Keda den Jehova Su Vaye di Proteccion

1, 2. Ki guera real ta na caminda, y kico e sirbidornan di Dios lo no tin nodo di haci durante e guera aki?

DIA 30 di october 1938, miyones di hende na Merca tabata scuchando un programa hopi gusta na radio cu tabata presenta obranan teatral. E presentacion di e anochi ey tabata un adaptacion di un cuenta di ciencia ficcion titula Guera di e Mundonan (The War of the Worlds). Actornan a hunga rol di reportero y tabata duna informe di un invasion di un ehercito di extraterestre cu a bin for di planeta Mars y cu tabata causando destruccion rond mundo. Aunke nan a anuncia di antemano cu e programa radial tabata un obra teatral, hopi oyente a kere cu e atake tabata real y a spanta. Tin di nan hasta a tuma cierto medida pa proteha nan mes contra di e extraterestrenan imaginario aki.

² Awe tin un guera di berdad na caminda. Pero mayoria di hende no ta haci nada pa prepara p’e. Ta trata di e guera di Armagedon, esta, e guera di Dios contra e mundo malbado aki. Esaki no ta un guera di ciencia ficcion, ya cu ta Bijbel, Dios su Palabra inspira, ta profetisa cu lo e tuma luga. (Rev. 16:14-16) Durante e guera aki, e sirbidornan di Dios riba tera lo no tin cu bringa. Pero sin duda nan lo keda babuca pa motibo di e sucesonan asombroso cu lo tuma luga y di e manera impresionante cu Dios lo uza su poder pa salba nan.

3. Ki profecia nos lo analisa, y dicon e ta importante pa nos?

³ Un profecia cu nos por haya na Zacarias capitulo 14 ta revela hopi cos tocante e guera di Armagedon. A pesar cu e profecia aki a ser skirbi un 2.500 aña pasa, e ta masha importante pa nos awe. (Rom. 15:4) Gran parti di loke e ta bisa tin di haber cu cosnan cu a pasa cu e pueblo di Dios desde cu e Reino Mesianico a ser estableci den cielo na aña 1914 y tambe cu sucesonan emocionante cu lo desaroya den futuro cercano. Entre e cosnan mas notabel cu e profecia ta menciona ta e formacion di “un vaye masha masha grandi” y “awanan bibo” cu lo cuminsa core. (Zac. 14:4, 8) Den e articulo aki, nos lo siña kico e vaye aki ta y con e ta percura proteccion pa e sirbidornan di Jehova. Nos lo siña tambe kico e awanan bibo ta y con nos por beneficia di nan. No solamente nos lo mira e importancia e ora ey di bebe e awa aki, pero nos lo kier beb’e tambe. Pues, laga nos presta atencion na e profecia aki.—2 Ped. 1:19, 20.

‘UN DIA PA JEHOVA’ TA CUMINSA

4. (a) Na ki tempo e ‘dia pa Jehova’ a cuminsa? (b) Kico e sirbidornan di Jehova tabata anuncia decadanan prome cu 1914, y con e lidernan politico y e lidernan religioso a reacciona?

⁴ E profecia di Zacarias capitulo 14 ta cuminsa bisando: ‘Ta bin un dia pa Jehova.’ (Lesa Zacarias 14:1, 2.) Kico e dia aki ta? E ta “e dia di Señor”, cu a cuminsa na aña 1914 ora cu Hesus a bira Rey di e Reino Mesianico di Dios den cielo. (Rev. 1:10; 11:15) Decadanan prome cu 1914, e sirbidornan di Jehova a anuncia na e nacionnan cu fin di “e tempo stipula di e nacionnan” lo a bin na e aña ey y cu un periodo di problema lo a cuminsa pa mundo manera nunca antes a sosode. (Luc. 21:24) Con e nacionnan a reacciona? En bes di presta atencion na e spiertamento oportuno ey, lidernan politico y lidernan religioso a desprecia y persigui e predicadornan ungi celoso ey. Den un sentido, e lidernan ey a haci bofon di e Dios Todopoderoso, ya cu e unginan ta embahadornan di Reino; nan ta representa “Jerusalem celestial”, esta, e Reino Mesianico.—Heb. 12:22, 28.

