Pregunta di Lector

Den ki sentido Salomon a haya solamente “un homber entre mil, ma entre tur esakinan [e] no a haya un muher”?—Eclesiastes 7:28.

Pa por compronde e palabranan inspira aki corectamente, nos tin cu compronde prome con Dios ta mira hende muher. Bijbel ta referi na Ruth, nuera di e viuda Noemi, como “un muher excelente.” (Ruth 3:11) Segun Proverbionan 31:10, un bon esposa “bal mucho mas cu rubi.” Kico anto Rei Salomon di antiguo Israel tabata kiermen ora el a bisa: “Mi a haya . . . un berdadero homber den mil, pero nunca un berdadero muher”?—Moffatt.

E contexto ta mustra cu den tempo di Salomon e moralidad di hende muher lo mester tabata hopi abou. (Eclesiastes 7:26) Esaki kisas pa gran parti tabata debi na e influencia di muhernan stranhero cu a practica adoracion di Baal. Asta Rei Salomon a sucumbi pa e presion di su tantisimo esposanan stranhero. Bijbel ta bisa: “E tabatin sheteshen esposa, prinsesnan, y tresshen concubina, y su esposanan a haci su curason desvia” y el a bai adora diosnan falso. (1 Reinan 11:1-4) E moralidad di hende homber tambe tabata abou; pa haya un homber husto den mil tabata dificil, casi imposibel. Salomon a yega na e conclusion: “Esaki so mi a haya: Dios a traha hende recto, ma nan a busca hopi plan di maldad.” (Eclesiastes 7:29) Esaki ta un conclusion tocante humanidad, referiendo na hende como e rasa humano, no na hende homber compara cu hende muher. Pues, nos mester mira e palabranan cu nos ta haya na Eclesiastes 7:28 como un comentario riba e condicion moral en general di e hendenan den tempo di Salomon.

Sinembargo, tin un otro posibel nificacion di e versiculo aki. Kisas tambe e ta profetico, pasobra nunca un hende muher no a duna Jehova obediencia perfecto. Pero tin un homber cu si a hacie, Hesucristo.—Romanonan 5:15-17.

[Plachi na pagina 31]

“Un homber entre mil”