Riba Shen Aña Pero cu un Proposito den Bida

ELIN ta un di e 60 habitantenan di Suecia cu recientemente tabata riba e lista di hende di 105 aña di edad of mas. E tin 105 aña. Aunke e ta pasando tur su dianan den un cas di hende grandi, su salud ta permitie sigui sirbi como un Testigo di Jehova activo, e bida cu el a scohe pa hiba mas cu 60 aña pasa.

Elin ta predica na otro hende siguiendo e patronchi cu apostel Pablo a pone tempo cu e tabata bou di aresto di cas. Pablo tabata predica na tur hende cu a bishit’e. (Echonan 28:16, 30, 31) Asina tambe, Elin ta probecha di tur oportunidad pa papia cu trahado di limpiesa, dentista, docter, pelukera, enfermera y otro personanan cu e topa den e cas, compartiendo cu nan e bon nobo di Bijbel. De bes en cuando, otro rumannan cristian di Elin su congregacion asta ta invita nan studiantenan di Bijbel pa bishit’e pa asina nan por beneficia di su conocemento y experencia.

Miembronan di Elin su congregacion ta admira su spirito alegre y curiosidad. Un di nan a bisa: “E tin un habilidad fantastico di keda bon na haltura di e actividadnan di congregacion. E ta corda nomber di tur e muchanan y di e rumannan cu recientemente a muda bin e congregacion.” Elin ta bon conoci tambe pa su hospitalidad, su sentido di humor y punto di bista positivo tocante bida.

Kico ta yuda Elin mantene su goso y keda enfoca riba su proposito den bida? E ta lesa un texto di Bijbel tur dia for di e foyeto Eksaminando e Skritura Diariamente, publica dor di Testigonan di Jehova. Cu yudansa di un vergrootglas, tur dia e ta lesa tambe un parti di Bijbel. Elin ta prepara pa e reunionnan semanal di Testigonan di Jehova, y aunke fisicamente e no por asisti na esakinan, e ta scucha grabacion di e reunionnan aki. Ora nos lesa Bijbel y e publicacionnan basa riba Bijbel regularmente, y no laga di bai reunionnan cristian, esei por yuda nos hiba un bida cu proposito y cu ta duna satisfaccion, sin importa nos edad.—Salmo 1:2; Hebreonan 10:24, 25.