5, 6. (a) Manera Bijbel a profetisa, kico e nacionnan a haci contra “e stad” y su ‘ciudadanonan’? (b) Ken tabata “e resto di e pueblo”?

⁵ Zacarias a profetisa kico e nacionnan lo haci: “E stad [Jerusalem] lo wordo captura.” “E stad” ta simbolisa e Reino Mesianico di Dios. E cristiannan ungi cu ainda ta riba tera ta represent’e como su ‘ciudadanonan.’ (Flp. 3:20) E stad a ser “captura” durante Prome Guera Mundial ora cu miembronan prominente di e organisacion di Jehova riba tera a ser aresta y encarcela na Atlanta, Georgia, Merca. Enemigonan a trata e resto di cristiannan ungi inhustamente y cu crueldad. Nan a prohibi nan literatura y a purba di para nan actividad di predica e Reino. Tabata comosifuera e enemigonan a ‘plunder’ e casnan di e stad.

⁶ E pueblo di Dios tabata un grupo relativamente chikito, y aunke nan enemigonan a gaña riba nan, opone nan y persigui nan, toch nan no por a caba cu adoracion berdadero. Tabatin cristiannan ungi cu a keda fiel. Segun e profecia di Zacarias, nan tabata “e resto di e pueblo” cu a nenga di “wordo corta kita for di e stad.”

7. Ki ehempel Testigonan di Jehova ungi a pone pa tur adorador berdadero awe?

⁷ Acaso e profecia aki a cumpli completamente ora Prome Guera Mundial a termina? No. E nacionnan lo a lansa mas atake contra e resto ungi y nan compañeronan leal cu tin e speransa di biba pa semper riba tera. (Rev. 12:17) Un prueba di esey ta e persecucion severo cu a tuma luga durante Segunda Guera Mundial. E ehempel di fieldad di e Testigonan ungi ta anima nos awe pa wanta cualkier prueba cu nos haya nos cu ne, entre otro, oposicion di famia cu no ta creyente, di coleganan di trabou of di compañeronan di scol cu ta haci bofon di nos pa motibo di nos fe. (1 Ped. 1:6, 7) No ta importa unda e adoradornan berdadero ta biba; nan ta mas determina cu nunca pa “para firme den un spirito”, ‘sin laga esnan cu ta opone nan hinca miedo den nan.’ (Flp. 1:27, 28) Pero unda e pueblo di Jehova por ta safe den un mundo cu ta odia nan?—Juan 15:17-19.

JEHOVA TA FORMA “UN VAYE MASHA MASHA GRANDI”

8. (a) Kico sero sa simbolisa den Bijbel? (b) Kico e “Sero di Oleifi” ta representa?

⁸ Ya cu Jerusalem—“e stad”—ta simbolisa Jerusalem celestial, e “Sero di Oleifi, cu ta keda dilanti di Jerusalem”, tambe mester ta simbolico. Kico e sero ey ta representa? Con lo e “split den dos” y bira dos sero? Dicon Jehova ta yama nan “mi seronan”? (Lesa Zacarias 14:3-5.) Den Bijbel, sero tin biaha ta representa reino of gobierno. Bijbel sa bisa tambe cu bendicion y proteccion ta bin di e sero di Dios. (Sal. 72:3; Isa. 25:6, 7) Pues, e Sero di Oleifi cu Dios ta para riba dje ta representa Jehova su soberania universal, es decir, su gobernacion riba tur su creacion.

