BO TABATA SA?
Arkeologia ta apoya loke Bijbel ta bisa?
Rey Sargon II di Asiria, menciona na Isaias 20:1
Segun un articulo publica den Biblical Archaeology Review, tin prueba arkeologico cu ta confirma cu “por lo menos 50” persona menciona den e Scritura Hebreo di berdad a existi. Entre nan tin 14 rey di Juda y Israel, incluyendo Reynan hopi conoci manera David y Ezekias y otronan menos conoci manera Manahem y Peca. Ademas, e articulo ta menciona tambe 5 farao y 19 rey di Asiria, Babilonia, Moab, Persia y Siria. Pero no ta e monarcanan ey so ta ser menciona den Bijbel y den registro arkeologico. Nan ta menciona tambe un escriba, algun sumo sacerdote y otro funcionarionan.
E articulo ta sigui bisa cu pa cada un di e hendenan ey tin suficiente prueba cu ta confirma cu di berdad nan a existi. E Scritura Griego Cristian tambe ta menciona otro personahenan historico y tin prueba arkeologico cu hopi di nan a existi, manera, Herodes, Poncio Pilato, Tiberio, Caifas y Sergio Paulo.
Na ki tempo leon a disparce for di e luganan menciona den Bijbel?
Leon riba baksteen cubri cu glazuur di Babilonia di antiguedad
Awendia no tin leon mas den e Tera Priminti. Pero Bijbel ta referi na e bestia aki mas o menos 150 biaha. Esaki ta mustra cu e tabata bon conoci pa escritornan di Bijbel. Mayoria di biaha Bijbel ta referi na leon den sentido figurativo, pero algun di e relatonan di Bijbel ta menciona personanan cu a topa cara cara cu leon. Por ehempel, Samson, David y Benaia a yega di mata leon. (Huesnan 14:5, 6; 1 Samuel 17:34, 35; 2 Samuel 23:20) Tambe Bijbel ta conta di otro personanan cu leon a mata.—1 Reynan 13:24; 2 Reynan 17:25.
Den antiguedad, e leon Asiatico (Panthera leo persica) tabata biba den areanan for di Asia Menor y Grecia te Palestina, Siria, Mesopotamia y noordwest di India. Hopi bes e bestia respeta y spantoso aki tabata aparece den obranan di arte di Medio Oriente. Por ehempel, e murayanan di e Caya di Procesion di Babilonia tabata decora cu dibuhonan impresionante di leon riba baksteen cubri cu glazuur.
Na fin di siglo 12 despues di Cristo, e soldaatnan di e crusadanan di cristiandad supuestamente tabata jaag riba leon na Palestina. Ta parce cu poco tempo despues di aña 1300 no tabatin leon mas den e luganan ey. Sinembargo, te den siglo 19 ainda tabatin leon na Mesopotamia y Siria. Y te na comienso di siglo 20 ainda hende tabata mira nan na Iran y Irak.