Ta Castigo di Dios?
“Ta duel mi masha pa e victimanan di e desaster, pero ami ta kere [cu esaki] ta tembatsu (castigo di Dios).” Esey ta loke un lider politico Japones a bisa despues cu un temblor di un magnitud di 9,0 y un tsunami a asota Japon na maart 2011.
Despues di e temblor cu a tuma luga na Haiti na januari 2010 y cu a causa morto di mas cu 220.000 hende, un televangelista famoso a bisa cu esey tabata pasobra Haiti a “cera un pacto cu Diabel” y cu Haitianonan mester “comberti” y sirbi Dios.
“Dios kier rebiba nos consenshi sin gevoel cu a cria cayo.” Esey ta loke un pastoor catolico a bisa despues di e tragedia cu a tuma luga na Manila, Filipinas, caminda 79 hende a muri ora un multitud a drenta panico y a cuminsa core pa loco. Un corant di e pais a raporta cu ‘21 porciento di adulto ta kere cu avalancha di lodo, tifon y otro desasternan natural cu constantemente ta asota nan pais ta medionan cu Dios ta uza pa expresa su rabia.’
E CREENCIA cu Dios ta uza desaster natural pa castiga hende malbado no ta nada nobo. Por ehempel, na aña 1755, despues cu 60.000 y pico hende a muri na Lisboa, Portugal, den un temblor, un candela y un tsunami, Voltaire, un filosofo bon conoci, a puntra: “Acaso tin mas maldad na Lisboa cu na Paris, un luga caminda hopi hende ta hiba un bida masha inmoral?” Si, miyones di hende ta puntra nan mes si Dios ta uza desaster natural pa castiga hende. De echo, den hopi pais, hende ta bisa cu desaster natural ta obra di Dios.
En bista di tur esaki, e pregunta ta lanta: ‘Di berdad Dios ta uza desaster natural pa castiga hende? E tantisimo desasternan cu ta tuma luga e ultimo temponan aki ta castigo di Dios?’
Den nan afan pa culpa Dios, algun hende ta referi na relatonan di Bijbel caminda Dios a uza forsa di naturalesa pa trece destruccion. (Genesis 7:17-22; 18:20; 19:24, 25; Numbernan 16:31-35) Pero un analisis profundo di e relatonan aki ta mustra cu den cada un di e casonan ey tabatin tres factor determinante. Pa di prome, Dios a spierta hende prome cu el a actua. Di dos, distinto for di e desasternan natural djawe cu ta mata tanto bon hende como mal hende, destruccion causa pa Dios semper tabata selectivo. Ta solamente esnan cu no kier a bira di nan mal caminda of esnan cu a nenga di haci caso di Dios su spiertamento a ser destrui. Di tres, Dios a percura un manera pa hende inocente scapa.—Genesis 7:1, 23; 19:15-17; Numbernan 16:23-27.
No tin evidencia cu ta Dios ta causa e cantidad incontabel di desaster cu ta afecta bida di miyones di hende awe. Kico anto ta e causa di e desasternan natural cu aparentemente ta aumentando dia pa dia? Lo yega e dia cu lo no tin desaster mas? E siguiente articulonan lo contesta e preguntanan ey.