Dicon Algun Hende Ta Bisa Cu Dios Ta Cruel?

KICO bo ta pensa di e pregunta riba portada di e revista aki? Awe, mas y mas hende ta haci nan mes e pregunta ey of hasta a yega na e conclusion cu Dios ta cruel.

Por ehempel, algun sobreviviente di desaster natural ta puntra nan mes: “Dicon Dios ta permiti e cosnan aki sosode? E no ta interesa den nos? Asina cruel e ta?”

Tin otro hende ta keda sorprendi ora nan lesa cierto relatonan den Bijbel, manera por ehempel e Diluvio di tempo di Noe. Nan ta puntra nan mes: ‘Con un Dios di amor por a mata asina tanto hende? Ta asina cruel e ta?’

Abo tambe a yega di puntra bo mes esey? Bo tin problema pa rasona cu un hende cu ta puntra su mes si Dios ta cruel? Sea cual sea e caso, lo ta bon pa analisa e siguiente pregunta.

DICON NOS TA ODIA CRUELDAD?

Esey ta pasobra nos tin un sentido di bon y malo. Den e aspecto aki nos ta masha diferente for di bestia, ya cu nos Creador a traha nos den ‘su imagen.’ (Genesis 1:27) Cu otro palabra, Dios a duna nos e capacidad pa refleha su cualidad- y normanan moral, esta, su sentido di bon y malo. Awor pensa riba esaki: Si nos a haya e sentido ey for di Dios y pesey ta odia loke ta cruel, esey no ta proba cu Dios tambe ta odia crueldad?

E conclusion logico aki ta cuadra tambe cu loke Dios ta bisa di su mes den su Palabra: “Mi camindanan ta mas halto cu boso camindanan, y mi pensamentonan mas halto cu boso pensamentonan.” (Isaias 55:9) Awor si nos ta haya cu Dios ta cruel, nos no ta bisando net lo contrario, esta, cu nos camindanan ta mas halto cu esun di Dios? Pero prome cu nos yega na e conclusion ey, lo ta bon pa nos haya mas prueba. Pesey, en bes di puntra nos mes si Dios ta cruel, kisas nos tin cu puntra nos mes kico ta duna nos e impresion cu e ta cruel. Laga nos analisa kico kiermen ser cruel.

Ora nos bisa cu un hende ta cruel, de echo nos ta husgando su intencionnan. Un persona cruel gusta mira otro hende sufri y no ta sinti duele ora e mira sufrimento. Por ehempel, un tata cu ta disciplina su yiu pasobra e gusta mir’e sufri ta un tata cruel. Ma si e ta disciplina su yiu pa e educ’e y proteh’e, nos ta haya cu e ta un bon tata. Pues, si nos no sa dicon un persona ta actua di un cierto manera, ta facil pa malinterpreta su intencionnan.

Teniendo cuenta cu esey, ban analisa e dos motibonan cu ta pone algun hende bisa cu Dios ta cruel. Nan ta e desasternan natural cu nos ta mira awe y e huicionan di Dios menciona den Bijbel. Echonan realmente ta mustra cu Dios ta cruel?