Un famia ta wak un bario cu a keda destrui pa desaster natural

Kico Bijbel Ta Bisa Tocante Desaster Natural?

Loke Bijbel ta bisa

No ta Dios ta causa desaster natural cu ta tuma luga awendia, pero e ta preocupa si pa hende cu a bira victima di desaster natural. E Reino di Dios lo elimina sufrimento cu desaster natural ta causa. Mientrastanto, Dios ta consola hende cu ta sufri debi na e efectonan di desaster natural.—2 Corintionan 1:3.

Dicon nos por tin sigur cu desaster natural no ta castigo di Dios?

Den Bijbel nos ta lesa con Dios ta uza forsanan di naturaleza. Pero desaster natural ta diferente. Con asina?

Desaster natural ta afecta tur tipo di hende. En cambio, Bijbel ta mustra cu ora Dios a uza forsa di naturaleza pa castiga hende, ta mal hende so a muri. Por ehempel, ora Dios a destrui e stadnan antiguo di Sodoma y Gomora, el a salba e homber husto Lot y su dos yiu muhernan. (Genesis 19:29, 30) Dios a lesa curason di hende cu a biba den e tempo ey y a caba cu mal hende so.—Genesis 18:23-32; 1 Samuel 16:7.
Desaster natural sa bin diripiente of cu masha poco previo aviso. Sinembargo, Dios a spierta mal hende prome cu el a uza forsa di naturaleza contra nan. E hendenan cu a haci caso di e spiertamento tabatin oportunidad pa scapa calamidad.—Genesis 7:1-5; Mateo 24:38, 39.
Te na cierto grado, hende mes a contribui na desaster natural. Con? Hende a haci daño na medioambiente y a construi den area caminda sa tin temblor, inundacion y clima severo. (Revelacion 11:18) Dios no ta culpabel pa e consecuencia di e decisionnan ey.—Proverbionan 19:3.

Desaster natural ta proba cu nos ta biba den e ultimo dianan?

Si, Bijbel ta profetisa cu lo tin desaster natural durante “conclusion di e era aki”, esta “den e ultimo dianan.” (Mateo 24:3; 2 Timoteo 3:1) Por ehempel, ora Hesus a referi na nos tempo, el a bisa: “Lo tin scarsedad di cuminda y temblor den un luga tras di otro.” (Mateo 24:7) Pronto, Dios lo elimina tur cos cu ta causa dolor y sufrimento, incluso desaster natural.—Revelacion 21:3, 4.

Den ki manera Dios ta yuda victima di desaster natural?

Dios ta consola victima mediante su Palabra, Bijbel. Bijbel ta sigura nos cu Dios ta interesa den nos y cu e ta sinti nos dolor ora nos ta sufri. (Isaias 63:9; 1 Pedro 5:6, 7) Ademas, Bijbel ta priminti cu den futuro lo no tin desaster natural mas.—Wak “Texto di Bijbel cu por consola victima di desaster natural.”
Dios ta yuda victima mediante su sirbidornan. Dios ta uza su sirbidornan riba Tera pa imita e ehempel di Hesus. E profecianan ta bisa cu Hesus lo a consola “hende di curason kibra” y “tur esnan cu ta yora.” (Isaias 61:1, 2) E sirbidornan di Dios ta haci esfuerso pa haci mescos.—Juan 13:15.

Dios ta uza su sirbidornan tambe pa duna yudansa practico na victima di desaster natural.—Echonan 11:28-30; Galationan 6:10.

Testigonan di Jehova ta drecha un cas na Puerto Rico — Testigonan di Jehova ta duna yudansa practico na victima di horcan na Puerto Rico

Bijbel por yuda nos pa ta prepara pa desaster natural?

Si. Aunke Bijbel no ta un manual pa prepara nos pa desaster natural, e ta contene principio cu por yuda nos. Por ehempel:

Plania di antemano pa posibel calamidad. Bijbel ta bisa: “Un hende prudente ta mira maldad y ta sconde.” (Proverbionan 22:3) Ta sabi pa nos traha un plan di emergencia di adelanta. E plan ey por inclui prepara un tas di emergencia cu ta cla pa hiba den caso di calamidad y repasa cu nos famia unda ta bay topa ora un desaster sosode.
Corda cu bida ta mas importante cu cos material. Bijbel ta bisa: “Nos no a bin cu nada na mundo, y nos no por bay cu nada tampoco.” (1 Timoteo 6:7, 8) Nos mester ta dispuesto pa laga nos cas y pertenencianan atras pa por scapa di un calamidad. Corda cu nos bida ta mas importante cu cualkier cos material.—Mateo 6:25.

Texto di Bijbel cu por consola victima di desaster natural

Genesis 18:25: “Cu esey keda leu di [Dios] pa haci un cos asina, esta, mata e husto hunto cu e malbado ... E Hues di henter mundo lo no haci husticia?”

Nificacion: Dios semper ta haci loke ta bon; no ta Dios su falta ora bon hende ta muri den desaster natural.

Salmo 46:1, 2: “Dios ta nos refugio y fortaleza, un pronto auxilio den tempo di angustia. Pesey nos lo no tin miedo, maske Tera kita for di su luga.”

Nificacion: Sin importa kico ta pasa rond di nos, nos por confia cu Dios lo yuda nos keda fuerte

Isaias 63:9: “Den tur nan afliccion [Dios] tabata afligi.”

Nificacion: Dios tin empatia; e ta sinti pa nos ora nos ta sufri.

Juan 5:28, 29: “Lo yega e ora cu tur esnan cu ta den graf lo tende [Hesus] su stem y lo sali afo.”

Nificacion: Nos tin e speransa di bolbe mira nos sernan keri cu a muri, pasobra Dios lo duna Hesus poder pa resucita nan for di morto.

1 Pedro 5:6, 7: “Humilia boso mes anto bou di e man poderoso di Dios ... mientras cu boso ta tira tur boso inkietud riba dje, pasobra e ta interesa den boso.”

Nificacion: Dios ta hopi interesa den nos y kier pa nos cont’e nos preocupacion den oracion.

Revelacion 21:4: “[Dios lo] seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”

Nificacion: Dios lo caba cu tur cos cu ta causa sufrimento, incluso desaster natural.