Daniel den Cueba di Leon

AYAYAI! Parce cu Daniel ta den peliger. Pero e leonnan no ta hacie nada! Bo sa pakico? Ken a hinca Daniel eiden hunto cu tanto leon asina? Ban mira.

Awor e Rei di Babilonia ta un homber cu yama Dario. E gusta Daniel masha hopi pasobra Daniel ta bondadoso y sabi. Dario a scohe Daniel pa ser un di e gobernantenan principal di su reino. Esei a haci algun otro homber den e reino envidia Daniel. P’esei, esaki ta loke nan a haci:

Nan a bai cerca Dario y a bis’e: ‘Nos tur kier pa Rei pone na vigor un lei cu ta exigi cu pa 30 dia ningun hende no mag haci oracion na otro dios cu no ta abo, o Rei. Ken cu desobedece mester ser tira den cueba di leon.’ Dario no tabata sa pakico e hombernan ei tabata kier un lei asina. Pero el a haya cu ta un bon idea, y p’esei el a skirbi e lei. Awor e lei no por a ser cambia.

Ora Daniel a tende di e lei, el a bai cas y a haci oracion, manera el a haci semper. E mal hombernan tabata sa cu Daniel lo sigui resa na Jehova. Nan a keda contento pasobra a parce cu nan plan pa caba cu Daniel a logra.

Ora Rei Dario a compronde pakico e hombernan tabata kier traha e lei, el a bira masha tristo. Pero e no por a cambia e lei, y p’esei e tabatin cu duna ordo pa tira Daniel den cueba di leon. Pero e Rei a bisa Daniel: ‘Mi ta spera cu e Dios cu bo ta sirbi lo salba bo.’

Dario a keda asina precupa cu e no por a drumi e anochi ei. Su manece el a core bai na e cueba di leon. Bo por mir’e ei. E ta grita: ‘Daniel, sirbidor di e Dios bibo! E Dios cu bo ta sirbi por a salba bo di e leonnan?’

Daniel a contesta: ‘Dios a manda su angel y a sera boca di e leonnan di manera cu nan no a haci mi daño.’

E Rei a keda masha contento. El a duna ordo pa saca Daniel for di e cueba. Anto el a manda pa e mal hombernan cu a purba caba cu Daniel ser tira pa e leonnan. Asta prome cu nan a yega te abou den e cueba, e leonnan a gara nan y a kibra tur nan wesonan.

Anto Rei Dario a skirbi tur hende den su reino: ‘Mi ta manda pa tur hende respeta e Dios di Daniel. E ta haci milager grandi. El a scapa Daniel pa leon no com’e.’