Jehova Ta Leal y Cla pa Pordona

1, 2. (a) Dicon nos kier amigonan cu ta leal y cu ta cla pa pordona? (b) Ki preguntanan e articulo aki lo contesta?

KI ORA nos por bisa cu un persona ta un bon amigo? Un ruman muher cu yama Ashley a bisa: “Pa ami, un bon amigo ta un hende cu semper t’ey pa bo y cu ta cla pa pordona bo ora bo comete un eror.” Nos tur kier tin amigonan leal y cu ta cla pa pordona. Nan ta laga nos sinti nos bon pasobra nos sa cu nan ta stima nos y t’ey pa nos.—Prov. 17:17, NW.

² Jehova ta e Amigo di mas leal cu un hende por tin y e ta mas dispuesto pa pordona cu tur otro persona. Ta manera e salmista a bisa: “Abo, Señor, ta bon, y cla pa pordona, y abundante den misericordia [of, “amor leal”] pa tur esnan cu ta sclama na bo.” (Sal. 86:5) Kico ta nifica ser leal y cla pa pordona? Con Jehova ta desplega e bunita cualidadnan aki? Y con nos por sigui su ehempel? E contestanan pa e preguntanan aki lo motiva nos pa stima Jehova, nos mihor Amigo, mas y mas y fortalece nos lasonan di amistad cu otronan.—1 Juan 4:7, 8.

JEHOVA TA LEAL

3. Kico ta nifica ser leal?

³ Un persona leal ta fiel na e personanan cu e ta stima. E ta demostra su amor yudando y sosteniendo nan continuamente. Y e no ta haci esey ora cos ta bon so sino den tempo dificil tambe. Bijbel ta describi Jehova como e “Dios leal.” No ta existi un persona mas leal cu Jehova.—Rev. 16:5.

4, 5. (a) Con Jehova ta demostra su lealtad? (b) Dicon nos ta sinti nos anima ora nos reflexiona riba e manera cu Jehova ta demostra lealtad?

⁴ Con Jehova ta demostra su lealtad? Wel, nunca e ta bandona su fiel sirbidornan. Rey David, kende tabata un fiel sirbidor di Jehova, a confirma cu Jehova ta leal ora el a bisa: “Bo ta fiel pa esun cu ta fiel.” (2 Sam. 22:26, BPK) Jehova a guia y a proteha David lealmente durante e situacionnan dificil cu el a hay’e cu ne y a libr’e for di esakinan. (2 Sam. 22:1) Si, experencia di bida a yuda David mira cu Jehova ta leal, no solamente cu palabra pero cu echo tambe. Pero dicon Jehova tabata leal na David? Pasobra David tambe tabata leal na dje. Y Jehova ta stima su sirbidornan pasobra nan ta leal, y e, na su turno, ta mustra lealtad na nan.—Prov. 2:6-8.

⁵ Ora nos reflexiona riba e manera cu Jehova ta demostra lealtad, nos ta sinti nos anima. Un ruman homber fiel cu yama Reed a bisa cu e ta gusta lesa e relatonan cu ta mustra con Jehova a yuda David den tempo di angustia. El a bisa: ‘Hasta ora David tabata huy di un cueba pa otro pa scapa su bida, Jehova semper a sostene. Esey ta anima mi hopi y ta yuda mi corda cu si mi ta leal na Jehova, lo e t’ey pa sostene mi den ki situacion cu mi haya mi, maske con dificil esaki por ta.’ Sigur bo tambe ta sinti mescos.—Rom. 8:38, 39.

6. Den ki maneranan Jehova ta demostra su lealtad, y con esaki ta beneficia su sirbidornan?

⁶ Den ki otro maneranan Jehova ta demostra lealtad? Wel, un manera cu e ta haci esey ta cumpliendo cu e normanan cu el a establece. E ta sigura nos: “Te na boso biehes ami lo ta mescos.” (Isa. 46:4) Tur decision cu Jehova tuma ta basa riba su normanan di loke ta bon y malo. Y su normanan nunca ta cambia. (Mal. 3:6) Un otro manera cu Jehova ta mustra lealtad ta cumpliendo cu loke el a priminti. (Isa. 55:11) Pues, e echo cu Jehova ta leal ta beneficia tur su fiel sirbidornan. Con asina? Wel, ora nos ta haci nos best pa obedece Jehova su leynan, nos por tin confianza cu lo e bendiciona nos manera el a priminti.—Isa. 48:17, 18.

