Con Dios Su Nomber Ta?

Ora bo kier conoce un hende, e prome cos cu probablemente lo bo puntr’e ta: “Con yama bo?” Awor, si bo haci Dios e pregunta ey, kico lo e contesta bo?

“Ami ta Jehova. Esey ta mi nomber.”​—Isaias 42:8, NW.

Bo tabata sa su nomber? Por ta no, pasobra hopi traductor di Bijbel a uza Dios su nomber masha poco of no a uz’e mes. Hopi biaha nan ta reemplas’e cu e titulo “SEÑOR.” Pero bo por haya e nomber di Dios rond di 7.000 biaha den e texto original di Bijbel. E nomber ta consisti di cuater consonante Hebreo YHWH, of JHVH, y na Papiamento el a ser traduci como “Jehova.”

Bo por haya e nomber di Dios den henter e texto Hebreo y den hopi traduccion di Bijbel

DICON DIOS SU NOMBER TA IMPORTANTE?

Pasobra Dios mes ta hay’e importante. Ningun hende no a duna Dios su nomber; ta su mes a scoge su nomber. Jehova a bisa: “Esaki ta mi nomber pa semper, y esaki ta mi nomber conmemorativo di generacion pa generacion.” (Exodo 3:15) Den Bijbel bo ta haya e nomber di Dios mas cu cualkier otro titulo, manera Todopoderoso, Tata, Señor of Dios, y mas cu cualkier otro nomber di hende, manera Abraham, Moises, David of Hesus. Ademas, ta Jehova mes kier pa hende haya sa su nomber. Pesey Bijbel ta bisa: “Pa hende por sa cu abo, kende su nomber ta Jehova, abo so ta e Haltisimo riba henter Tera.”​—Salmo 83:18, NW.

Dios su nomber ta importante pa Hesus. Den e oracion di Nos Tata, Hesus a siña su siguidornan pa pidi Dios lo siguiente: “Bo nomber sea santifica.” (Mateo 6:9) Hesus mes a pidi Dios den oracion: “Tata, glorifica bo nomber.” (Juan 12:28) Glorifica e nomber di Dios tabata un prioridad den su bida, y ta pesey e por a bisa den oracion: “Mi a haci bo nomber conoci na nan y lo mi sigui hacie conoci.”​—Juan 17:26.

E nomber di Dios ta importante pa tur hende cu conoce Dios. Den pasado, Dios su sirbidornan tabata sa cu nan salbacion y proteccion tabata conecta cu Dios su nomber unico. “E nomber di Jehova ta un toren fuerte. E husto ta core drenta den dje y ta haya proteccion.” (Proverbionan 18:10, NW) Y Bijbel ta bisa tambe cu “tur hende cu invoca e nomber di Jehova lo ser salba.” (Echonan 2:21) Ademas, Bijbel ta mustra cu Dios su nomber lo identifica esnan cu ta sirbie. “Pasobra tur pueblo, di nan parti, lo cana cada un den e nomber di nan dios; pero nos, di nos parti, lo cana den e nomber di Jehova nos Dios te na tempo indefini, hasta pa semper.”​—Mikeas 4:5, NW; Echonan 15:14.

LOKE E NOMBER DI DIOS TA REVELA

Dios su nomber ta revela na un manera unico ken Dios ta. Hopi experto ta conclui cu e nomber, Jehova, ta nifica “E Ta Causa pa Bira.” Jehova Dios a yuda nos compronde e nificacion di su nomber ora el a bisa Moises tocante su mes: “Lo Mi Bira Loke Mi Ta Scoge pa Bira.” (Exodo 3:14, NW) Pues, e nomber di Dios ta identific’e como Creador di tur cos. Pero tambe su nomber ta nifica cu e tin e habilidad di laga tanto su mes como su creacion bira tur loke ta necesario pa e cumpli cu su proposito. Dios su titulonan ta describi su posicion, autoridad of poder, pero ta solamente su nomber, Jehova, ta representa tur loke e ta y por bira.

Dios su nomber ta demostra cu e ta interesa den nos. E nificacion di su nomber ta indica cu e tin un afecto pa su creacion, incluso nos. Ademas, e echo cu Dios a haci su nomber conoci ta indica cu e kier pa nos siña conoc’e. Al fin y al cabo, el a tuma iniciativa pa revela su nomber hopi tempo pasa, prome cu nos tabata na bida of prome cu nos por a pensa riba e asunto aki. Claramente, Jehova no kier pa nos mir’e como un spirito cu ta leu di nos ni e no kier pa nos pensa cu ta imposibel pa tin un relacion cu ne, sino mas bien, Dios kier pa nos sa cu e ta un Persona real cu nos por hala cerca dje.​—Salmo 73:28.

Ora nos ta uza Dios su nomber, nos ta demostra cu nos ta interesa den dje. Laga nos bisa cu bo kier bira amigo di un hende y bo ta pidie pa e yama bo na bo nomber. Ta con lo bo sinti si e persona ey ta mustra bo cu e no ta yama bo na bo nomber? Kisas lo bo cuminsa duda cu e persona ey di berdad lo kier bira un amigo di bo. Ta mescos den caso di Jehova. El a bisa hende su nomber y e ta anima nos pa uz’e. Ora nos uza su nomber, nos ta mustra Jehova cu nos kier hala cerca dje. Imagina bo, e ta hasta presta atencion na “esnan cu ta pensa riba su nomber”!​—Malakias 3:16, NW.

Haya sa Dios su nomber ta e prome paso importante pa siña conoc’e. Pero nos no mester keda te eynan. Nos mester siña conoce su personalidad, esta con e ta.