Haci Sacrificio di Henter Bo Alma pa Jehova

“Kico cu boso ta haci, traha riba dje cu henter boso alma comosifuera pa Jehova.”​—COL. 3:23.

1-3. (a) Hesus su morto na e staca di tormento ta nifica cu Jehova no ta spera ningun sacrificio di nos? Splica. (b) Ki pregunta ta lanta encuanto hacimento di sacrificio awe?

DEN prome siglo di nos era, Jehova a laga su pueblo compronde bon cla cu e sacrificio di rescate di Hesus a pone fin na e Lei di Moises. (Col. 2:13, 14) Sacrificio di animal y e otro sacrificionan cu e Hudiunan a haci pa cientos di aña no tabata necesario mas; nan no tabatin ningun balor mas. E Lei a cumpli cu su papel como ‘tutor cu a guia e Hudiunan na Cristo.’​—Gal. 3:24.

² Pero esaki no ta nifica si cu cristiannan no mester haci sacrificio mas. Al contrario, apostel Pedro a indica cu nos mester “ofrece sacrificio spiritual cu ta agrada Dios pa medio di Hesucristo.” (1 Ped. 2:5) Es mas, apostel Pablo a mustra cu ora cristiannan ta hiba un bida dedica na Dios, henter nan bida por ser considera como “un sacrificio” na Dios.​—Rom. 12:1.

³ Pues, nos por bisa cu un cristian ta haci sacrificio na Jehova ora e ta duna Jehova cierto cosnan of ta stop di haci cierto cosnan pa por sirbie mihor. Awor, en bista di loke Jehova a rekeri di e Israelitanan, con nos por ta sigur cu tur e sacrificionan cu nos ta haci awendia ta aceptabel pa Jehova?

DEN NOS BIDA DI TUR DIA

4. Kico nos mester corda relaciona cu nos actividadnan di tur dia?

⁴ Kisas ta dificil pa mira e conexion entre hacimento di sacrificio na Jehova y nos actividadnan di tur dia. Ta parce cu cosnan manera trabou, huiswerk, cosnan di haci na cas, hacimento di compras no tin nada di haber cu nos adoracion. Sinembargo, si bo a dedica bo bida na Jehova of bo tin pensa di haci esey pronto, e ora ey e actitud cu bo tin pa cu e actividadnan aki ta importante. Corda cu ta 24 ora pa dia nos ta cristian. Pues, nos tin cu aplica principio biblico den tur situacion di bida. Ta pesey Pablo a urgi nos: “Kico cu boso ta haci, traha riba dje cu henter boso alma comosifuera pa Jehova, y no pa hende.”​—Lesa Colosensenan 3:18-24.

5, 6. Kico por yuda nos determina con pa comporta nos mes y con pa bisti?

⁵ Ta berdad cu nos actividadnan di tur dia no ta parti di nos sirbishi na Dios. Pero e echo cu Pablo ta urgi nos pa haci tur cos di “henter [nos] alma comosifuera pa Jehova” ta motiva nos pa pensa riba e manera cu nos ta comporta nos mes tur ora. Pero, con nos por aplica e conseho aki di Pablo? Puntra bo mes: ‘Ta tur ora mi conducta y manera di bisti ta pas pa un cristian?’ Of sa sosode cu bo tin berguensa di identifica bo mes como un Testigo di Jehova durante bo actividadnan diario pasobra bo conducta of manera di bisti no ta apropia? No laga esey ta e caso nunca! Como e pueblo di Jehova, hamas nos mester haci algo cu lo por pone otro hende pensa malo di e nomber di Jehova.​—Isa. 43:10; 2 Cor. 6:3, 4, 9.

⁶ Laga nos analisa awor ki efecto e deseo pa haci tur cos di “henter [nos] alma comosifuera pa Jehova” tin riba varios area di nos bida. Segun cu nos ta haci esey, tene na mente cu tur e sacrificionan cu e Israelitanan a ofrece Dios mester tabata lo mihor.​—Exo. 23:19.

