Pregunta 3: Dicon Dios Ta Laga Mi Sufri?

IAN su tata tabata un burache. Aunke Ian tabatin tur loke e mester den sentido material, e tabata falta e cariño y afecto di su tata, algo cu e tabata desea masha hopi mes. El a bisa: “E motibonan principal pakico mi no tabatin hopi cariño p’e tabata su bebemento y e manera cu e tabata trata mi mama.” Segun cu Ian tabata bira grandi, el a cuminsa duda cu Dios ta existi. El a rasona: “Si Dios realmente ta existi, dicon e ta laga hende sufri?”

Dicon ta normal cu hende ta haci e pregunta ey?

Wel, hasta hende cu tin un bida relativamente facil, por rabia ora nan mira hende inocente sufri. Sinembargo, e pregunta relaciona cu sufrimento ta bira importante pa bo ora abo mes haya bo cu problema, manera tabata e caso cu Ian, of ora un ser keri di bo bira malo of muri.

Con algun hende ta contesta e pregunta ey?

Algun hende ta kere cu Dios ta laga nos sufri pa test nos y pa siña nos bira humilde y bondadoso. Otronan ta kere cu hende ta sufri den e bida aki pa motibo di e picanan cu nan a comete den nan bida anterior.

Kico e contestanan ey ta encera?

Cu Dios ta cruel y cu e no tin cu nes cu hende ta sufri, y pesey ta dificil pa hende stim’e.

Kico Bijbel ta siña?

Bijbel ta mustra bon cla cu no ta Dios ta causa sufrimento. E ta bisa: “Ora un hende ta pasa den prueba, e no mester bisa: ‘Dios ta pone mi na prueba.’ Pasobra ningun hende no por pone Dios na prueba cu cos malo, y e mes tampoco no ta pone ningun hende na prueba cu cos malo.” (Santiago 1:13) Ademas, e idea cu Dios ta culpabel pa sufrimento no ta cuadra cu e descripcion cu Bijbel ta duna di Dios su personalidad. Pakico no?

Wel, un di e cualidadnan principal di Dios ta amor. (1 Juan 4:8) Pa enfatisa e punto ey, Bijbel ta compara Dios su sintimentonan cu esnan di un mama cu tin un yiu recien naci. Segun Bijbel, Dios ta puntra: “Un muher por lubida su yiu cu e ta cria na pecho, y no tene compasion cu e yiu di su mondongo?” Y Dios mes ta contesta: “Esakinan por lubida, ma ami si lo no lubida bo.” (Isaias 49:15) Bo por imagina bo cu un mama ta perhudica su yiu deliberadamente? Al contrario, un mama cu ta stima su yiu ta haci tur loke e por pa alivia sufrimento di su yiu. Awel, Dios ta mescos: E no ta pone hende inocente sufri.—Genesis 18:25.

No obstante, hende inocente ta sufri awe. Esey kisas ta pone bo puntra: ‘Si Dios ta interesa den nos, y e ta todopoderoso, dicon e no ta caba cu loke ta causa sufrimento?’

Wel, ta cu bon motibo Dios ta permiti sufrimento sigui te ainda. Laga nos considera djis un di e motibonan ey: Hopi bes, ta hende ta pone otro sufri. Hopi abusador y tirano cu ta causa otronan dolor no ta dispuesto pa cambia. Pues, pa Dios elimina un di e causanan grandi di sufrimento, e tin cu destrui hende asina.

Anto apostel Pedro a splica dicon Dios no a destrui e malbadonan ey ainda; el a bisa: “Jehova no ta tarda pa cumpli cu su promesa, manera algun hende ta kere; mas bien, e tin pasenshi cu boso pasobra e no ta desea pa ningun hende ser destrui, ma e ta desea pa tur haya chens di arepenti.” (2 Pedro 3:9) Pues, Jehova Dios su pasenshi ta un muestra di su amor y misericordia.

Pero pronto Jehova Dios lo tuma accion. Lo e ‘paga cu tribulacion esnan cu ta causa tribulacion’ pa hende inocente. Si, esnan cu ta pone otronan sufri inhustamente “lo sufri e castigo hudicial di destruccion eterno.”—2 Tesalonicensenan 1:6-9.

Ian, kende nos a menciona anteriormente, a haya contesta satisfactorio pa su preguntanan encuanto sufrimento. Loke el a siña a cambia su manera di mira bida. Bo por lesa su experencia cu ta cuminsa na pagina 13 di La Atalaya di 1 di november 2012.

Si bo kier sa mas tocante pakico Dios ta permiti sufrimento y con lo e caba cu sufrimento, wak capitulo 11 di e buki Kico Bijbel Ta Siña Realmente? Bo por download e for di e websitewww.jw.org

Kico Hesus A Siña Hende Tocante Sufrimento?

Hesus no a culpa Dios pa e sufrimento cu tabatin rond di dje. Mas bien, el a haci lo siguiente.

El a mustra cu sufrimento no ta castigo di Dios. Hesus a cura hende malo, coho y ciego. (Mateo 15:30) E milagernan cu el a haci ta siña nos dos cos importante: Di prome, Hesus a uza Dios su poder pa kita sufrimento y no pa caus’e. Di dos, Hesus no a cura hende djis pa cura. Ora el a mira hende cu ta sufri, el a “haya duele” di nan. (Mateo 20:29-34) Hesus tabata un refleho perfecto di su Tata; e tabatin e mesun sintimentonan cu su tata. Pesey, for di loke Hesus a bisa y haci nos ta compronde cu Dios ta bira tristo ora e mira hende ta sufri y cu E kier trece alivio pa nan.—Juan 14:7, 9.

El a identifica e persona cu realmente ta causa hopi sufrimento—Satanas e Diabel. Hesus a bisa cu Satanas “tabata un matado for di cuminsamento.” (Juan 8:44) Ademas, el a mustra cu ta Satanas e Diabel ta “e gobernante di e mundo aki” y cu e ta “gaña henter e tera habita.”—Juan 12:31; Revelacion 12:9.

El a duna nos e speransa cu lo yega e dia cu lo no tin sufrimento mas. El a siña su siguidornan pa resa asin’aki: “Nos Tata cu ta den cielo, . . . laga bo Reino bin. Laga bo boluntad sosode, mescos cu den cielo, tambe riba tera.” (Mateo 6:9, 10) Pues, ora e Reino di Dios cuminsa reina riba henter tera, tera lo ta liber di sufrimento mescos cu ta e caso den cielo.

Den un revelacion cu Hesus a duna apostel Juan, el a describi con bida lo ta bou di e Reino di Dios. El a indica cu e tempo ey, Dios lo ‘seca tur lagrima for di wowo di hende, y cu lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.’—Revelacion 1:1; 21:3, 4.