11, 14) Mas importante ainda, hende muher den Israel di antiguedad por tabatin un relacion personal cu Jehova Dios y por a haci oracion individualmente na dje.—1 Samuel 1:10.

Den e prome siglo di nos era, muhernan temeroso di Dios tabatin e privilegio di sirbi Hesus. (Lucas 8:1-3) Un hende muher a basha azeta perfuma riba Hesus su cabes y pia durante un cena na Betania. (Mateo 26:6-13; Juan 12:1-7) Entre e personanan na ken Hesus a aparece despues di su resureccion tabatin hende muher. (Mateo 28:1-10; Juan 20:1-18) Despues cu Hesus a subi na shelo, den e grupo di mas o menos 120 discipel cu a bini hunto tabatin “muhernan y Maria, mama di Hesus.” (Echonan 1:3-15) Sin duda, hopi di e muhernan aki, si no ta tur mes, lo tabata den e sala ariba den Jerusalem riba dia di Pentecoste di aña 33 di nos era, ora spirito santo a baha riba Hesus su discipelnan y pone nan papia milagrosamente den varios idioma.—Echonan 2:1-12.

Tanto homber como muher tabata entre esnan cu a experencia cumplimento di Joel 2:28 y 29. Apostel Pedro a cita e texto aki riba dia di Pentecoste, bisando: “Lo mi [Jehova] basha di mi spirito riba henter humanidad; y boso yiu hombernan y boso yiu muhernan lo profetisa . . . Tambe riba mi sirbidornan, tanto homber como muher, lo mi basha di mi spirito den e dianan ei.” (Echonan 2:13-18) Pa un tempo despues di Pentecoste di aña 33, muhernan cristian a haya donnan milagroso di e spirito. Nan a papia den idiomanan stranhero y a profetisa, no necesariamente pronosticando cierto cosnan; mas bien, nan a proclama e berdadnan biblico.

Den apostel Pablo su carta na e cristiannan na Roma, el a papia amorosamente di “nos ruman muher Febe”, recomendando e na nan. El a referi tambe na Trifena y Trifosa, yamando nan “trahadonan den Señor.” (Romanonan 16:1, 2, 12) Aunke e muhernan aki no tabatin posicionnan nombra den e congregacion cristian di prome siglo, nan y hopi otro hende muher tabatin e privilegio di a wordo scohi dor di Dios pa bira coheredero cu su Yiu Hesucristo den e Reino celestial.—Romanonan 8:16, 17; Galationan 3:28, 29.

Awe tambe, muhernan devoto na Dios tin un gran privilegio. Salmo 68:11 [NW] ta bisa: “Jehova mes ta duna e palabra; hende muher cu ta anuncia e bon nobo ta un ehersito grandi.” E hende muhernan ei merece nos elogio. Por ehempel, nan bon habilidad den conduci estudionan di Bijbel ta yudando hopi hende acepta e siñansanan berdadero cu ta agrada Dios. Muhernan cristian casa cu ta yuda nan yiunan bira creyente y cu ta apoya nan esposonan cu tin hopi responsabilidad di congregacion tambe merece nos elogio. (Proverbionan 31:10-12, 28) Muhernan soltero tambe tin un luga digno den e areglo di Dios, y Bijbel ta instrui hombernan cristian pa “trata . . . e muhernan mas bieu manera mama, e muhernan mas hoben manera ruman muher, den tur puresa.”—1 Timoteo 5:1, 2.

E Diferente Asignacionnan di Hende Homber

Dios a duna hombernan cristian un papel y e ta spera cu nan ta cumpli cu ne. Pablo a declara: “Mi kier pa boso compronde cu Cristo ta e cabes di tur homber, y e homber ta e cabes di e muher, y Dios ta e cabes di Cristo.” (1 Corintionan 11:3) Hende homber tambe tin un cabes: Cristo. Si, homber ta responsabel na Cristo y finalmente na Dios. Y Dios ta spera cu e homber ta cumpli cu su papel como cabes na un manera amoroso. (Efesionan 5:25) Esei ta asina for di tempo cu hende a ser crea.

Bijbel ta mustra cu Dios a duna homber asignacionnan cu ta cuadra cu su posicion como cabes. Por ehempel, Jehova a laga e homber Noe construi un arca pa conserva bida durante e Diluvio. (Genesis 6:9–7:24) Dios a priminti e homber Abraham cu pa medio di su simiña, tur e famianan y nacionnan di Tera lo bendiciona nan mes. E parti principal di e simiña ei ta Cristo Hesus. (Genesis 12:3; 22:18; Galationan 3:8-16) Dios a apunta e homber Moises pa saca e Israelitanan for di Egipto. (Exodo 3:9, 10, 12, 18) Tabata mediante Moises cu Jehova a duna e codigo di lei conoci como e aliansa di Lei, of e Lei di Moises. (Exodo 24:1-18) Y sin excepcion, tur e escritornan di Bijbel tabata hende homber.

