Con pa Keda Firme Ora un Yiu Bira Rebelde

UN SEÑORA cristian cu nos lo yama Joy a purba inculca amor pa Jehova den su yiu homber. Sinembargo, ora e yiu tabata cerca di cumpli binti aña, el a bira rebelde y a bandona cas. Joy a bisa: “Esei ta e cos di mas doloroso cu mi a yega di pasa aden. Mi a sinti mi traiciona, kibra y frustra. Pensamentonan negativo a caba cu mi.”

Kisas bo tambe a purba lanta bo yiunan, siñando nan pa stima Dios y sirbie, pero despues un of mas di nan a bira lomba p’e. Con bo por biba cu e gran desilusion ei? Kico por yuda bo keda firme den bo sirbishi na Jehova?

Ora e Yiunan di Jehova A Bira Rebelde

Un prome paso ta pa realisa cu Jehova sa exactamente con bo ta sinti bo. Na Isaias 49:15, nos ta lesa: “Un muher por lubida su yiu cu e ta cria na pecho, y no tene compasion cu e yiu di su mondongo? Esakinan por lubida, ma ami si lo no lubida bo.” Si, Jehova tin e mesun sintimentonan cu un tata of mama tin. P’esei, imagina bo con contento lo e tabata ora tur su yiunan angelical tabata alab’e y sirbie. Ora Jehova a contesta e patriarca Job “for di e warwaru”, el a recorda e momentonan di goso cu el a pasa cu su famia uni di criaturanan spiritual, bisando: “Na unda bo tabata tempo cu mi a pone fundeshi di mundo? ... Tempo cu e streyanan di marduga tabata canta hunto, y tur e yiu hombernan di Dios tabata grita di alegria?”—Job 38:1, 4, 7.

Cu tempo, e Dios berdadero a mira un yiu angelical perfecto rebela contra dje y bira Satanas, cu ta nifica “Resistido.” Tambe Jehova a wak su prome yiu homber Adam, y su esposa perfecto, Eva, join Satanas den e rebelion. (Genesis 3:1-6; Revelacion 12:9) Despues, otro yiunan angelical “a bandona nan propio luga di biba” y a rebela contra Dios.—Judas 6.

E Scritura no ta bisa nos con Jehova a sinti su mes ora algun di su yiunan perfecto a lanta contra dje. Sinembargo, Bijbel ta bisa specificamente: “SEÑOR a mira cu maldad di hende tabata grandi riba Tera, y cu tur intencion di e pensamentonan di su curason tabata continuamente maldad so. Y a duel SEÑOR cu el a traha hende riba Tera y e tabata tristo den su curason.” (Genesis 6:5, 6) E rebeldia di Jehova su pueblo scohi, Israel, tambe a “hacie tristo” y a kibra su curason.—Salmo 78:40, 41.

Sin duda, Jehova ta compronde pa mayornan cu ta sinti nan tristo y cu tin un curason kibra pa motibo di e comportacion di yiunan rebelde. Den su Palabra, Bijbel, el a duna conseho sano y animacion pa yuda e mayornan ei enfrenta nan situacion. Dios ta exhorta nan pa tira nan ansiedad riba dje, pa humilia nan mes y pa resisti Satanas e Diabel. Laga nos mira con aplicacion di e conseho aki por yuda bo keda firme ora bo yiu bira rebelde.

Tira Bo Ansiedad Riba Jehova

Jehova sa cu masha poco cos ta causa mayornan mas ansiedad cu e sintimento cu nan yiunan ta den peliger di causa daño na nan mes of cu otro hende por haci nan daño. Apostel Pedro ta identifica un manera pa enfrenta esaki y otro precupacionnan. El a skirbi: “Tira tur boso ansiedad riba [Jehova], pasobra e ta interesa den boso.” (1 Pedro 5:7, NW) Pakico e invitacion y consuelo aki ta di interes particular pa mayornan cu tin un yiu rebelde?

Tempo bo yiu tabata jong, bo tabata atento pa proteh’e contra peliger, y probablemente el a sigui e guia amoroso cu bo a dun’e. Sinembargo, segun cu el a bira mas grandi, bo influencia riba dje lo a mengua, pero bo interes profundo pa proteh’e contra daño si no a bira menos. De echo, kisas el a bira asta mas grandi.

