Satisfecho cu e Fruta di Tur Nos Trabou
1. Kico por pone nos perde un poco di nos entusiasmo?
1 Dios a crea hende cu e capacidad di “mira e bon cu tin den tur su trabou.” (Ecl. 3:13) Pesey, ora nos sirbishi no duna e resultado cu nos ta desea, nos por sinti nos desanima y por perde un poco di nos entusiasmo. Kico por yuda nos keda cu un actitud positivo?
2. Pakico nos mester keda cu un expectativa realistico?
2 Keda cu un Expectativa Realistico: Aunke masha tiki hende a acepta Hesus su mensahe, su predicacion sin duda tabatin exito. (Juan 17:4) Den e ilustracion di e sembrado, Hesus a profetisa cu mayoria di hende lo no acepta e mensahe di Reino cu el a compara cu simia. (Mat. 13:3-8, 18-22) A pesar di esey, nos esfuersonan diligente ta logra hopi.
3. Con nos por “duna fruta” hasta si ta poco hende so acepta e mensahe cu nos ta predica?
3 Con Nos Ta Duna Hopi Fruta? Segun e ilustracion di e sembrado, hende cu acepta e mensahe lo “duna fruta.” (Mat. 13:23) Ora un palo di trigo crece y madura, e no ta produci un otro palo di trigo, sino mas bien e ta produci simia nobo. Asina tambe, e fruta cu un cristian ta produci no necesariamente ta un discipel nobo, sino e cantidad di simia di Reino cu e ta sembra cada bes cu e predica. E “bon” cu nos ta logra cu nos sembramento ta duna nos satisfaccion, sea cu hende scucha of no. Nos predicacion ta contribui na santificacion di e nomber di Jehova. (Isa. 43:10-12; Mat. 6:9) Y ta un privilegio pa ta compañero di trabou di Dios. (1 Cor. 3:9) Ademas, Jehova ta keda contento ora nos ofrec’e “e fruta di nos lipnan.”—Heb. 13:15, 16.
4. Ki fruta nos por produci sin cu nos mes sa?
4 Nos mester bisa tambe cu no ta semper nos ta mira e resultado di tur nos trabou. Kisas algun di e hendenan cu a scucha Hesus su mensahe no a bira su discipel mientras e tabata riba tera ainda. Mescos por pasa cu e simia di Reino cu nos sembra den curason di un persona. Kisas e simia ta tarda pa saca raiz y crece, pero cu tempo e persona por bira un Testigo sin cu nos mes sa. Sin duda, nos ta logra hopi cos bon den sirbishi. Pesey, laga nos “sigui duna hopi fruta” y demostra cu nos ta discipel di Hesus.—Juan 15:8.