SEA LEAL, MESCOS CU JEHOVA

7. Cua ta un manera cu nos por imita Dios su lealtad?

⁷ Con nos por ta leal, mescos cu Jehova? Un manera ta di yuda hende cu ta den situacion dificil. (Prov. 3:27) Por ehempel, bo sa di un ruman cu ta desanima, kisas pa motibo di problema cu salud, oposicion di famia of debi na debilidad cu e ta lucha cu ne? Pakico no tuma iniciativa pa anim’e y consol’e cu algun palabra bon scogi? (Zac. 1:13)a Si bo haci esey, bo ta demostra cu bo ta un amigo leal, un berdadero amigo “cu ta mas pega cu un ruman.”—Prov. 18:24.

8. Con nos por imita e lealtad di Jehova den matrimonio y den otro areanan di bida?

⁸ Tin mas manera cu nos por imita e lealtad di Jehova. Un otro manera ta di keda leal na esnan cu nos ta stima. Por ehempel, si nos ta casa, nos sa cu nos tin cu keda fiel na nos casa. (Prov. 5:15-18) Pesey, nos no ta comete adulterio y ta evita tur loke cu por hiba nos na adulterio. (Mat. 5:28) Nos ta mustra lealtad na nos rumannan den fe tambe. Con asina? Nos ta evita di papia malo di nan of di plama mentira riba nan. Nos ta nenga hasta di scucha combersacionnan asina.—Prov. 12:18.

9, 10. (a) Na ken specialmente nos mester ta leal? (b) Dicon tin biaha no ta facil pa obedece e mandamentonan di Jehova?

⁹ Mas cu tur cos, nos kier keda leal na Jehova. Con nos por logra esey? Wel, nos mester haci esfuerso pa mira cosnan manera e ta mira nan: Nos mester stima loke e ta stima y odia loke e ta odia. Ademas, nos tin cu biba na un manera cu ta agrad’e. (Lesa Salmo 97:10.) Mas nos siña pensa manera Jehova, mas facil lo ta pa nos obedece su mandamentonan.—Sal. 119:104.

¹⁰ Tin biaha no ta facil pa obedece Jehova su mandamentonan; nos tin cu haci esfuerso pa keda leal na dje. Tuma por ehempel un ruman muher soltero cu kier casa pero cu ainda no a haya un persona adecuado den e pueblo di Jehova p’e casa cu ne. (1 Cor. 7:39) Anto na su trabou, su coleganan cu no ta Testigo ta keda busca mucha homber p’e. E ruman muher kisas ta luchando cu sintimentonan di soledad. Pero e ta dicidido pa mantene su integridad na Jehova. Nos ta aprecia e excelente ehempel di lealtad cu rumannan asina ta pone. Y Jehova siguramente lo recompensa tur esnan cu keda fiel na dje a pesar di dificultad.—Heb. 11:6.

JEHOVA TA CLA PA PORDONA

11. Ki ora nos por bisa cu un persona ta cla pa pordona?

¹¹ Jehova ta un Dios cu ta cla pa pordona; esey ta un di e caracteristicanan mas atractivo di su personalidad. Awor, ki ora nos por bisa cu un persona ta cla pa pordona? Basicamente, e ta un persona cu ta pordona ora tin berdadero arepentimento. Esey no kiermen si cu e ta aproba cos malo cu otronan ta haci ni cu e ta haci comosifuera nada no a sosode. Mas bien, e ta scoge pa no warda rencor. Bijbel ta bisa cu Jehova ta “cla pa pordona” esnan cu mustra berdadero arepentimento.—Sal. 86:5.

12. (a) Con Jehova ta pordona? (b) Kico kiermen cu un persona su picanan ta ser “pordona”?

