Desaster Natural Ta Proba Cu Dios Ta Cruel?

LOKE HENDE SA BISA: “Ta Dios ta causa desaster natural pasobra t’e ta goberna mundo; pesey, lo e mester ta hopi cruel.”

LOKE BIJBEL TA BISA: “Henter mundo ta den poder di e Malbado.” (1 Juan 5:19) Ken ta “e Malbado” aki? Bijbel ta yam’e Satanas. (Mateo 13:19; Marco 4:15) Esey ta un idea absurdo? Pensa riba esaki: Si Satanas tin mundo den su poder, e ta influencia hende pa ta mesun egoista, golos y incapaz pa mira futuro cu ne. Esey no ta splica dicon hende ta daña e medio ambiente? Hopi experto ta adverti cu daño na e medio ambiente por sea causa desaster natural, haci e efectonan mas devastador y haci hende mas vulnerabel pa nan.

Pero dicon Dios a permiti Satanas tin asina tanto influencia? Pa contesta e pregunta ey nos tin cu bay bek na comienso di historia humano, ora nos prome mayornan a rechasa Dios como nan gobernante. For di e tempo ey padilanti gran parti di humanidad a sigui e mesun pasonan, esta, rechasa e gobernacion di Dios. Esaki a pone humanidad den gara di Satanas, e enemigo di Dios. Cu rason berdad Hesus a bisa cu Satanas ta “e gobernante di mundo.” (Juan 14:30) Satanas lo goberna pa semper? No!

Jehova,a di su parti, no ta cera wowo pa e sufrimento cu Satanas ta causa. Al contrario, wak kico Bijbel ta bisa di Dios ora e nacion di Israel tabata pasa den temponan dificil: “Den tur nan afliccion e tabata afligi.” (Isaias 63:9) Den su gran misericordia, Dios a dicidi di caba cu e gobernacion cruel di Satanas, y lo e haci esey pronto! Ya caba, el a nombra su Yiu, Hesucristo, pa ta un Rey husto pa semper.

KICO ESAKI TA NIFICA PA ABO? Satanas no a proteha hende di e efectonan di desaster natural, pero Hesus si lo haci esaki. Tempo cu Hesus tabata riba tera, el a proteha su discipelnan di un tormenta fuerte. E relato biblico ta bisa: “[El] a scual biento y a bisa lama: ‘Silencio! Keda keto!’ Y biento a baha y a calma completamente.” E discipelnan a bisa otro: “Ta ken esaki ta anto? Pasobra hasta biento y lama ta obedec’e!” (Marco 4:37-41) E suceso ey ta duna nos e confianza cu Hesus lo proteha henter humanidad obediente durante su reinado.—Daniel 7:13, 14.