Como Cabes di e congregacion cristian, Hesus a “duna donnan [den] hende.” (Efesionan 1:22; 4:7-13) Ora Pablo a menciona e cualificacionnan pa superintendente, el a referi na hende homber. (1 Timoteo 3:1-7; Tito 1:5-9) Pues ta hende homber ta sirbi como superintendente, of anciano, y como sirbidor ministerial den e congregacionnan di Testigonan di Jehova. (Filipensenan 1:1, 2; 1 Timoteo 3:8-10, 12) Hende homber so por sirbi como wardado den e congregacion cristian. (1 Pedro 5:1-4) No obstante, manera nos a mira anteriormente, Dios a duna hende muher privilegionan maraviyoso.

Contento cu Nan Papel

Ora tanto homber como muher ta cumpli cu e papel cu Dios a duna nan, esei ta haci nan felis. Matrimonionan ta felis ora esposo y esposa ta imita e ehempel di Cristo y su congregacion. Pablo a skirbi: “Esposonan, stima boso esposa, mescos cu Cristo tambe a stima e iglesia y a entrega su mes p’e ... Laga cada un di boso tambe stima su esposa manera su mes.” (Efesionan 5:25-33) P’esei, esposonan mester cumpli cu nan papel como cabes na un manera amoroso, y no na un manera egoista. E congregacion di Cristo no ta consisti di hende perfecto. Pero Hesus ta stim’e y ta cuid’e. Asina tambe, un esposo cristian mester stima su esposa y cuid’e.

Un esposa cristian mester “respeta su esposo” profundamente. (Efesionan 5:33) En conexion cu esaki, e por mira riba e congregacion como ehempel. Efesionan 5:21-24 ta declara: “Sea sumiso na otro den e temor di Cristo. Esposanan, sea sumiso na boso mes esposo, manera na Señor. Pasobra e esposo ta cabes di e esposa, mescos cu Cristo tambe ta cabes di e iglesia, e mes siendo salbado di e curpa. Ma mescos cu e iglesia ta sumiso na Cristo, asina tambe e esposanan mester ta sumiso na nan esposo den tur cos.” Un esposa por haya cu de bes en cuando ta dificil pa ta sumiso na su esposo; sinembargo, esaki ta “pas den Señor.” (Colosensenan 3:18) Lo ta mas facil pa e esposa ta sumiso na su casa si e corda cu esaki ta agrada Señor Hesucristo.

Asta si su esposo no ta un creyente, un esposa cristian mester somete su mes na su hefatura. Apostel Pedro a bisa: “Boso, esposanan, sea sumiso na boso mes esposonan, pa si algun di nan ta desobedecido na e palabra, nan por wordo gana sin palabra pa medio di e conducta di nan esposanan, ora nan observa boso conducta puro y respetuoso.” (1 Pedro 3:1, 2) Sara, kende a respeta su casa, Abraham, tabatin e privilegio di duna lus na Isaak y bira un antepasado di Hesucristo. (Hebreonan 11:11, 12; 1 Pedro 3:5, 6) Esposanan cu ta comporta nan mes mescos cu Sara sigur lo haya nan recompensa cerca Dios.

Pas y harmonia ta prevalece ora tanto homber como muher cumpli cu e papel cu Dios a duna nan. Esaki ta duna nan satisfaccion y felicidad. Ademas, ora cada un ta cumpli cu rekisitonan biblico, nan lo haya e dignidad cu un luga privilegia den e areglo di Dios ta trece cu ne.

[Cuadro na pagina 7]

Con Nan Ta Mira e Papel Cu Dios A Duna Nan

Susan a bisa: “Mi esposo ta cumpli cu su papel como cabes na un manera amoroso y bondadoso. Por lo general nos ta papia riba e decisionnan cu mester ser tuma, y ora e dicidi kico nos lo haci of keda sin haci, mi sa cu esei ta pa nos bienestar. E luga cu Jehova a duna esposanan cristian ta haci mi realmente felis y ta haci nos matrimonio fuerte. Nos ta hopi pega cu otro y ta traha hunto pa alcansa metanan spiritual.”

Un señora cu yama Mindy a comenta: “E papel cu Jehova a asigna na su sirbidornan femenino ta un garantia di e amor cu e tin pa nos. Mi ta sinti cu ora mi ta duna mi esposo honor y respet y tambe ora cu mi ta apoy’e den su debernan di congregacion, mi ta mustrando mi gratitud na Jehova pa e areglo aki.”

[Plachi na pagina 5]

Na harmonia cu e homber su posicion como cabes, Dios a duna Noe, Abraham y Moises diferente asignacion

[Plachi na pagina 7]

“Hende muher cu ta anuncia e bon nobo ta un ehersito grandi”