PREGUNTA CU BIJBEL TA CONTESTA

Hende por compronde Bijbel?

Bijbel ta e Palabra di Dios. E ta manera un carta cu un tata a manda pa su yiunan stima. (2 Timoteo 3:16) Den Bijbel, Dios ta splica nos con nos por haci su curason contento, pakico e ta permiti maldad y kico e lo haci pa humanidad den futuro. Pero lidernan religioso a troce e siñansanan di Bijbel, y pesey, hopi hende ta pensa cu e ta un buki dificil pa compronde.—Echonan 20:29, 30.

Jehova Dios kier pa nos sa e berdad tocante su persona. Y ta pesey el a duna nos un buki cu nos por compronde.—Lesa 1 Timoteo 2:3, 4.

Con bo por compronde Bijbel?

Jehova no solamente a duna nos su Palabra, pero el a percura tambe pa nos haya yudansa pa compronde esaki. El a manda Hesus pa yuda nos cu esey. (Lucas 4:16-21) Pa yuda su oyentenan compronde e Palabra di Dios, Hesus a referi na varios parti di e Scritura.—Lesa Lucas 24:27, 32, 45.

Hesus a establece e congregacion cristian pa su discipelnan por a sigui cu e trabou cu el a cuminsa cu ne. (Mateo 28:19, 20) Awe, e berdadero siguidornan di Hesus ta yuda hende compronde kico Bijbel ta siña tocante Dios. Si bo kier compronde Bijbel, Testigonan di Jehova gustosamente lo yuda bo cu esey.—Lesa Echonan 8:30, 31.