TOPICO PRINCIPAL | TUR HENDE POR COMPRONDE BIJBEL
Ta Bale la Pena pa Lesa Bijbel?
“Bijbel ta un buki religioso bon conoci. Pero e ta desconoci pa nos como Chines.”—LIN, CHINA.
“Mi no por ni compronde e bukinan sagrado di mi religion hindu, corda Bijbel.”—AMIT, INDIA.
“Mi ta respeta Bijbel pasobra e ta un buki antiguo, y mi a tende cu e ta un di e bukinan mas bendi na mundo. Pero nunca mi a yega di mira uno.”—YUMIKO, JAPON.
Hopi hende rond mundo tin respet pa Bijbel. Pero kisas nan sa masha poco tocante su contenido. Esey sigur ta e caso di miyones di hende cu ta biba na Asia, pero tambe na paisnan caminda casi tur hende tin Bijbel.
Kisas bo ta puntra bo mes: Dicon ta importante pa mi lesa Bijbel? Wel, ora bo haya sa loke Bijbel ta siña, esey por yuda bo logra lo siguiente:
Haya felicidad
Resolve problema di famia
Trata cu ansiedad
Mehora bo relacion cu otro hende
Maneha bo placa mas mihor
Tuma por ehempel un hende muher cu yama Yoshiko cu ta biba na Japon. E kier a haya sa kico Bijbel ta bisa, y pesey el a dicidi di les’e. Kico tabata e resultado? El a bisa: “Bijbel a yuda mi haya proposito den bida y un speransa pa futuro. Mi no ta sinti un bashi den mi curason mas.” Amit, kende nos a menciona ariba, a dicidi di analisa Bijbel. El a bisa: “Mi a keda sorprendi pasobra Bijbel ta contene informacion practico pa tur hende.”
Bijbel a yuda miyones di hende mehora nan bida. Pesey nos ta anima bo pa lesa Bijbel pa bo wak pa bo mes con e por yuda bo.