Pedro y Ananias A Gaña—Ki Les Nos Por Siña?

Manera bo sa, un hende ta gaña ora e ta bisa algo cu e sa cu no ta berdad. Abo a yega di gaña?—a Hasta algun hende grandi cu ta stima Dios a yega di gaña. Probablemente bo sa di un persona den Bijbel cu a yega di gaña. Un di nan tabata Pedro, un di e 12 apostelnan di Hesus. Bo kier sa pakico el a gaña? Laga nos wak kico Bijbel ta conta nos.

Despues cu nan a aresta Hesus, nan a hib’e na cas di e sumo sacerdote. Tabata despues di meyanochi. Pedro a drenta den patio di e cas di e sacerdote sin cu ningun hende a ripara cu t’e. Debi na e claridad di un candela, e cria di e sumo sacerdote cu a laga Pedro drenta a reconoc’e. El a bis’e: “Abo tambe tabata hunto cu Hesus.” Pedro, yen di miedo, a bisa cu e no tabata sa di kico e cria ta papia.

Bijbel ta bisa cu mas despues “un otro mucha muher a mir’e.” El a bisa: “E homber aki tabata hunto cu Hesus.” Pedro a bolbe nenga esey. Despues di un rato, otronan a bay cerca Pedro y a bis’e: “Abo tambe sigur ta un di nan.”

Pedro a haya miedo. Pesey, pa di tres biaha el a gaña, bisando: “Mi no conoce e homber ey!” Anto na e momento ey un gay a canta. Hesus a bira wak Pedro, y Pedro a corda loke Hesus a bis’e un rato prome: “Prome cu gay canta, lo bo nenga tres biaha cu bo conoce mi.” E cos ey a duel Pedro asina tanto cu el a yora amargamente.

Un cos asina por pasa cu bo?— Kisas bo ta na scol, anto bo ta tende e muchanan papia tocante Testigonan di Jehova. Un di nan ta bisa: “Nan no ta saluda bandera.” Un otro ta bisa: “Nan no ta bay guera pa defende nan pais.” Un otro mucha ta bisa: “Nan no ta cristian, pasobra nan no ta celebra Pasco.” Y un di nan ta draai wak bo y puntra bo: “Abo tambe ta Testigo di Jehova, toch?” Kico lo bo bisa?—

Prome cu un cos asina sosode, bo mester ta prepara pa duna un bon contesta. Pedro no tabata prepara. Ora el a hay’e bou di presion, el a gaña! Sinembargo, e tabatin hopi duele di loke el a haci, y Dios a pordon’e.

Ananias, un otro discipel di Hesus, tambe a gaña. Pero Dios no a pordona ni e ni su casa Safira. Safira a bay eens cu su casa pa nan gaña. Laga nos wak dicon Dios no a pordona Ananias cu Safira.

Dies dia despues cu Hesus a bay laga e apostelnan y bolbe na cielo cerca Dios, mas o menos 3.000 hende a batisa na Jerusalem. Hopi di nan a bin di paisnan leu pa celebra e Fiesta di Pentecoste. Y despues cu nan a bira discipel di Hesus, nan kier a keda un par di dia mas pa siña mas tocante nan fe nobo. Pues, algun discipel di Hesus a uza nan placa pa percura pa e rumannan aki.

Ananias cu su casa a bende algun propiedad pa haya placa pa yuda esnan recien batisa. Ora Ananias a trece e placa pa e apostelnan, el a bisa cu esey tabata tur loke nan a haya pa loke nan a bende. Pero esey no ta berdad! El a keda cu un parti di e placa! Dios a laga Pedro haya sa esey, y Pedro a bisa Ananias: “No ta hende bo a gaña, sino Dios!” Anto Ananias a cay abou muri. Despues di mas o menos tres ora, su casa Safira a cana drenta. Sin sa kico a pasa cu su casa, e tambe a gaña y a cay abou muri.

Ki un bon les esaki ta pa nos: Ta importante pa papia berdad! Si, nos tur tin cu siña e les aki! Ma nos tur sa faya, specialmente ora nos ta jong. Bo no ta contento cu Jehova stima bo y cu e ta pordona bo mescos cu el a pordona Pedro?— Pero corda, nos tin cu papia e berdad si. Y si un dia nos comete e fayo grandi di gaña, nos mester pidi Dios pa e pordona nos. Sin duda, esey ta loke Pedro a haci, y Dios a pordon’e. Pues, si nos ta haci esfuerso pa no gaña mas, Dios lo pordona nos tambe!!