Cinco Decada den Sirbishi di Tempo Completo na Finlandia

NOS a lanta na un boerderij na Noord Ostro­bothnia, Finlandia, den un famia di dies yiu. Nos tabata mucha ora Segundo Guera Mundial a cuminsa. Aunke nos tabata biba cientos di kilometer leu di e campo di bataya, e echo cu nos tabata sa cu otro hende tabata sufri a afecta nos profundamente. E anochi cu nan a bombardia Oulu y Kalajoki, dos stad den bisindario, nos a mira con cielo a bira cora cora. Nos mayornan a bisa nos pa core sconde ora nos mira avionnan di guera. Pesey, ora Tauno, nos ruman homber mas grandi, a conta nos di un paradijs aki riba tera, caminda lo no tin inhusticia, nos tabata kier sa mas.

Tempo cu Tauno tabatin 14 aña di edad, el a haya e berdad via e bukinan di e Studiantenan di Bijbel. Ora Segundo Guera Mundial a cuminsa, el a nenga di drenta servicio militar debi cu su consenshi biblicamente entrena no a permitie haci esey. Pesey, nan a ser’e den prizon, caminda nan a trat’e cruelmente. Pero esey a haci su fe den Jehova hasta mas fuerte. Despues cu el a sali liber, el a dicidi di haci mas den sirbishi. E excelente ehempel cu nos ruman homber a pone a encurasha nos pa asisti na e reunionnan di Testigonan di Jehova, cu tabata tuma luga den un bario no mucho leu for di esun di nos. Nos tabata asisti na e congresonan tambe aunke nos tabatin cu traha duro pa spaar suficiente placa pa e biahe. Nos tabata planta siboyo, piki beishi (bessen) y tambe cose paña pa nos bisiñanan. Pero como cu nos tabatin hopi cos di haci na nos boerderij, nos no por a bay congreso hunto, pero nos tabata bay apart.

Loke nos a siña tocante Jehova y su propositonan a pone nos stim’e mas, y nos a dicidi di dedica nos bida na dje. Na aña 1947, nos tur dos a batisa como simbolo di nos dedicacion na Jehova (Annikki tabatin 15 aña di edad y Aili 17). Nos ruman muher Saimi tambe a batisa e mesun aña ey. Nos a studia Bijbel cu nos ruman muher Linnea tambe, kende e tempo ey tabata casa caba. E cu su famia tambe a bira Testigo di Jehova. Despues cu nos a batisa, nos a pone como meta pa, de bes en cuando, nos traha pionero di vakantie (auxiliar).

NOS A DRENTA SIRBISHI DI TEMPO COMPLETO

Na aña 1955, nos a muda bay Kemi, un stad cu ta keda mas panort. Maske nos tur dos tabata traha full-time, nos tabatin deseo pa bira pionero. Pero nos tabata duda cu nos lo por a cubri nos gastonan si nos a traha menos; nos tabata pensa cu ta mihor nos spaar poco placa prome. Ta e tempo ey, nos tabatin e combersacion cu e ruman muher cu nos a menciona na principio. E combersacion ey a yuda nos compronde cu no ta nos recursonan ni sosten di nos famia mester determina si nos ta sirbi Jehova tempo completo; mas bien, cu nos mester confia den nos Tata celestial. Esey ta e cos di mas importante.

E tempo ey, nos tabatin suficiente placa gespaar cu nos por a cubri nos gastonan pa dos luna. Pesey, na mei 1957, maske nos tabata duda un poco, nos a aplica pa traha pionero dos luna na Pello, Lapland, Finlandia. Despues di dos luna, ainda nos tabatin tur e placa cu nos a spaar. Pues, nos a bolbe aplica pa dos luna mas. Despues di e dos lunanan ey, ainda nos tabatin tur e placa. E ora ey si, nos tabata sigur cu Jehova lo a percura pa nos. Anto despues di a traha pionero durante 50 aña, ainda nos tin e placa cu nos a spaar! Ora nos wak bek, nos por bisa cu ta comosifuera Jehova a tene nos man y bisa nos: “No tene miedo, lo mi yuda bo.”​—⁠Isa. 41:⁠13.