¹² Con Jehova ta pordona? Jehova ta pordona “abundantemente.” Esaki ta nifica cu ora Jehova pordona un persona, e ta pordon’e completamente y pa semper. (Isa. 55:7) Con nos por sa cu Jehova ta pordona completamente? Wak kico Bijbel ta priminti na Echonan 3:19. (Les’e.) Apostel Pedro a urgi su oyentenan pa “arepenti ... y bira bek.” Un pecador cu arepenti di berdad ta sinti duele di loke el a haci. Y e ta determina pa no ripiti e pica cu el a comete. (2 Cor. 7:10, 11) Es mas, ora un pecador arepenti di berdad, e ta “bira bek”, cu otro palabra, e ta stop di haci loke ta malo y ta haci esfuerso pa biba na un manera cu ta agrada Dios. Awor, kico lo tabata e resultado si Pedro su oyentenan a mustra berdadero arepentimento? Pedro a bisa cu nan picanan lo a ser “pordona.” E palabra cu Pedro a uza akinan cu ta traduci como “pordona” ta origina di un palabra Griego cu ta nifica “frega kita, manera cu gum.” Pues ora Jehova pordona, ta comosifuera e ta frega nos picanan kita. Si, Jehova ta pordona completamente.—Heb. 10:22; 1 Juan 1:7.

13. Kico e palabranan “nan pica lo mi no corda mas” ta siña nos tocante Jehova?

¹³ Awor, con nos por sa cu Jehova ta pordona pa semper? Nos ta compronde esey for di loke Jehova a revela na Jeremias den un profecia relaciona cu e cristiannan ungi. (Lesa Jeremias 31:34.) Jehova a bisa: “Lo mi pordona nan inikidad, y nan pica lo mi no corda mas.” Pues, Jehova ta sigura nos cu unabes e pordona nos, e no ta corda mas riba nos picanan den e sentido cu lo e no uza esakinan contra nos den futuro. No, e no ta uza e picanan cu el a pordona caba pa acusa of castiga nos bes tras bes. Al contrario, unabes Jehova a pordona, su pordon ta pa semper.—Rom. 4:7, 8.

14. Ki consuelo nos ta haya ora nos ta medita riba e manera cu Jehova ta pordona? Duna un ehempel.

¹⁴ Ora nos ta medita riba e manera cu Jehova ta pordona, nos ta haya berdadero consuelo. E ehempel di un ruman muher cu nos lo yama Elaine ta confirma esaki. Hopi tempo pasa Elaine a ser expulsa, y despues di varios aña, el a ser restaura como Testigo di Jehova. No obstante, Elaine a admiti cu maske e tabata bisa su mes y otronan cu e ta kere cu Jehova a pordon’e, e no tabata sinti esey. Semper e tabata sinti cu otronan tabatin un mihor relacion cu Jehova y cu Jehova tabata mas real pa nan. Pero ora Elaine a lesa y a medita riba cierto ilustracion- of comparacionnan den Bijbel cu ta mustra con Jehova ta pordona, el a haya berdadero consuelo. Elaine a bisa: “Mi a sinti Jehova su amor y cariño. Nunca mi a yega di sinti asina.” Loke specialmente a conmove Elaine ta e pensamento aki: “Ora Jehova pordona nos picanan, nos no tin nodo di sinti cu nos ta cana rond cu e mancha di e picanan ey pa resto di nos bida.”b Elaine a bisa: “Mi a realisa cu mi no tabata kere cu Jehova por a pordona mi completamente, y mi a pensa cu lo mi tabatin cu carga e peso ey pa resto di mi bida. Mi sa cu lo tuma mi tempo, pero ya caba mi a cuminsa sinti cu di berdad mi por hala cerca Jehova, y mi ta sinti cu un carga inmenso a baha for di riba mi lomba.” No tin duda, Jehova realmente ta un Dios amoroso y cla pa pordona!—Sal. 103:9.

