Samuel A Promove Adoracion Berdadero

PROFETA Samuel a reprende su compañeronan di creencia cu a pidi pa un rei humano y el a urgi nan pa obedece Dios. Pa confirma su autoridad como profeta, el a pidi Jehova duna un señal den forma di un tempestad. Durante e periodo di aña ei, tempo di cosecha di trigo, casi bo no tabata haya tempestad den Israel. Sinembargo, Dios a manda strena y awasero. Como resultado, e pueblo a keda den gran temor di Jehova y di su representante, Samuel.—1 Samuel 12:11-19.

Profeta Samuel tabata un escritor tambe. Su relatonan historico a describi hopi suceso excitante y ta abarca un periodo di 330 aña. Nan ta inclui e hazañanan di e Huesnan di Israel. Por ehempel, e storia di bida real di Samson, e homber mas fuerte cu a yega di biba, tabata fuente di inspiracion pa hopi poesia y opera y tambe produccionnan teatral y pelicula. (Huesnan, capitulo 13-16) Samuel a skirbi tambe tocante Ruth cu su suegra, Noemi, dos muher cu tabata viuda y pober. E relato veridico aki cu un final felis, tambe ta masha emocionante.—Ruth, capitulo 1-4.

Ki lesnan nos por siña for di e bukinan cu Samuel a skirbi y for di su bida? Con el a promove adoracion berdadero?

Samuel Su Hubentud

Elcana, tata di Samuel, tabata un adorado di Jehova y un esposo amoroso. Ana, casa di Elcana, tabata un muher spiritualmente fuerte. Ana tabata steril, y na e cas di Jehova na Silo, el a priminti solemnemente den un oracion ferviente: “O [Jehova] di ehersitonan, si di berdad bo mira e afliccion di bo sirbiente y corda riba mi y no lubida riba bo sirbiente, ma duna bo sirbiente un yiu homber, e ora ei lo mi dun’e na SEÑOR tur e dianan di su bida, y nunca nabaha lo no pasa riba su cabes.” (1 Samuel 1:1-11) Esaki a nifica cu lo el a dedica e yiu na e sirbishi di Jehova.

Ana a haci oracion den silencio. E relato ta bisa cu “solamente su lipnan tabata move.” Sumo Sacerdote Eli kibocadamente a asumi cu Ana tabata burachi y a reprend’e. Sinembargo, respetuosamente Ana a splic’e su situacion, y Eli a bisa: “Bai na pas; y cu e Dios di Israel duna bo bo peticion cu bo a haci na dje.” Jehova a scucha su peticion, pasobra e relato ta sigui bisa: “A sosode cu na su debido tempo, despues cu Ana a concebi, el a duna lus na un yiu homber; y el a yam’e Samuel, bisando: ‘Pasobra mi a pidie na SEÑOR.’”—1 Samuel 1:12-20.

Samuel su mayornan a lant’e den ‘e disciplina y instruccion di Jehova.’ (Efesionan 6:4) Asina cu Ana a kita Samuel for di pecho el a hib’e na e cas di Dios na Silo y a dun’e na Sumo Sacerdote Eli. Bou di su cuido, e mucha ‘tabata sirbi Jehova.’ Ana a expresa su gran goso cu palabranan conmovedor di gradicimento cu despues a keda registra pa Samuel mes.—1 Samuel 2:1-11.

Si bo ta un mayor, bo ta animando bo yiunan pa sigui un carera den e sirbishi di Jehova? E mihor manera cu un hende lo por uza su energia ta pa promove adoracion berdadero.

Samuel a adapta su mes bon na e bida na e santuario. El “a sigui crece cu Jehova” y a bira “mas agradabel, tanto for di e punto di bista di Jehova como di hende.” El a imita e cualidadnan di Dios locual cu a pone otro hende haya cariño p’e.—1 Samuel 2:21, 26, NW.

