Loke Dios A Haci pa Salba Humanidad

Dios a priminti fiel Abraham cu e “descendiente” priminti lo a bin for di su famia. Pa medio di e persona ey, hende di “tur e nacionnan” lo ser bendiciona. (Echonan 3:25) Cu tempo, Jacob, nieto di Abraham, a muda pa Egipto, caminda su famia a crece bira e nacion di Israel.

Pero despues di un tempo, un Farao cruel a haci e Israelitanan catibo di e Egipcionan. Anto Dios a dicidi di saca e Israelitanan for di Egipto y, pa haci esey, el a laga profeta Moises parti Lama Cora na dos pa medio di un milager. Mas despues, Dios a duna Israel su leynan, incluso e Dies Mandamentonan, cu a sirbi como guia y proteccion pa nan. Den e leynan ey Dios a specifica con nan mester a haci sacrificio pa haya pordon pa pica. Dios a inspira Moises pa bisa Israel cu Dios lo a manda un otro profeta pa nan. E profeta ey lo a bira e “descendiente” priminti.

Mas cu 400 aña despues, Dios a priminti Rey David cu e “descendiente” priminti den Eden lo a bira rey di un reino cu lo dura pa semper. E “descendiente” ey lo a bira e Mesias, e Libertador cu Dios a nombra pa salba humanidad y haci planeta Tera un paradijs.

Gradualmente, Dios a duna mas detaye di e Mesias pa medio di David y otro profeta. Nan a profetisa cu lo el a bira un rey humilde y bondadoso y cu su reinado lo pone fin na hamber, inhusticia y guera. Hende lo biba na paz cu otro y hasta cu bestia. Maleza, sufrimento y morto—cu nunca tabata parti di Dios su proposito—lo disparce, y hende cu a muri lo bolbe na bida riba tera.

Dios a bisa pa medio di profeta Mikeas cu e Mesias lo a nace na Betlehem. Pa medio di profeta Daniel, el a bisa cu nan lo a mata e Mesias pero cu Dios lo a lant’e for di morto y hacie Rey den cielo. Daniel a skirbi tambe cu e Reino di e Mesias lo reemplasa tur otro gobierno pa semper. Di berdad e Mesias a bin manera a ser profetisa?

​—Basa riba Genesis capitulo 22-50, tambe Exodo, Deuteronomio, 2 Samuel, Salmo, Isaias, Daniel, Mikeas y Zacarias 9:9.