Na 1958, nos superintendente di circuito a anima nos pa muda bay Sodankylä, Lapland, pa nos sirbi eynan como pionero special. E tempo ey, tabatin solamente un Testigo, un ruman muher, den e area ey. E ruman aki a haya e berdad na un manera masha impresionante. Su yiu homber a bay un excursion cu scol y a bishita Helsinki, e capital di Finlandia. Ora nan tabata keiro den e stad, un ruman muher di edad avansa a dun’e un Toren di Vigilancia y a bis’e pa e duna su mama. Ora su mama a lesa e revista, di biaha el a compronde cu e revista aki ta siña hende e berdad.

Nos a huur un apartamento cu tabata situa riba un luga di corta palo. Eynan, nos tabata tene nos reunionnan tambe. Na cuminsamento, ta e ruman muher y su yiu muher y nos dos so tabata asisti na esakinan. Tur siman, nos tabata gewoon lesa e informacion programa pa e siman ey. Cu tempo, un homber cu a yega di studia Bijbel cu Testigonan di Jehova a bin traha na e fabrica. E cu su famia tambe a cuminsa asisti na nos reunionnan, y cu tempo, e cu su esposa a batisa. Porfin, nos a haya un ruman homber pa dirigi nos reunionnan. Algun otro homber cu tabata traha na e fabrica a cuminsa asisti na nos reunionnan, y nan tambe a bira Testigo. Despues di un par di aña, nos grupo a crece y bira un congregacion.

NO TABATA FACIL PA PREDICA

Nos tabatin cu biaha distancianan largo pa bay predica. Den zomer, nos tabatin cu cana, core bais y hasta uza boto cu nos mes mester a rema pa haya hende den nos teritorio. Principalmente nos baisnan a yuda nos bon. Ta riba bais nos tabata bay congreso y bishita nos mayornan cu tabata biba cientos di kilometer leu. Den winter, nos tabata coy bus mainta trempan pa bay un pueblo y cana predica di cas pa cas. Ora nos caba di bishita tur e casnan den e stad, nos tabata cana bay e siguiente stad. Tin ora e camindanan tabata cubri cu sneeuw. Nos tabata purba di cana caminda slee cu cabay tabata lastra a pasa. Pero tin ora sneeuw tabata bolbe cay y tapa e camindanan atrobe. Y na comienso di lente, e sneeuw tabata dirti y pone cu e camindanan tabata keda asina muha cu hende mester a cana cu cuidou.

Debi na e frialdad y e sneeuw cu tabata cay, nos tabatin cu bisti bon contra friu. Nos tabata bisti legging di wol diki, dos of tres mea riba otro y boots. Asina mes, hopi biaha nos bootsnan tabata yen yen di sneeuw. Ora nos yega na trapi di un cas, nos tabata kita nos bootsnan y sacudi nan pa saca sneeuw. E zom di nos jasnan largo di winter tambe tabata muha debi cu nan tabata lastra den ­sneeuw. Y si a bira mas friu, nan tabata vries y bira duro manera metal. Un doño di cas a yega di bisa nos: ‘Boso mester tin un fe fuerte cu boso ta cana predica den e weer aki.’ Nos a cana mas cu 11 kilometer pa yega na cas di e señora ey.

Debi na e distancianan largo, hopi biaha nos tabata pasa anochi cerca e hendenan den e stadnan. Ora solo cuminsa baha, nos tabata puntra e hendenan si nos por a pasa anochi cerca nan. E casnan tabata humilde y e hendenan tabata masha cariñoso y hospitalario. Nan tabata laga nos pasa anochi cerca nan y tabata ofrece nos cos di come. Hopi biaha, nos tabata drumi abou riba cuero di bestia, sea di reno (rendier), bina grandi of hasta di beer. Tabatin biaha cu nos por a disfruta di e luho di drumi den un camber di huesped. Por ehempel, un biaha, un señora cu tabata biba den un cas grandi a laga nos keda ariba den un camber di huesped cu paña di cama blanco, masha bunita mes. Hopi biaha, nos tabata duna testimonio na e doñonan di cas te anochi laat. Un biaha, un pareha a laga nos drumi den nan camber hunto cu nan; nos a drumi un banda di e camber y nan e otro banda. Henter anochi e meneer cu su esposa a keda haci nos pregunta tocante Bijbel y nos a keda combersa te marduga.