Esaki si no tabata e caso cu e yiunan di Eli—Ofni cu Finees—cu no tabata sirbi pa nada y cu no a “reconoce Jehova” [NW]. Nan a practica inmoralidad sexual y a tuma pa nan mes e mihor parti di e sacrificionan cu hende tabata trece na e santuario. Dios a yega di manda un profeta caba cerca Eli pa anuncia e castigo cu e por a spera, locual a inclui e morto di su dos yiunan. (1 Samuel 2:12, 15-17, 22-25, 27, 30-34) Jehova a uza Samuel pa entrega un mensahe mas di huicio.

Samuel Ta Fungi Como Profeta

Dios a bisa Samuel pa bisa Eli: “Mi ta bai castiga henter su famia pa semper, pa e maldad cu e sa di dje caba: pasobra su yiunan a maldiciona Dios pero e no a scual nan.” Esei no tabata un mensahe facil pa duna, y Eli mes a insisti pa Samuel no sconde ni un solo palabra p’e. Asina Samuel a cont’e tur loke Jehova a bisa. Samuel tabatin hopi curashi!—1 Samuel 3:10-18, BPK.

Segun cu Samuel a crece bira adulto, henter Israel a bin sa cu e tabata profeta di Dios. (1 Samuel 3:19, 20) E huicio cu Samuel a predeci a cuminsa ora cu Israel a sufri un derota aplastante na man di e Filisteonan. Ofni cu Finees a muri den e bataya, y e Filisteonan a captura e arca di aliansa di Jehova. Ora cu Eli a tende cu su yiunan a muri y cu nan a captura e Arca, el a cai patras for di su stul, kibra su garganta y a muri.—1 Samuel 4:1-18.

Binti aña despues, Samuel a urgi e Israelitanan pa bandona adoracion falso. Nan a reacciona positivo dor di elimina nan idolonan, yuna y confesa nan picanan. Samuel a haci oracion y a presenta un ofrenda kima na nan fabor. Cu ki resultado? Ora e Filisteonan a ataca, Dios a confundi nan, y Israel su contraatake a aplasta e enemigo. Cu e bendicion di Jehova, e situacion di e Israelitanan a mehora considerablemente, y nan a recupera e teritorio cu e Filisteonan a kita for di nan.—1 Samuel 7:3-14.

Samuel definitivamente a promove adoracion berdadero. Por ehempel, el a percura pa un parti di e botin di bataya ser uza pa mantene e tabernakel. El a yuda organisa e celebracionnan di Pasco Hudiu y e sirbishi di e Levitanan wardado-di-porta. (1 Cronicanan 9:22; 26:27, 28; 2 Cronicanan 35:18) For di su cas na Rama, Samuel tabata haci biahenan anual pa bai husga den varios stad. El a gana e reputacion di ta honesto y imparcial. Como cu hende a respeta Samuel, e por a yuda nan spiritualmente. (1 Samuel 7:15-17; 9:6-14; 12:2-5) Samuel su honestidad y spiritualidad sin duda a motiva hopi hende pa sigui su ehempel. E proceder di Samuel tin mesun efecto riba bo?

Israel Ta Pidi pa un Rei

Den su biehes, Samuel a nombra su yiu hombernan, Joel y Abias, como hues. Nan “no a cana den su pasonan, ma a desvia bai tras di ganashi deshonesto y a tuma placa pasa bou di mesa y a perverti husticia.” Nan conducta a pone e ancianonan di Israel pidi pa un rei. (1 Samuel 8:1-5) Esaki tabata malo den bista di Samuel. Sinembargo, ora el a haci oracion tocante e asunto, Jehova a bis’e: “No ta abo nan a rechasa, sino ta ami nan a rechasa di ta rei riba nan.” (1 Samuel 8:6, 7) Dios a bisa Samuel cumpli cu e deseo di e pueblo y spierta nan cu bou di un monarkia nan lo perde cierto libertadnan. Ora cu e pueblo a insisti, Jehova a haci areglo pa Samuel ungi Saul como rei.—1 Samuel 8:6-22; 9:15-17; 10:1.