PORDONA OTRONAN MANERA JEHOVA TA PORDONA

15. Con nos por pordona otronan manera Jehova ta pordona?

¹⁵ Ora nos ta pordona un persona cu a arepenti di berdad, nos ta imita e ehempel cu Jehova a pone pa nos. (Lesa Lucas 17:3, 4.) Pero corda, unabes cu Jehova a pordona nos, e ta lubida nos picanan, es decir e no ta uza nan contra nos mas. Ora nos pordona otronan, nos tambe mester tira e asunto tras di lomba y no bolbe menciona e asunto mas.

16. (a) Ora nos ta pordona otro hende ta nifica cu nos ta aproba nan ofensanan of ta gusta pa nan probecha di nos? Splica. (b) Kico nos tin cu haci si nos kier haya Dios su pordon?

¹⁶ E echo cu nos ta pordona otro hende nan faltanan no ta nifica cu nos ta aproba nan ofensanan of cu nos ta gusta pa hende probecha di nos. No. Basicamente, pordona un otro hende ta nifica cu nos ta scoge pa no warda rencor. Y ta masha importante pa nos corda riba esaki: Si nos kier pa Jehova pordona nos, nos tambe mester pordona otronan. (Mat. 6:14, 15) Jehova ta corda cu ta “stof nos ta.” Pues, e ta compronde cu nos ta imperfecto. (Sal. 103:14) Pesey, ora otronan faya contra nos, nos tambe mester corda cu nan ta imperfecto y pasa por halto di nan fayonan y pordona nan libremente.—Efe. 4:32; Col. 3:13.

17. Kico nos por haci si un ruman a ofende nos?

¹⁷ Ta claro cu tin biaha no ta facil pa nos pordona otronan. Hasta algun ruman ungi den prome siglo tabatin dificultad pa soluciona nan problemanan. (Flp. 4:2) Pero kico nos por haci pa no warda rencor si un ruman ofende nos of haci algo cu a hasi nos dolor? Tuma Job como ehempel. Job a keda masha kibra ora cu su supuesto amigonan—Elifaz, Bildad, y Sofar—a acus’e falsamente. (Job 10:1; 19:2) Na final di cuenta, Jehova mes a reprende e amigonan falso aki, y el a manda nan bay cerca Job pa Job haci un ofrenda pa nan picanan. (Job 42:7-9) Pero Jehova a manda Job tambe haci algo. Kico e mester a haci? Jehova a bis’e pa e haci oracion pa esnan cu a acus’e. Y Job a haci manera Jehova a mand’e, y Jehova a bendicion’e pasobra el a pordona nan. (Lesa Job 42:10, 12, 16, 17.) Kico nos por siña for di esaki? Si nos ta haci oracion sincero pa un hende cu a ofende nos, esaki por yuda nos pa no warda rencor contra dje.

SIGUI SIÑA MAS DI JEHOVA SU CUALIDADNAN Y IMIT’E

18, 19. Kico nos mester sigui haci?

¹⁸ Sin duda, nos a disfruta di e lesnan cu a siña nos mas encuanto Jehova su cualidadnan. Nos a mira cu Jehova ta acercabel, imparcial, generoso, rasonabel, leal y cla pa pordona. Claro cu ta djis un parti chikito nos a considera, y nos tin tur eternidad pa siña hopi mas tocante Jehova. (Ecl. 3:11) Nos ta di acuerdo cu apostel Pablo, kende a skirbi: “O ki profundo e rikesa, sabiduria y conocemento di Dios ta.” Y nos por bisa esey tambe di Jehova su amor y di e otro seis cualidadnan cu nos a caba di trata.—Rom. 11:33.

¹⁹ Pesey, laga nos sigui siña mas di Jehova su cualidadnan, medita riba loke nos ta siña y purba di desplega e cualidadnan aki den nos bida. (Efe. 5:1) Segun cu nos ta haci esey, sin duda nos amor pa Jehova lo bira mas fuerte y nos lo tin un mihor relacion cu ne. Ademas, tur dia nos lo bira mas y mas convenci di loke e salmista a canta: “Pa loke ta ami, ta bon pa mi keda cerca di Dios.”—Sal. 73:28.