Lo Bo Confia den Dios?

SUPONE cu un amigo cu bo ta admira masha hopi mes ta haci algo cu bo no ta compronde. Algun hende ta critica su accion, duda den su intencionnan y bisa cu e ta cruel. Lo bo bay di acuerdo mesora cu nan, of lo bo kier scucha e version di bo amigo prome? Si e no t’ey pa splica su motibonan, lo bo warda cu pasenshi y dun’e beneficio di duda?

Prome cu tur cos, lo ta bon pa bo puntra bo mes: ‘Con bon mi conoce mi amigo? Dicon mi ta admir’e?’ Esey lo ta husto, no ta berdad? Nos no por haci mescos ora nos ta analisa e pregunta, si Dios ta cruel?

Podise bo ta haya cu ta dificil pa compronde algun di e cosnan cu Dios a haci of permiti. Hopi hende lo bisa bo cu e ta cruel y nan por presiona bo pa bo tambe cuestiona su intencionnan. Lo bo dun’e beneficio di duda te ora bo sa mas di e asunto? Esey lo depende hopi di con bon bo conoce Dios. Puntra bo mes: ‘Ki clase di amigo Dios ta pa ami?’

Si bo tin un bida duro, kisas lo bo bisa cu Dios no ta bo amigo mes. Pero pensa un rato: Dios ta responsabel pa e problemanan cu bo tin, of pa e bon cosnan den bo bida? Manera nos a mira caba, “e gobernante di e mundo aki” ta Satanas. (Juan 12:31) Pues, ta e nos tin cu culpa pa hopi di e miseria y inhusticia cu tin den e mundo aki. Y bo no ta di acuerdo cu gran parti di nos problemanan ta debi na nos imperfeccion y circunstancianan imprevisto den bida?

En cambio, kico Dios a haci? Bijbel ta bisa cu el “a traha cielo y tera”; cu su obranan ta inclui e curpa humano, crea na un manera “maraviyoso”, y cu Jehova ta e Dios “den kende su man [nos] rosea di bida ta.” (Salmo 124:8; 139:14; Daniel 5:23) Kico tur esaki ta nifica?

Esaki ta nifica cu ta danki na nos Creador, nos tin rosea y bida. (Echonan 17:28) E ta nifica tambe cu tur e cosnan bunita rond di nos, e echo cu nos por stima y cera amistad y e goso di por purba, mishi, tende y hole, si, tur e cosnan aki, ta regalo di Dios. (Santiago 1:17) Bo no ta di acuerdo cu tur e cosnan bon ey ta haci Dios un Amigo cu merece nos cariño y confianza?

Pero podise te ainda bo ta haya cu ta dificil pa bo confia den Dios. Kisas bo ta pensa cu bo no conoc’e suficiente. Esey ta comprendibel. Den e articulonan cortico aki nos no por trata tur e motibonan dicon algun hende ta haya cu Dios ta cruel. Pero no ta bale la pena haci esfuerso pa siña conoce Dios mihor?a Bo por ta sigur cu si bo siña conoce Dios, lo bo siña e berdad tocante dje. Dios no ta cruel. Al contrario: “Dios ta amor.”—1 Juan 4:8.