9. Den ki sentido e “Sero di Oleifi” ta split den dos?

⁹ E profecia ta bisa cu e Sero di Oleifi “lo split den dos.” Kico esaki ta nifica? E ta nifica cu Jehova ta establece un di dos gobernacion pa un proposito special. E gobernacion secundario aki ta e Reino Mesianico den man di Hesucristo. Como cu tur e dos gobernacionnan aki ta di Jehova, e ta yama e dos seronan aki, cu a resulta for di e splitmento di e “Sero di Oleifi”, “mi seronan.”—Zac. 14:4, 5.

10. Kico e “vaye masha masha grandi” entre e dos seronan ta representa?

¹⁰ Ora e sero simbolico split den dos—mitar den direccion noord y mitar den direccion zuid—Jehova su pianan ta keda para riba ambos sero. E split aki ta forma, of crea, “un vaye masha masha grandi” bou di Jehova su pianan. Kico e vaye simbolico aki ta? E ta representa Dios su proteccion. Mescos cu un vaye literal entre dos sero ta duna hende proteccion, asina e sirbidornan di Jehova ta safe bou di su soberania universal y bou di e Reino Mesianico di su Yiu. Jehova lo percura pa adoracion puro no ser elimina nunca. Na ki tempo e Sero di Oleifi aki a split? Esey a sosode na 1914 ora cu e Reino Mesianico a ser estableci den cielo na fin di e tempo stipula di e nacionnan. Y na ki tempo e pueblo di Jehova a cuminsa huy bay na e vaye simbolico aki?

E PUEBLO DI DIOS TA CUMINSA HUY BAY NA E VAYE

11, 12. (a) Na ki tempo e pueblo di Dios a cuminsa huy bay na e vaye simbolico? (b) Kico ta duna prueba cu Jehova su brasa poderoso ta protehando su pueblo?

¹¹ Hesus a spierta su siguidornan: “Tur nacion lo odia boso pa motibo di mi nomber.” (Mat. 24:9) Desde 1914, ora cu e ultimo dianan a cuminsa, e odio ey a bira mas grandi. A pesar cu enemigo a persigui e resto di cristiannan ungi cruelmente durante Prome Guera Mundial, nan no por a caba cu e grupo fiel aki. Na aña 1919, e pueblo di Dios a ser libra for di e gara di Babilonia e Grandi, e imperio mundial di religion falso. (Rev. 11:11, 12)a Esey ta e tempo cu nan a cuminsa huy bay na e vaye di e seronan di Jehova.

¹² For di 1919, Jehova a sigui proteha su adoradornan berdadero na tur parti di mundo. A traves di decadanan, hopi gobierno a purba di stop Testigonan di Jehova di predica of a prohibi nan literatura biblico. Te awe esey ta tuma luga den algun pais. Pero ni maske cuanto e nacionnan purba, nunca nan lo por caba cu adoracion berdadero! Jehova su brasa poderoso lo sigui proteha su pueblo.—Deu. 11:2.

13. Kico nos mester haci pa keda den Jehova su vaye di proteccion, y dicon awor ta mas importante cu nunca pa keda den e vaye ey?

¹³ Si nos pega na Jehova y para firme den e berdad, nos lo keda den su vaye di proteccion. Jehova y su Yiu Hesucristo, na nan turno, lo haci nan parti; Dios lo no permiti nada ni ningun persona ‘ranca nos for di Su man.’ (Juan 10:28, 29) Jehova ta cla pa duna nos tur e yudansa cu nos tin mester pa nos por obedec’e como Soberano di universo y keda subditonan leal di e Reino Mesianico. Awor ta mas importante cu nunca pa nos keda den Jehova su vaye di proteccion, ya cu e tribulacion grandi ta acercando rapidamente y nos lo bay tin mas necesidad di Dios su yudansa.

E “DIA DI BATAYA” TA YEGA

14, 15. Riba e dia cu Jehova lo bringa contra di su enemigonan, kico lo ta e situacion di esnan pafo di e vaye?

