“Di Tur e Mandamentonan, Cua Ta Esun di Mas Importante?”

Kico Dios ta pidi di nos? El a duna nos un cantidad di regla cu nos tin cu sigui? No! Segun Hesus, e Yiu di Dios, nos por resumi loke Dios ta pidi di nos den un solo palabra.​—Lesa Marco 12:28-31.

Laga nos wak prome na ki ocasion Hesus a bisa esaki. E tabata siña hende den e tempel riba 11 di nisan, un par di dia prome cu su morto. Su enemigonan tabata hacie algun pregunta controversial pa cog’e den trampa. Bes tras bes e tabata tapa nan boca cu su contestanan sin cu nan por a puntr’e nada mas. Despues di esey, nan a haci Hesus e pregunta aki: “Di tur e mandamentonan, cua ta esun di mas importante?”—Versiculo 28.

Esey no tabata un pregunta facil. Algun Hudiu tabata debati cu otro tocante cua di e 600 y pico leynan di e Ley di Moises tabata esun di mas importante. Y otronan tabata pretende cu tur e leynan tabata mes importante y cu ta robes pa pensa cu algun di nan tabata mas importante cu otro. Con Hesus lo a contesta e pregunta ey?

Den su contesta, Hesus a menciona dos mandamento na luga di un so. El a bisa cu e prome ta: “Bo tin cu stima Jehova bo Dios cu henter bo curason, cu henter bo alma, cu henter bo mente y cu tur bo forsa.” ((Versiculo 30; Deuteronomio 6:5) Cu otro palabra: Amor pa Jehova tin di haber cu henter nos ser, esta, tur nos habilidadnan, energia y recursonan. Un obra di consulta a bisa asin’aki: “Nos tin cu stima Dios den un forma completo.” Pues, si bo ta stima Dios, bo tin cu haci bo best pa biba na un manera cu ta agrad’e.​—1 Juan 5:3.

Na di dos luga, Hesus a bisa: “Stima bo prohimo mescos cu bo mes.” (Versiculo 31; Levitico 19:18) Amor pa Dios y amor pa prohimo ta estrechamente liga cu otro. Ora nos ta stima Dios, nos ta stima nos prohimo tambe. (1 Juan 4:20, 21) Y si nos ta stima nos prohimo mescos cu nos mes, nos lo trata hende manera nos kier pa nan trata nos. (Mateo 7:12) Asina nos ta demostra cu nos ta stima e Dios cu a crea tanto nos como nan den su imagen.—Genesis 1:26.

Con importante e mandamentonan aki ta? Hesus a bisa: “No tin ningun otro mandamento mas grandi cu esakinan.” (Versiculo 31) Den un relato paralelo, Hesus a bisa cu tur e otro mandamentonan ta basa riba e dos mandamentonan aki.​—Mateo 22:40.

No ta dificil pa agrada Dios. Nos por resumi tur loke e ta pidi di nos den un solo palabra: amor. Esey semper tabata y lo sigui ta e fundeshi di adoracion berdadero. Pero, amor no ta djis un asunto di palabra y sintimento; e tin cu ser demostra tambe pa medio di accion. (1 Juan 3:18) Lo bo no tin gana di sa con bo por cultiva y demostra bo amor pa Jehova Dios, kende “ta amor”?​—1 Juan 4:8.