Como resultado di esei, ora bo yiu bira rebelde y sufri daño spiritual, emocional of fisico, bo por sinti cu ta abo ta esun culpabel. Joy, menciona anteriormente, a sinti su mes asina. El a bisa: “Mi tabatin e idea cu ta ami a fracasa, p’esei tur dia mi tabata repasa e sucesonan di pasado den mi mente.” Specialmente na e momentonan ei Jehova kier pa bo ‘tira tur bo ansiedad riba dje.’ Si bo haci esei, lo e yuda bo. E salmista a bisa: “Tira bo carga riba SEÑOR, y e lo sostene bo; nunca e lo no permiti pa e husto wordo movi.” (Salmo 55:22) Joy a experencia e consuelo ei. El a splica: “Mi a papia cu Jehova intimamente tocante tur loke mi tabata sinti. Mi a desahoga mi mes completamente, y esei tabata e alivio di mas grandi cu mi a haya.”

Como un mayor imperfecto, podise bo a comete foutnan tempo bo tabata lanta bo yiu. Pero pakico enfoca riba esakinan? Evidentemente, Jehova no ta hacie, pasobra e salmista inspira a canta: “Si abo, SEÑOR, tuma inikidadnan na cuenta, o SEÑOR, ken lo por a keda para?” (Salmo 130:3) Asta si bo tabata un mayor cu no a haci nada robes, toch bo yiu lo por a bira rebelde. Pues papia cu Jehova den oracion tocante bo sintimentonan, y lo e yuda bo trata cu e situacion. Sinembargo, pa abo mes sigui sirbi Jehova na un manera firme y pa bo evita di bira victima di Satanas, bo tin cu haci asta mas cu esei.

Humilia Bo Mes

“Humilia boso mes ... bou di e man poderoso di Dios”, Pedro a skirbi, “pa e por halsa boso na e tempo apropia.” (1 Pedro 5:6) Pakico bo mester ta humilde ora bo yiu bira rebelde? Ademas di laga bo cu sintimento di culpa y dolor, un yiu rebelde por pone bo cara un poco na berguensa. Kisas bo ta precupa pasobra e accionnan di bo yiu a daña e reputacion di bo famia, specialmente si el a ser expulsa for di e congregacion cristian. Sintimento di culpa combina cu humiliacion por kita tur bo smak di asisti na reunionnan di congregacion.

Ora di trata cu un situacion asina, bo tin cu eherce sabiduria practico. Proverbionan 18:1 ta spierta: “Esun cu isola su mes ta busca su mes deseo; su furia ta lanta contra tur sabiduria sano.” Dor di asisti na reunionnan cristian regularmente a pesar di bo dolor, lo bo por ricibi hopi instruccion y animacion. Joy a admiti: “Na principio mi no tabatin gana di atende cu ningun hende. Pero mi tabata recorda mi mes riba e importancia di mi rutina spiritual. Ademas, si mi a keda cas, lo mi a keda pensa so riba mi problemanan. E reunionnan a yuda mi consentra riba cosnan spiritual edificante. Mi ta masha gradicido cu mi no a isola mi mes y perde e apoyo amoroso di mi rumannan.”—Hebreonan 10:24, 25.

Corda tambe cu cada miembro di un famia mester hiba su mes “carga” di responsabilidad. (Galationan 6:5) Jehova ta spera di mayornan cu nan ta stima y disciplina nan yiunan. E ta spera di yiunan tambe cu nan ta obedece y honra nan mayornan. Si mayornan haci nan best pa lanta nan yiunan den “e disciplina y instruccion di Señor”, e mayornan mes lo tin un bon reputacion dilanti Dios. (Efesionan 6:1-4) Si un yiu rebela contra e disciplina amoroso di su mayornan, ta su propio reputacion e ta daña. Proverbionan 20:11 ta bisa: “Te asta un mucha ta conoci pa su echonan, si su conducta ta puro y recto.” E rebeldia di Satanas sigur no a daña Jehova su reputacion entre esnan cu ta na haltura di e echonan.

Resisti Diabel

Pedro a spierta: “Sea sobrio, sea alerta. Boso adversario, e Diabel, ta cana rond manera un leon cu ta gruña, buscando ken e por devora.” (1 Pedro 5:8) Mescos cu un leon, hopi bes Diabel ta dirigi su atakenan contra hobennan y esnan sin experencia. Den temponan antiguo, tabatin leon ta cana rond den Israel y nan tabata un peliger pa animalnan domestico. Si un lamchi jong a desvia for di e tou, lo e por a bira un victima facil. Instinto di un carne embra lo a pon’e risca su bida pa proteha su lamchi. Ma ni un carne adulto lo no por a resisti un leon. P’esei, tabatin mester di wardadonan balente pa proteha e tou.—1 Samuel 17:34, 35.