¹⁴ Segun cu fin di e mundo malbado aki ta yega mas cerca, Satanas su atake contra e sirbidornan di Jehova lo bira mas fuerte. Pero pronto Satanas lo lansa su ultimo atake. E ora ey, Jehova lo sali pa “bringa” contra di e enemigonan di su pueblo. Riba e “dia di bataya” ey, e Soberano di universo lo demostra mas cla cu nunca prome ki Guerero glorioso e ta.—Zac. 14:3.

¹⁵ Kico lo ta e situacion di esnan cu no tin e proteccion di Jehova, esta, esnan pafo di e vaye, riba e dia cu Jehova sali pa bringa? Segun e profecia, nan “lo no tin luz”, es decir, nan lo no tin e aprobacion di Dios. Riba e binidero dia di bataya ey, “cabay, mula, camel, burico, y tur e bestianan di cria”—simbolonan di e ekipo militar di e nacionnan—lo ser afecta pa plaga. Esaki ta nifica cu tur arma y ekipo cu nan ta uza den guera lo no sirbi mas. Zacarias a bisa tambe cu Jehova lo uza un “plaga”, of maleza, pa castiga su enemigonan. Riba e dia ey, ‘nan wowo y nan lenga lo putri.’ Nos no sa si esaki lo ta un plaga literal, pero en todo caso lo e silencia nan menasanan spantoso. E enemigonan ey lo no por haci nos daño ni nan lo no por papia contra Dios. (Zac. 14:6, 7, 12, 15) Tur “e reynan di tera y nan ehercitonan” lo tuma parti pa Satanas, pero ningun lo scapa destruccion. (Rev. 19:19-21) “Esnan cu SEÑOR mata riba e dia ey lo keda benta tur caminda, for di esun extremo di mundo te na e otro.”—Jer. 25:32, 33.

16. En bista cu Jehova su dia di bataya ta acercando, kico nos mester puntra nos mes for di awor, y kico nos lo tin cu haci?

¹⁶ Ora tin guera, tur hende ta sufri, hasta esnan cu finalmente gana. Por tin scarsedad di cuminda. Propiedadnan por bay perdi. Nivel di bida por baha drasticamente. Hende por perde cierto libertad cu nan tabatin. Si nos haya nos cu e dificultadnan aki, con nos lo reacciona? Nos lo drenta panico? Nos lo stop di sirbi Jehova? Nos lo perde tur speransa y bira desanima? Durante e tribulacion grandi, lo ta masha importante pa nos mantene nos fe den Jehova su poder di salba nos y keda den su vaye di proteccion.—Lesa Habacuk 3:17, 18.

“AWANAN BIBO LO CORE”

17, 18. (a) Kico e “awanan bibo” ta? (b) Kico e “lama di pariba” y e “lama di pabou” ta representa? (c) Kico bo ta determina pa haci?

¹⁷ Despues di Armagedon, “awanan bibo lo core” nonstop for di e Reino di Cristo. E “awanan bibo” aki ta representa tur loke Jehova a percura pa hende por biba pa semper. Den e profecia di Zacarias, e “lama di pariba” ta referi na Lama Morto, y e “lama di pabou” na Lama Mediteraneo. Tur dos ta referi na hende. E Lama Morto ta representa esnan cu ta drumi den graf. E Lama Mediteraneo ta yen di bida, pues e ta un bon representacion di e “multitud grandi” cu lo sobrevivi Armagedon. (Lesa Zacarias 14:8, 9; Rev. 7:9-15) Ambos grupo ta sacia nan sed cu e awanan bibo simbolico, e “riu di awa di bida.” Cu ki beneficio? Nan lo ser libra for di e condena di morto cu nan a hereda for di Adam, y nan lo bira perfecto y biba pa semper.—Rev. 22:1, 2.

¹⁸ Bou di e proteccion di Jehova, nos lo sobrevivi e fin di e mundo malbado aki y drenta den su husto mundo nobo. A pesar cu tur nacion di e mundo aki ta odia nos, nos ta firmemente determina pa keda leal na e Reino di Dios y keda den Jehova su vaye di proteccion.