Con Hende A Bin na Existencia?

Genesis, e prome buki di Bijbel, ta splica cu poco palabra con e universo a cuminsa existi: “Na principio Dios a crea e cielonan y tera.” (Genesis 1:1) Despues cu Dios a crea mata cu bestia, el a crea e prome hendenan, Adam cu Eva. Nan tabata diferente for di bestia pasobra Dios a duna nan e cualidadnan cu e mes ta posee, incluso boluntad liber. Pues, Adam cu Eva tabata responsabel pa nan accionnan. Si nan a obedece e instruccionnan di nan Creador, nan lo por a forma parti di e proposito cu Dios tabatin pa nan. Si, nan lo a bira e mayornan di un famia humano universal cu lo a disfruta pa semper di bida pacifico y perfecto riba tera.

Pero un cierto angel a mira esey como su oportunidad pa laga hende sirbi su interes egoista. Asina el a bira Satanas, cu ta nifica “Opositor.” El a uza un colebra pa gaña Eva, bisando e cu lo a cumbinie si el a rechasa e guia di Dios. Adam cu Eva a bay tras di Satanas y asina nan a bira lomba pa nan Creador. Debi na e mal decision aki, nos prome mayornan a perde e posibilidad di biba pa semper, y nan a pasa pica, imperfeccion y morto pa nos tur.

Mesora Dios a expresa su intencion di drecha e situacion lamentabel aki y duna e yiunan di Adam e posibilidad di biba pa semper. El a profetisa cu un “simia”—un persona special—lo destrui Satanas y kita tur sufrimento cu Satanas, Adam y Eva a causa. (Genesis 3:15) Ken lo a bira e “simia”, of descendiente, ey? Tempo lo a mustra esey.

Mientrastanto, Satanas a sigui purba di stroba e proposito di Dios cumpli. Pica y maldad a plama hopi lihe. Anto Dios a dicidi di destrui hende malbado pa medio di un diluvio. El a instrui e homber husto Noe pa traha un arca—un caha grandi cu por a drif—pa scapa su mes y su famia hunto cu e bestianan cu Dios a bis’e pa hinca den e arca.

Un aña despues di e Diluvio, Noe y su famia a sali for di e arca pa biba riba un tera limpi. Pero e ‘descendiente’ mester a bin ainda.

​—Basa riba Genesis capitulo 1-11; Judas 6, 14, 15 y Revelacion 12:9.