NOS SIRBISHI A DUNA FRUTA

Lapland ta un luga infertil pero masha bunita; cada temporada, e ta diferente. Pero pa nos, e hendenan cu a acepta pa siña tocante Jehova ta mas precioso ainda. Entre e hendenan sincero cu nos a predica na dje tabatin hombernan cu a muda bin Lapland pa kap palo. Tin biaha, ora nos, dos ruman muher curpa chikito, a drenta un cas chikito, nos tabata topa yen di nan paden. E hombernan curpa grandi aki tabata aprecia e mensahe di Bijbel, y nan tabata acepta nos revistanan cu mucho gusto.

Nos a haya hopi experencia bunita. Tabatin un biaha cu e holoshi na stacion di bus tabata cinco minuut dilanti, y nos a perde nos bus. Pesey, nos a dicidi di coy un otro bus y bay un otro pueblo caminda nunca prome nos no a yega di predica. Na e prome cas, nos a topa un mucha muher cu a bisa nos: ‘Porfin boso a bin! Mi tabata spera boso bishita.’ Nos tabata studia Bijbel cu su ruman muher grandi y el a pidi su ruman grandi pa bisa nos bishit’e e dia ey. Pero nos no a ricibi su rospondi. Nos a cuminsa studia Bijbel cu ne y tambe cu algun famia di dje cu tabata biba den un cas cu tabata keda eybanda mes. No a dura hopi cu nos a cuminsa studia cu nan tur hunto, esta un diesdos persona. Desde e tempo ey, hopi miembro di e famia aki a bira Testigo di Jehova.

Na 1965, nos a haya e asignacion pa bay sirbi na Kuusamo, mas abou di e Circulo Polar, den e congregacion cu nos ta awor. E tempo ey, e congregacion tabata consisti di algun publicador so. Na principio, a parce cu tabata dificil pa traha den e teritorio ey. E hendenan tabata masha religioso, y nan no tabata gusta nos trabou. Pero di otro banda, hopi di nan tabatin respet pa Bijbel, y esaki a habri caminda pa nos combersa cu nan. Gradualmente, nos tabata purba di conoce e hendenan. Despues di dos aña, tabata mas facil pa cuminsa estudio di Bijbel.

AINDA NOS TA ACTIVO DEN SIRBISHI

Awendia, nos no tin e energia cu nos tabatin antes pa traha hopi den sirbishi. Pero nos ta haci nos esfuerso pa sali den sirbishi casi tur dia. Awor ta mas facil pa nos predica den e teritorio grandi aki, pasobra Aili por core auto. Ta Tauno su yiu homber a anim’e pa siña core auto, y na 1987, na edad di 56 aña, el a haya su rijbewijs. Loke ta yuda nos tambe ta e echo cu awor nos ta biba den un apartamento cu ta parti di nos Salon di Reino nobo.

Nos ta masha contento cu hopi hende a acepta e berdad den e parti noord di Finlandia. Na prome instante, ora nos a cuminsa traha pionero akinan, no tabatin hopi publicador. Pero awor, tin un circuito cu varios congregacion. Hopi biaha a yega di sosode cu na asamblea of congreso, nos ta topa cu hende cu ta introduci nan mes y puntra nos si nos ta corda nan. Algun di nan ta bisa cu tempo nan tabata chikito, nos tabata studia Bijbel cu nan famia. Pues, simianan cu a ser sembra hopi aña pasa of kisas decadanan prome a duna fruta!​—⁠1 Cor. 3:⁠6.

Na 2008, nos a haci 50 aña ta sirbi como pionero special. Nos ta gradici Jehova cu nos por a encurasha otro pa sigui persevera den e bunita trabou aki. Nos a hiba un bida simpel, pero nunca nos no tabata falta nada. (Sal. 23:⁠1) Pues, awor nos sa cu nos no mester a preocupa ora nos a cuminsa traha pionero! A traves di tur e añanan aki, Jehova a fortalece nos manera el a priminti na Isaias 41:⁠10: “Lo mi fortalece bo, si, lo mi yuda bo, si, lo mi sostene bo cu mi man drechi di husticia.”