EFECTO RIBA NOS BIDA

7. Kico dedicacion cristian ta encera?

⁷ Ora bo a dedica bo mes na Jehova, bo a tuma e decision ey sin pone ningun condicion, no ta berdad? De echo, bo a priminti cu den tur aspecto di bo bida lo bo pone Jehova na prome luga. (Lesa Hebreonan 10:7.) Esey tabata un bon decision. Y sin duda bo a ripara cu ora bo busca pa sa kico ta Jehova su boluntad den un asunto y haci esfuerso pa actua na harmonia cu esaki, semper lo bo tin bon resultado. (Isa. 48:17, 18) Pues, nos ta un pueblo santo y feliz pasobra nos ta desplega e cualidadnan di Jehova, Esun cu ta instrui nos.​—Lev. 11:44; 1 Tim. 1:11.

8. Dicon nos no mester lubida cu e ofrendanan di e Israelitanan tabata santo pa Jehova?

⁸ Pa Jehova, e ofrendanan cu e Israelitanan tabata presenta na dje tabata santo. (Lev. 6:25; 7:1) E palabra Hebreo traduci como “santidad” ta transmiti e idea di algo cu ta separa, exclusivo of santifica pa Dios. Pues, pa nos sacrificionan por ta aceptabel pa Jehova, nos mester keda separa y liber di influencia mundano. Nos no por stima e cosnan cu Jehova ta odia. (Lesa 1 Juan 2:15-17.) Esaki ta encera anto cu nos mester evita di haci cosnan of anda cu personanan cu por haci nos impuro den bista di Dios. (Isa. 2:4; Rev. 18:4) E ta encera tambe cu nos no mester wak nada cu ta impuro of inmoral ni sigui pensa riba e cosnan aki.​—Col. 3:5, 6.

9. Dicon e manera cu nos ta trata otro hende ta importante?

⁹ Pablo a urgi su compañeronan cristian: “No lubida di haci bon y di comparti loke boso tin cu otro hende, pasobra e tipo di sacrificionan ey ta agrada Dios.” (Heb. 13:16) Pues, ora nos ta haci loke ta bon y ta yuda hende, Jehova lo mira nos echonan como sacrificio aceptabel na dje. E interes y cariño cu nos ta mustra na otro hende ta un caracteristica cu ta identifica cristiannan berdadero.​—Juan 13:34, 35; Col. 1:10.

DEN NOS ADORACION

10, 11. Con Jehova ta mira nos sirbishi y nos adoracion, y esaki mester motiva nos pa haci kico?

¹⁰ Un di e maneranan di mas remarcabel cu nos ta haci bon na hende ta di “proclama nos speransa” na nan. Abo ta probecha di tur oportunidad pa duna testimonio? Pablo a yama e trabou importante aki “un sacrificio di alabanza, esta, e fruta di nos lipnan, cu ta declara [Dios] su nomber publicamente.” (Heb. 10:23; 13:15; Jos. 14:2) Pesey ta bon pa nos para keto un rato y pensa riba e cantidad di tempo cu nos ta dedica na predicacion di e bon noticia y tambe con nos por mehora nos manera di predica. Hopi di e partinan den e Reunion di Sirbishi ta yuda nos haci esey. Nos tin cu corda cu nos sirbishi di veld y dunamento di testimonio informal ta “un sacrificio di alabanza”, esta, parti di nos adoracion; pues, cu poco palabra, nos tin cu duna lo mihor cu nos por. Claro cu no ta tur hende tin e mesun circunstancianan; pero hopi biaha, e cantidad di tempo cu nos ta dedica na e trabou di predica ta refleha cuanto aprecio nos tin pa cosnan spiritual.

¹¹ Di acuerdo cu e boluntad di Jehova, cristiannan ta aparta tempo regularmente pa ador’e, sea como congregacion of den priva. Ta berdad cu nos no tin cu warda sabbat mas ni bay Jerusalem pa asisti na cierto fiestanan. No obstante, e principionan tras di e leinan cu a stipula esakinan ta conta pa nos tambe. Por ehempel, mescos cu den pasado, Dios kier pa su sirbidornan stop cu obranan inutil y dedica tempo na studia su Palabra, haci oracion y asisti na reunionnan cristian. Y cabesnan di famia tin e responsabilidad di tene un anochi di Adoracion Como Famia cu esnan cu ta biba bou di nan dak. (1 Tes. 5:17; Heb. 10:24, 25) Pues, ta bon pa nos tur puntra nos mes: ‘Lo mi por mehora e calidad di mi adoracion?’

