Mas Oportunidad pa Duna Gradicimento na Jehova
1. Ki areglo nobo lo yuda nos “duna masha hopi gradicimento na SEÑOR”?
1 For di maart di e aña aki tin un areglo nobo pa cu e trabou di pionero auxiliar. Publicadornan tin oportunidad awor pa traha pionero cu un rekisito di 30 ora tanto den maart como april y tambe e lunanan cu e superintendente di circuito ta bishita e congregacion. Si e fecha di e bishita ta pasa di un luna pa otro, e publicadornan cu aplica pa traha pionero a base di 30 ora por scoge un di e dos lunanan ey. Tur pionero auxiliar por asisti y disfruta di henter e reunion cu e superintendente di circuito lo tene cu e pioneronan regular y special. Esaki ta nifica cu si debi na circunstancia nos no por traha pionero a base di 50 ora, toch nos por, te cu cuater biaha pa aña, “duna masha hopi gradicimento na SEÑOR” trahando pionero auxiliar a base di 30 ora!—Sal. 109:30; 119:171.
2. Di kico esnan cu traha pionero auxiliar durante bishita di e superintendente di circuito lo disfruta?
2 Durante Bishita di e Superintendente di Circuito: Awor mas tanto publicador por traha pionero auxiliar durante bishita di e superintendente di circuito y disfruta di e intercambio di estimulo segun cu nan ta traha hunto cu ne den sirbishi. (Rom. 1:11, 12) Tin chens cu hopi pionero ta tuma un dia liber den siman pa traha cu e superintendente di circuito. Pero esnan cu no por haya dia liber por pidie pa traha cu nan sea diasabra of diadomingo. Ademas, lo ta hopi animante pa e pioneronan auxiliar asisti na e reunion di pionero hunto cu e pioneronan regular y special!
3. Dicon ta bon pa traha pionero auxiliar den e temporada di Memorial?
3 Den Maart y April: Publicadornan cu anteriormente a yega di traha pionero auxiliar pa un luna a base di 30 ora den e temporada di Memorial awor por duplica nan “sacrificio di alabanza”! (Heb. 13:15) Nos tin bon motibo pa aumenta nos sirbishi trahando pionero auxiliar den maart y april. Pasobra tur aña den e lunanan ey, nos ta disfruta di e campaña pa invita hende na Memorial. Y como cu hopi publicador ta expande nan sirbishi, nos lo por traha cu diferente di nan. Ademas, despues di Memorial nos ta rebishita esnan cu a asisti na Memorial pa cultiva nan interes y anima tur hende pa asisti na e discurso special. Pesey, laga bo curason motiva bo pa probecha di e extra oportunidad aki pa traha pionero auxiliar.—Luc. 6:45.