PREGUNTA DI LECTOR

Ta apropia pa mayornan cristian sinta banda di nan yiu expulsa durante reunionnan di congregacion?

Nos no mester preocupa demasiado tocante unda un persona expulsa ta sinta den Salon di Reino. Nos publicacionnan a haci hopi esfuerso pa anima mayornan pa duna nan yiu expulsa cu ainda ta biba na cas yudansa spiritual si nan ta haya esey apropia. Manera E Toren di Vigilancia di 1 di october 2001, pagina 16-18, ta indica, mayornan por hasta studia Bijbel cu un yiu expulsa cu ta menor di edad y cu ta biba na cas. Asina e yiu lo por haya e animacion cu e mester pa corigi su comportacion.

Ta rasonabel pa un yiu menor di edad cu ta expulsa sinta discretamente banda di su mayornan den Salon di Reino. Un persona expulsa no ta obliga di sinta te patras den Salon di Reino. Pues, lo no tin nada contra si un yiu expulsa sinta banda di su mayornan, unda cu esey por ta den Salon. Ya cu e mayornan ta haci esfuerso pa yuda nan yiu spiritualmente, logicamente nan lo kier haci sigur cu e ta saca pleno beneficio di e reunionnan. Pesey lo ta bon pa e yiu sinta banda di nan, en bes di lag’e bay sinta su so sin supervision.

Pero kico si e yiu expulsa no ta biba na cas? Esey ta nifica cu e no por sinta banda di su mayornan? Den pasado, nos publicacionnan a splica bon cla ki actitud un cristian mester tin den e asunto di anda of asocia cu un miembro di famia expulsa cu no ta biba na cas.a Pero ora un persona expulsa ta sinta discretamente banda di su famia durante reunion, esey no ta nifica automaticamente cu su famia ta buscando manera pa asocia cu ne sin cu mester. Si e miembronan di famia cu a keda fiel tin e actitud corecto pa cu esun expulsa y nan ta haci nan best pa sigui e conseho biblico tocante con pa anda cu ne, no tin motibo pa preocupacion.—1 Cor. 5:11, 13; 2 Juan 11.

Pues, si un persona expulsa sinta banda di un miembro di su famia of cualkier otro miembro di e congregacion, esey no mester ta motibo pa preocupacion tanten cu e persona expulsa ta comporta su mes bon. Si cuminsa pone regla unda un hende mag di sinta den Salon di Reino, esey lo por causa varios problema. Si tur hende presente, incluso e miembronan di famia cu a keda fiel, haci nan best pa aplica e principionan biblico cu tin di haber cu expulsion, y si caminda un persona expulsa ta sinta no ta pone e rumannan trompica, no ta necesario pa preocupa unda un persona cu bin reunion ta sinta.b