Pregunta 2: Kico Lo Pasa cu Mi ora Mi Muri?

ROMAN tabata basta jong ora un bon amigo di dje a muri den accidente di auto. El a bisa: “E morto di mi amigo a dal mi masha duro mes. Y pa varios aña despues di e accidente, mi a keda puntra mi mes kico ta pasa cu nos ora nos muri.”

Dicon ta normal cu hende ta haci e pregunta ey?

Pasobra hende tin dificultad pa acepta morto. Sea loke sea nos edad, generalmente ningun di nos no kier muri. Ademas, hopi hende tin miedo di loke ta bin despues di morto.

Con algun hende ta contesta e pregunta ey?

Hopi hende ta kere cu ora un persona muri, un parti di dje ta sigui biba. Nan ta kere cu bon hende ta bay cielo, mientras cu e malbadonan lo ser castiga pa semper pa nan picanan. Otronan ta pensa cu ora un hende muri, e ta stop di existi y cu despues lo e ser lubida completamente.

Kico e contestanan ey ta encera?

E prome contesta ta encera cu ora un persona fayece, e no ta muri eigenlijk. E di dos ta indica cu bida no tin sentido. Anto hende cu ta pensa cu bida no tin sentido, of proposito, por adopta e actitud robes aki: “Laga nos come y bebe, pasobra mañan nos ta muri.”—1 Corintionan 15:32.

Kico Bijbel ta siña?

Bijbel no ta siña cu un parti di nos ta keda bibo ora nos muri. Dios a inspira Rey Salomon pa skirbi: “E bibonan sa cu nan lo muri, ma e mortonan no sa nada.” (Eclesiastes 9:5) Hende cu “no sa nada” no ta consciente di loke ta pasa rond di nan. Nan no por sinti ni haci nada. Pues, e mortonan no por yuda hende bibo ni haci nan daño.

Contrario na loke hopi hende ta kere, Dios su proposito no tabata pa hende muri. El a crea Adam, e prome hende, cu e speransa di biba pa semper riba tera. E unico momento cu Dios a menciona morto ta ora el a bisa Adam cu esey ta e castigo pa desobediencia. Si, el a prohibi Adam di come fruta di un cierto palo y a spiert’e cu si e come di dje, lo e “muri sigur.” (Genesis 2:17) Si Adam cu Eva lo a keda obedecido na Dios, nan y tur nan descendientenan cu tabata leal na Dios lo a keda biba pa semper riba tera.

Pero Adam a scoge pa no haci caso di e spiertamento cu Dios a dun’e. El a peca ora el a desobedece Dios, y pesey el a muri. (Romanonan 6:23) Ningun parti di Adam no a keda bibo ora el a muri. Mas bien, ora Adam a muri, el a stop di existi. Dios a bisa Adam: “Cu sodo di bo frenta lo bo come pan, te ora bo bolbe na tera, pasobra for di dje bo a wordo tuma; pasobra stof bo ta, y na stof lo bo bolbe.” (Genesis 3:19) Y como cu humanidad completo ta descendiente di Adam, nos tur a hereda pica y morto for di dje.—Romanonan 5:12.

Aunke Adam a scoge pa desobedece Jehova, Dios lo cumpli cu Su proposito pa yena tera cu descendiente perfecto di Adam. (Genesis 1:28; Isaias 55:11) Pronto Jehova lo resucita mayoria di hende cu a muri. Relaciona cu e tempo ey, apostel Pablo a bisa: “Lo bay tin un resureccion di tanto hende husto como inhusto.”—Echonan 24:15.

Roman, kende nos a menciona anteriormente, a studia Bijbel y a haya sa loke Bijbel ta siña tocante morto y Jehova Dios. Esaki a haci un efecto profundo riba dje. Bo por lesa su experencia cu ta cuminsa na pagina 11 di La Atalaya di 1 di november 2012.

Si bo kier sa mas tocante kico ta pasa cu nos ora nos muri, wak capitulo 6 di e buki Kico Bijbel Ta Siña Realmente? Bo por download e for di e website www.jw.org

Kico Hesus A Siña Hende Tocante Morto?

Hesus no tabata di acuerdo cu e lidernan religioso di su tempo cu tabata bisa cu no tin resureccion. (Lucas 20:27) Ademas, e no a siña hende cu un parti di un persona ta keda bibo ora e muri. Mas bien, el a siña hende lo siguiente.

Morto ta manera un soño. Ora su amigo Lazaro a muri, Hesus a bisa: “Nos amigo Lazaro ta drumi, pero mi ta bay eynan pa lant’e.” E discipelnan di Hesus no a compronde kico e tabata kiermen. Pesey nan a contesta: “Señor, si ta drumi e ta, lo e bira bon.” Pero segun e relato biblico: “Hesus tabata papia di Lazaro su morto, ma nan a kere cu e tabata kiermen cu Lazaro tabata gewoon na soño. Pesey, Hesus a bisa nan e ora ey francamente: ‘Lazaro a muri.’”—Juan 11:11-14.

E mortonan lo ser resucita. Ora Hesus a yega na e pueblo natal di Lazaro, el a consola Marta, Lazaro su ruman muher, bisando: “Bo ruman lo lanta for di morto.” Despues, Hesus a haci e promesa conmovedor aki: “Ami ta e resureccion y e bida. Esun cu pone fe den mi, maske e muri, lo bolbe biba.” Hesus no a papia pa papia, sino el a actua. Dilanti di hopi testigo, Hesus a resucita Lazaro aunke e tabatin cuater dia morto.—Juan 11:23, 25, 38-45.

Den e revelacion cu Hesus a duna apostel Juan, el a bolbe priminti cu e mortonan lo ser resucita. Den un idioma figurativo, el a describi con tur e mortonan lo ser lanta den futuro.—Revelacion 20:13.