Caha di Pregunta

◼ Te na ki grado un publicador no-batisa mester asisti na e reunionnan y participa den sirbishi pa e por batisa?

E decision di mas importante cu un hende por tuma ta di batisa. Pesey, prome cu un publicador por batisa, e mester por compronde, te na un grado rasonabel, kico Dios ta rekeri di dje. Ademas, mester ta bisto cu e ta determina pa biba segun Dios su rekisitonan.

Bijbel ta anima cristiannan pa no keda sin bay e reunionnan, pues, un publicador no batisa mester asisti regularmente na e reunionnan di congregacion. (Heb. 10:24, 25) Por lo general, e ta participa tambe den e reunionnan cu su comentarionan. Y probablemente e lo ta inscribi den e Scol di Ministerio Teocratico, aunke esey no ta un rekisito.

Ademas, cristiannan a haya e tarea di predica e bon noticia y haci discipel. Pues, un publicador no-batisa mester participa regularmente den sirbishi prome cu e batisa. (Mat. 24:14; 28:19, 20) Pa cuanto tempo e mester ta un publicador prome cu e batisa? Lo ta bon pa dun’e suficiente tempo p’e por duna prueba di su determinacion di participa cu celo riba un base regular den e trabou di predica. (Sal. 78:37) E tempo ey no mester ta hopi largo si. Kisas djis algun luna despues cu e bira publicador lo e por bin na consideracion pa batisa. Cuanto ora di sirbishi e tin cu raporta? No tin un regla estricto pa esaki. E ancianonan tin cu tene cuenta cu e circunstancianan di cada publicador y ser rasonabel.—Luc. 21:1-4.

E ancianonan (of den congregacion cu tin tiki anciano, e sirbidornan ministerial) cu ta reuni cu un candidato pa bautismo tin cu tene cuenta cu cada persona ta diferente. Pues nan tin cu uza sano huicio pa determina si e ta cualifica pa bautismo of no. E ancianonan ta supone cu e publicador tin deseo di ta un Testigo di Jehova, ta mustra aprecio pa e privilegio di asocia cu Jehova su organisacion y ta participa den e trabou di predica. Nan ta compronde si cu ainda e no a crece na madurez spiritual ni no tin e habilidadnan di un publicador cu experencia. Si e ancianonan ta haya cu e candidato no ta cumpli cu e rekisitonan pa batisa, nan mester splic’e na un manera amoroso kico ta e motibonan biblico cu a pone nan yega na e decision ey y percura p’e haya e yudansa spiritual cu e tin mester.