Pa Jehova proteha su carnenan figurativo contra e “leon cu ta gruña”, el a percura pa por tin wardadonan spiritual pa cuida e tou bou di e “wardado principal”, Hesucristo. (1 Pedro 5:4) Pedro ta duna e hombernan nombra ei e exhortacion aki: “Pastorea e tou di Dios meimei di boso, haciendo e trabou di cuidado, no forsa, ma voluntariamente, segun e boluntad di Dios; y no pa ganashi deshonesto, sino cu hopi afan.” (1 Pedro 5:1, 2) Cu boso cooperacion como mayornan, e wardadonan aki lo por yuda un hoben corigi su caminda spiritualmente.

Ora wardadonan cristian mester conseha bo yiu rebelde, bo por sinti bo inclina pa proteh’e contra e disciplina. Sinembargo, cu e proceder ei lo bo ta cometiendo un kibocacion serio. Pedro a declara: “Resisti [e Diabel]”, no e wardadonan spiritual.—1 Pedro 5:9.

Ora Disciplina Ta Severo

Si bo yiu ta un cristian batisa y e no arepenti, e por ricibi e forma di disciplina di mas severo, cu ta expulsion for di e congregacion. E grado di contacto cu lo bo tin cu ne e ora ei ta depende di su edad y otro circunstancianan.

Si e mucha ta menor di edad y ta biba na cas, di mes lo bo sigui percura pa su necesidadnan fisico. Tambe bo tin cu disciplin’e y siñ’e e normanan di moralidad; ta abo tin e responsabilidad pa percura esakinan. (Proverbionan 1:8-18; 6:20-22; 29:17) Lo bo kier conduci un estudio di Bijbel cu ne, y lag’e participa directamente. Bo por hala su atencion riba varios texto di Bijbel y na e publicacionnan cu “e esclabo fiel y prudente” ta percura. (Mateo 24:45) Ademas, bo por bai e reunionnan cristian cu bo yiu y lag’e sinta banda di bo. Bo por haci tur e cosnan aki cu e speransa cu lo e tuma conseho biblico na pecho.

E situacion lo ta poco diferente si e yiu expulsa no ta menor di edad y ta biba otro caminda. Apostel Pablo a spierta e cristiannan den e stad antiguo di Corinto: “No asocia cu ningun hende cu ta ruman pa nomber, si e ta un hende inmoral, of golos pa placa, of un adorado di dios falso, of un blasfemado, of un burache, of un estafado—pa ni come mes hunto cu un hende asina.” (1 Corintionan 5:11) Aunke ora di atende asuntonan di famia mester mantene cierto contacto cu e yiu expulsa, un mayor cristian mester haci esfuerso pa evita asociacion innecesario.

Ora wardadonan cristian disciplina un yiu cu a comete un malecho, lo no ta sabi pa purba rechasa of minimisa nan accion basa riba Bijbel. Si bo tuma parti pa bo yiu, bo no ta dunand’e ningun proteccion contra Diabel. En realidad, lo bo ta poniendo bo propio salud spiritual na peliger. Di otro banda, dor di apoya e esfuersonan di e wardadonan, lo bo keda ‘firme den fe’ y percura e mihor yudansa pa bo yiu.—1 Pedro 5:9.

Jehova Lo Sostene Bo

Si bo yiu bira rebelde, corda cu bo no ta e unico mayor cu ta pasa den algo asina. Otro mayornan cristian tabatin experencianan similar. Sea cual sea e pruebanan cu nos ta pasa aden, Jehova por sostene nos.—Salmo 68:19.

Confia riba Jehova den oracion. Asocia regularmente cu e congregacion cristian. Apoya e disciplina cu wardadonan nombra ta duna. Haciendo esei, lo bo por keda firme. Y bo bon ehempel por yuda bo yiu responde na e invitacion amoroso di Jehova pa bolbe bek na dje.—Malakias 3:6, 7.

[Plachi na pagina 18]

Saca fortalesa for di oracion y e congregacion cristian