12. (a) Cu kico Bijbel ta compara e ofrendanan di sencia cu nan tabata ofrece na Jehova den pasado? (b) Den ki sentido nos oracionnan por ta manera sencia?

¹² Rey David a canta na Jehova: “Laga mi oracion wordo poni bo dilanti manera sencia.” (Sal. 141:2) Pensa un rato riba bo oracionnan, riba nan calidad y e frecuencia cu bo ta haci nan. E buki di Revelacion ta compara “oracion di e santonan” cu sencia. Dicon? Pasobra esakinan ta agradabel y den un sentido nan ta subi bay cerca Jehova manera un holo dushi y placentero. (Rev. 5:8) Den antiguo Israel, nan mester a prepara e sencia cu nan tabata ofrece regularmente riba e altar di Jehova cu sumo atencion y segun un formula special. Ta solamente ora nan a presenta e ofrendanan di sencia aki segun e instruccionnan cu Jehova a establece, e tabata acepta nan. (Exo. 30:34-37; Lev. 10:1, 2) Di mes manera, si nos oracionnan ta sincero y conforme Jehova su rekisitonan, nos por tin sigur cu nan ta aceptabel p’e.

DUNA Y RICIBI

13, 14. (a) Con Epafrodito y e congregacion di Filipo a yuda Pablo, y con Pablo a reacciona? (b) Con nos por sigui e ehempel di Epafrodito y di e Filipensenan?

¹³ Sea cu nos ta duna hopi of tiki placa, nos contribucionnan pa sostene e obra mundial di predica tambe ta un tipo di sacrificio. (Mar. 12:41-44) Den prome siglo, e congregacion di Filipo a manda Epafrodito Roma pa yuda Pablo. Evidentemente, Epafrodito a hiba placa cu e congregacion a manda como regalo pa Pablo. Esaki no tabata e prome biaha cu e Filipensenan a mustra generosidad na Pablo. Nan a manda cen pa Pablo, ya e no tabatin nodo di preocupa tocante placa; asina e por a dedica mas tempo na su sirbishi. Kico Pablo a pensa di e regalo? Wel, el a bisa cu e regalo tabata “un holo dushi, un sacrificio aceptabel, cu ta agrada Dios.” (Lesa Filipensenan 4:15-19.) Pablo sigur a aprecia e bunita gesto ey, y Jehova tambe.

¹⁴ Awe ta mescos: Jehova ta keda masha contento cu nos contribucionnan pa e obra mundial. Es mas, el a priminti cu si nos sigui pone interesnan di Reino na prome luga den nos bida, lo e percura pa nos tin tur loke nos mester, tanto den sentido spiritual como material.​—Mat. 6:33; Luc. 6:38.

DEMOSTRA BO APRECIO

15. Menciona algun motibo pakico bo ta gradicido na Jehova.

¹⁵ Si nos mester cuminsa menciona tur e motibonan cu nos tin pa ta gradicido na Jehova, nos lo no caba nunca. Pa cuminsa, nos ta masha gradicido cu el a duna nos bida, un regalo precioso. Y nos mester gradicie tur dia pa esey, no ta berdad? Banda di esey, e ta duna nos tur loke nos tin mester pa keda na bida: cuminda, paña, un luga di biba y e aire cu nos ta respira. Nos ta gradicido tambe pa e conocemento exacto cu ta duna nos fe y un bunita speransa pa futuro. Pues, pa e solo echo cu Jehova ta nos Creador y pa tur e cosnan cu el a haci pa nos, ta na su luga anto pa nos ador’e y ofrec’e sacrificio di alabanza.​—Lesa Revelacion 4:11.