Samuel a apoya e areglo aki a pesar cu e tabatin su dudanan. Despues cu e Israelitanan a logra un victoria riba e Amonitanan, el a reuni e pueblo na Gilgal pa confirma Saul su nombramento como rei. (1 Samuel 10:17-24; 11:11-15) Samuel a repasa e historia di Israel y a conseha e rei y e pueblo pa obedece Jehova. Dios a contesta e oracion di Samuel cu e awasero y strena inusual pa e temporada ei, menciona den e introduccion. E tempestad ei a pone e pueblo admiti nan eror di rechasa Jehova. Ora nan a pidi Samuel haci oracion pa nan, el a contesta: “Pa loke t’ami, leu sea di mi di peca contra SEÑOR dor di stop di haci oracion pa boso; ma lo mi instrui boso den e caminda bon y recto.” Ki un gran ehempel di amor leal pa Jehova y pa su pueblo! (1 Samuel 12:6-24) Abo tambe ta mesun dispuesto pa apoya areglonan teocratico y haci oracion na fabor di rumannan den fe?

E Prome Dos Reinan Humano di Israel

Saul tabata un homber modesto aproba pa Dios. (1 Samuel 9:21; 11:6) Pero cu tempo, el a stop di sigui e instruccionnan di Dios. Por ehempel, Samuel a reprende Saul pasobra e no a tene pasenshi y warda, manera Samuel a mand’e, sino mas bien a bai ofrece un sacrificio. (1 Samuel 13:10-14) Ora cu Saul a desobedece y a spar e bida di Rei Agag di Amalek, Samuel a bisa Saul: “Awe SEÑOR a scheur e reinado di Israel kit’e for di bo, y a duna esaki na bo prohimo, kende ta mihor cu bo.” Samuel mes a mata Agag y a yora Saul, siendo di luto p’e.—1 Samuel 15:1-35.

Cu tempo Jehova a bisa Samuel: “Te ki dia bo ta keda yora Saul, siendo cu mi a rechas’e como Rei riba Israel?” Anto e ora ei Jehova a manda Samuel bai Betlehem y ungi un yiu homber di Isai como rei. Un pa un Samuel a evalua e yiu hombernan di Isai te ora cu Jehova a duna Su aprobacion pa ungi David, esun di mas jong. E dia ei Samuel a siña un les importante: “Dios no ta mira manera hende ta mira, pasobra hende ta wak aparencia di pafo, ma SEÑOR ta wak curason.”—1 Samuel 16:1-13.

Siendo cu e desobediencia di Saul a duel Samuel, lo e mester tabata hopi mas tristo ora Saul a desaroya un odio asesino pa David! A pesar di e pruebanan ei Samuel a keda activo den su biehes y a haci loke e tabata por den e sirbishi di Jehova.—1 Samuel 19:18-20.

Loke Samuel A Laga Atras

Ora Samuel a muri, Israel a yora e profeta humilde y cu curashi aki, kende a influencia e bida di hopi hende. (1 Samuel 25:1) Samuel tabata imperfecto, y tabatin biaha cu el a husga cosnan robes. Sinembargo, a pesar di Samuel su limitacionnan, el a duna Jehova devocion exclusivo y a traha incansablemente pa yuda otro hende haci mescos.

Hopi cos a cambia compara cu e tempo di Samuel, pero e registro di su bida ta contene lesnan valioso pa nos. Mas cu tur cos, Samuel a practica y promove e adoracion berdadero di Jehova. Esei ta loke abo ta haciendo?

[Cuadro na pagina 16]

REFLEXIONA RIBA E BIDA DI SAMUEL

• Mescos cu e mayornan di Samuel a siñ’e e palabra di Dios, lanta bo yiunan den ‘e disciplina y instruccion di Jehova.’—Efesionan 6:4.

• Anima bo yiunan pa nan ta manera Samuel haciendo e sirbishi di Jehova nan carera.

• Samuel a imita e cualidadnan di Dios locual a pone otro hende haya cariño p’e, y asina el a pone un bon ehempel pa nos.

• Samuel a haci tur loke e tabata por pa promove adoracion berdadero, y nos lo mester haci mescos.

[Plachi na pagina 15]

Samuel a promove adoracion berdadero y di buena gana a duna yudansa spiritual