“Sigui Haci Esaki” Memorial Lo Ta Dia 5 di April
1. Dicon ta importante pa asisti na Memorial?
1 Prome cu Hesus a ofrece su bida como rescate pa humanidad, el a bisa su siguidonan: “Sigui haci esaki na mi memoria.” (Luc. 22:19) Si, el a manda nan pa conmemora su morto. Debi na tur loke e rescate a logra, Memorial ta e dia di mas importante di aña pa un cristian. E aña aki e ta cay riba 5 di april. Con nos por mustra Jehova nos gratitud segun cu e fecha aki ta acercando?—Col. 3:15.
2. Con nos por mustra mediante estudio y meditacion cu Memorial ta importante pa nos?
2 Prepara: Por lo general, nos ta prepara pa un evento cu nos ta considera importante. Pa loke ta Memorial, nos por prepara nos curason ora nos studia hunto como famia e sucesonan cu a tuma luga prome cu Hesus su morto y medita riba esakinan. (Esd. 7:10, NW) Nos por haya algun texto cu ta trata e sucesonan aki tanto riba nos kalender como den e Texto di Dia. Pero pa un lista di texto mas completo, hunto cu e capitulonan corespondiente for di e buki E homber mas importante, wak E Toren di Vigilancia di 1 di februari 2011, (Papiamento di Corsou) pagina 17 y 18.
3. Con nos por mustra pa medio di nos predicacion cu Memorial ta importante pa nos?
3 Predica: Un otro manera cu nos por mustra cu Memorial ta importante pa nos ta ora nos sali mas den sirbishi. (Luc. 6:45) Entrante diasabra 17 di maart, nos lo cuminsa cu un campaña mundial pa invita hende na Memorial. Bo por ahusta bo programa pa traha mas den sirbishi, kisas como pionero auxiliar? Dicon no trece esaki padilanti durante boso siguiente anochi di Adoracion Como Famia?
4. Ki beneficionan nos ta haya ora nos asisti na Memorial?
4 Tur aña di nobo nos asistencia na Memorial ta beneficia nos den varios manera. Ora nos reflexiona riba con Jehova generosamente a manda su Yiu unigenito como rescate, nos curason ta yena di goso y un gran amor p’e. (Juan 3:16; 1 Juan 4:9, 10) Esaki ta duna nos e deseo di no biba mas pa nos mes. (2 Cor. 5:14, 15) Y tambe nos ta haya mas gana di alaba Jehova publicamente. (Sal. 102:19-21) Si, como sirbidornan gradicido di Jehova, nos ta spera ansiosamente e oportunidad cu e Memorial di dia 5 di april ta duna nos pa “proclama e morto di Señor.”—1 Cor. 11:26.