16. Con nos por demostra nos aprecio pa e sacrificio di rescate di Hesus?

¹⁶ Manera nos a siña den e articulo anterior, Jehova Dios a duna humanidad un regalo masha valioso: e sacrificio di rescate di Hesucristo. Esaki ta un manera sobresaliente cu Dios a demostra su amor pa nos. (1 Juan 4:10) Pues, con nos por demostra nos gratitud? Pablo a bisa: “E amor di Cristo ta obliga nos pa haci esaki, ya cu ta na e conclusion aki nos a yega: un hende a muri pa tur, . . . y el a muri pa tur, pa esnan cu ta biba no biba mas pa nan mes, ma pa esun cu a muri pa nan y a ser lanta for di morto.” (2 Cor. 5:14, 15) Eigenlijk, loke Pablo tabata kiermen ta cu si nos realmente ta aprecia Dios su bondad inmereci, nos lo uza nos bida pa mustra honor na Dios y na Su Yiu. Nos ta demostra nos amor y aprecio pa Dios y pa Cristo mediante nos obediencia y nos deseo pa predica y haci discipel.​—1 Tim. 2:3, 4; 1 Juan 5:3.

17, 18. Cua ta algun manera cu algun ruman ta aumenta nan sacrificio di alabanza na Jehova? Duna un ehempel.

¹⁷ Abo lo por ofrece un mihor sacrificio di alabanza na Jehova? Despues cu algun ruman a reflexiona riba tur e bon cosnan cu Jehova a haci pa nan, nan a dicidi di organisa nan asuntonan di tal manera cu nan por haci mas den e organisacion di Jehova y den e trabou di predica. Algun di nan awor por traha como pionero auxiliar un of mas luna pa aña, y otronan a asta cuminsa traha pionero regular. Tin otronan ta yuda cu proyectonan di construccion. Acaso esakinan no ta maneranan excelente pa mustra nos aprecio? Si nos ta haci e sacrificionan aki cu e motivacion corecto—esta pa demostra nos aprecio y gratitud na Jehova—e obranan di sirbishi sagrado aki lo ta aceptabel pa Dios.

¹⁸ Hopi cristian ta sinti cu nan debe Jehova, y esey ta motiva nan pa demostra nan gratitud na dje. Morena ta un di nan. Morena a lanta den un famia catolico, pero e tabatin hopi pregunta tocante Dios y e proposito di bida. El a busca contesta pa su preguntanan tanto den religion catolico como den filosofia Asiatico. Pero niun di esakinan no a yud’e. Ta ora el a cuminsa studia Bijbel cu Testigonan di Jehova, el a ser sacia den sentido spiritual. Morena tabata masha gradicido na Jehova pa loke el a siña den Bijbel; esey a duna su bida proposito. Pa demostra su gratitud, Morena a dicidi di uza tur su energia den Jehova su sirbishi. Asina cu el a batisa, el a cuminsa traha pionero auxiliar riba un base regular. Y asina cu su circunstancianan a permiti, el a bira pionero regular. Esey tabata 30 aña pasa; ainda Morena ta traha den sirbishi di tempo completo.

19. Con lo bo por haci mas sacrificio pa Jehova?

¹⁹ Ta claro cu tin hopi sirbidor fiel di Jehova cu no por traha pionero, pasobra nan circunstancianan no ta permiti esey. Pero sea cu nos ta pionero of no, nos tur por ofrece Jehova sacrificio aceptabel. Con asina? Nos tin cu percura pa nos conducta semper ta na harmonia cu Jehova su principionan. Nos tin cu corda cu tur ora nos ta representa Jehova. Pa loke ta nos fe, nos mester tin pleno confianza cu Dios lo cumpli cu tur su propositonan. Y pa loke ta nos obranan, nos ta yuda plama e bon noticia. Pesey, pa demostra cu realmente nos ta aprecia tur loke Jehova a haci pa nos, laga nos sigui haci sacrificio di henter nos alma pa Jehova.

[Comentario na pagina 27]

Jehova su bondad ta motiva bo pa mehora bo calidad di sacrificio di alabanza?

[Plachi na pagina 25]

Bo ta probecha di tur oportunidad pa duna testimonio?