Tres Sugerencia pa Mehora Nos Manera di Siña Hende
1. Dicon nos mester trata di mehora nos manera di siña hende?
1 Tur publicador ta maestro pasobra nan ta comparti informacion. Pues, sea cu nos ta predica pa prome biaha na un cas, ta haci un rebishita of ta dirigi un estudio di Bijbel, nos ta compartiendo informacion, anto informacion masha importante. Nos ta splica hende “e scrituranan santo” cu por yuda nan bira “sabi pa salbacion.” (2 Tim. 3:15) Esaki sigur ta un gran privilegio! Pues, ban trata tres sugerencia pa mehora nos manera di siña hende.
2. Con nos por siña hende na un manera simpel?
2 Simpel: Ora nos ta bon familiarisa cu un tema, ta facil pa lubida con dificil e informacion por ta pa un hende cu no sa di dje. Pesey, ora nos ta dirigi un estudio di Bijbel, no agrega demasiado detaye na e informacion. Mas bien, resalta e puntonan principal. E echo cu un hende ta papia hopi no kiermen cu e ta duna mihor instruccion. (Pro. 10:19) Por lo general, ta mihor pa lesa solamente e textonan clave. Despues cu bo caba di lesa un texto, enfoca solamente riba e parti cu tin di haber cu e tema cu bo ta tratando. Na Mateo capitulo 5 te cu 7 nos por lesa e Sermon Riba Sero cu Hesus a duna. Ripara con el a siña berdadnan profundo na un manera simpel y cu poco palabra.
3. Dicon ta bon pa nos uza ilustracion, y cua ta esnan mas eficaz?
3 Ilustracion: Ilustracion ta stimula pensamento, conmove sintimento y yuda un hende keda corda. Un bon ilustracion no mester ta un cuenta largo. Hesus a uza hopi biaha ilustracion cortico y facil. (Mat. 7:3-5; 18:2-4) Ilustracion ta referi tambe na plachi. Pues, dibuhonan simpel pinta riba un pida papel tambe por ta masha practico. Cu djis un tiki preparacion, nos por pensa riba ilustracionnan cu ta eficaz.
4. Con nos por haci bon uzo di pregunta?
4 Pregunta: Pregunta ta obliga un studiante pa pensa. Pesey, tene pasenshi despues cu bo haci un pregunta. Si nos mes bira contesta, nos lo no sa kico e studiante mes a compronde. Si e contesta cu el a duna no ta bon, ta mihor gui’e na e idea corecto pa medio di preguntanan adicional en bes di djis corigie. (Mat. 17:24-27) Claro cu niun di nos no ta maestro perfecto. Pesey, Bijbel ta anima nos pa presta atencion constantemente na e siñansa cu nos ta duna. Esey lo trece beneficio eterno tanto pa nos como pa esnan cu ta scucha nos.—1 Tim. 4:16.