BO TABATA SA?

Dicon un profeta a yama antiguo Ninive “e stad tur na sanger”?

Ninive tabata e capital di e Imperio Asirio. E stad poderoso aki tabatin palacio- y tempelnan impresionante, cayanan hancho y murayanan inmenso. Sinembargo, e profeta Hebreo Nahum a describie como “e stad tur na sanger.”—Nahum 3:1.

E descripcion ey ta cuadra cu realidad! E esculturanan di e palacio di Senakerib di antiguo Ninive ta confirma cu en berdad e Asirionan tabata hopi cruel. Un di nan ta mustra con nan tabata tene un preso abou na suela pa ranca su lenga kita afo. Inscripcionnan ta conta cu nan tabata pasa haak mara na cabuya den nanishi y lip di e presonan pa asina controla nan. Anto e presonan cu tabatin un funcion halto, nan tabata obliga nan colga cabesnan decapita di nan reynan manera un cadena rond di nan garganta, loke tabata un bista hororoso.

Archibald Henry Sayce, kende a studia arkeologia Asirio, a describi e cosnan horibel cu tabata tuma luga despues cu e Asirionan a captura un stad: “Tur caminda cu nan a pasa, nan tabata laga sero di cabes decapita; nan tabata kima mucha homber y mucha muher bibo of reserva nan pa cosnan mas pio; nan tabata claba hende homber na staca, soya nan na bida, saca nan wowo afo of kap sea nan man y pia of horea y nanishi kita afo.”

Dicon e Hudiunan tabatin cu traha un proteccion na rand di nan dak di cas?

Na Deuteronomio 22:8, Dios a duna e Hudiunan e siguiente instruccion: “Ora bo traha un cas nobo, traha un rand [of, muraya] na bo dak, pa bo no trece culpa di sanger riba bo cas, si un hende cay for di dje.” Esaki tabata un medida di siguridad pa famianan Hudiu ya cu nan tabata uza nan dak di cas hopi.

Mayoria di cas na Israel tabatin dak plat. Eyriba tabata un bon luga pa sinta un rato den solo, disfruta di aire fresco of haci algun trabou di cas. Den zomer, e tabata un dushi luga pa drumi. (1 Samuel 9:26) Cunukero tabata uza nan dak pa seca lino, figo, druif of grano prome cu mul’e.—Josue 2:6.

Ademas, nan tabata uza nan dak pa adora sea e Dios berdadero of dios falso. (Nehemias 8:16-18; Jeremias 19:13) Apostel Pedro a subi riba dak 12 or di merdia pa haci oracion. (Echonan 10:9-16) Si riba un dak di cas tabatin un pida afdak cubri cu mata di wendruif of rama di palma, lo e tabata un luga trankil y agradabel pa sosega un rato.

E publicacion The Land and the Book ta bisa cu e trapi cu e Hudiunan tabata uza pa subi bay riba dak di nan cas tabata “parti pafo di e cas, pero den cura.” Pues, un doño di cas por a baha for di su dak sin tabatin nodo di drenta cas. Esaki ta yuda nos compronde e spiertamento cu Hesus a duna tocante e urgencia pa huy for di un stad condena na destruccion: “E homber cu ta riba dak no mester baha abou pa saca e cosnan cu ta den su cas.”—Mateo 24:17.