LES 23

Bautismo Ta un Bon Meta

Edicion Imprimi

Hesus a bisa cu pa bo por ta un cristian bo mester batisa. (Lesa Mateo 28:19, 20.) Pero kico bautismo ta? Y kico un persona mester haci pa logra e meta ey?

1. Con mester batisa un persona?

E palabra “batisa” ta bin for di un palabra Griego cu ta nifica “ser gedop”, of hinca completamente bou di awa. Ora Hesus a batisa, el a ser hinca completamente bou di awa den Riu Jordan. Y despues, el a “sali for di awa.” (Marco 1:9, 10) Mescos cu Hesus, ora un cristian batisa, e ta ser gedop, of hinca completamente bou di awa.

2. Kico un hende ta demostra ora e batisa?

Ora un persona batisa, e ta demostra cu el a dedica su mes na Jehova Dios. Con un persona ta haci un dedicacion na Dios? Prome cu e batisa, e ta bisa Jehova den oracion cu e kier sirbie pa semper. E ta priminti cu lo e adora Jehova so y cu lo e pone Dios su boluntad na prome luga den su bida. E ta scoge pa “nenga su mes ... y sigui” Hesus su ehempel y su siñansanan. (Mateo 16:24) Ora e dedica su mes na Dios y batisa, ta bira posibel pa e tin un amistad pega cu Jehova y cu otro hende cu ta sirbi Jehova.

3. Kico un persona mester haci pa e por batisa?

Prome cu bo por batisa, bo tin cu siña tocante Jehova y fortalece bo fe den dje. (Lesa Hebreonan 11:6.) Segun cu bo ta haya mas conocemento y fe, lo bo haya mas amor pa Jehova. E ora ey, lo bo haya gana di predica tocante dje y biba di acuerdo cu su normanan. (2 Timoteo 4:2; 1 Juan 5:3) Unabes un persona ta biba “na un manera digno di Jehova a fin di agrad’e plenamente”, e por dicidi di dedica su bida na Dios y batisa.—Colosensenan 1:9, 10.a

KICO MAS NOS POR SIÑA?

Laga nos wak kico nos por siña for di e bautismo di Hesus y kico por yuda un persona yega na bautismo.

4. Loke nos por siña for di e bautismo di Hesus

Lesa Mateo 3:13-17 pa haya sa mas detaye tocante e bautismo di Hesus. Despues, analisa e siguiente preguntanan:

Hesus a batisa na baby?
Con Hesus a ser batisa? Nan a djis spart awa riba dje of basha awa riba su cabes?

Despues cu Hesus a batisa, el a cuminsa cu e trabou special cu Dios a dun’e pa haci aki riba Tera. Lesa Lucas 3:21-23 y Juan 6:38. Despues, analisa e siguiente pregunta:

Despues cu Hesus a batisa, ki trabou el a pone na prome luga den su bida?

5. Bo por logra bo meta pa batisa

Kisas ora bo cuminsa pensa riba dedicacion y bautismo, bo por haya miedo. Sinembargo, segun cu bo ta siña conoce Jehova mas mihor, lo bo haya mas confianza pa tuma e decision importante ey. Pa mira ehempel di algun persona cu a haci esey, pasa e VIDEO.

VIDEO: Kultivá un Bon Amistat Ku Yehova (1:11)

Lesa Juan 17:3 y Santiago 1:5. Despues, analisa e siguiente pregunta:

Kico por yuda un persona yega na bautismo?

A. Un señora ta dedica su mes na Jehova den oracion.

B. E mesun señora ta batisa como testigo di Jehova ora e ser hinca completamente bou di awa.

Ora nos dedica nos mes na Jehova, nos ta bis’e cu nos kier sirbie pa semper
Ora nos batisa, nos ta demostra publicamente cu nos a dedica nos mes na Dios

6. Ora nos batisa, nos ta bira parti di Jehova su famia

Ora nos batisa, nos ta bira parti di un famia mundial cu ta uni. Aunke nos ta di diferente pais y tin otro cultura y custumber, nos tur tin e mesun creencianan y ta biba di acuerdo cu e mesun norma- y balornan. Lesa Santiago 2:23 y 1 Pedro 2:17. Despues, analisa e siguiente pregunta:

Con un persona su relacion cu Jehova y su amistad cu otro sirbidor di Jehova lo bira despues di bautismo?

Collage: Un ruman muher ta smile segun cu e ta pensa riba e bon amistad cu e tin cu otro ruman den congregacion. 1. E ta desahoga su mes cerca un ruman muher. 2. E ta yuda un ruman muher di edad cana. 3. E ta come hunto cu ruman di diferente edad. 4. E cu un ruman muher ta predica na un meneer. 5. E ta saca un selfie cu dos ruman muher di otro nacionalidad na un congreso.

LOKE HENDE SA BISA: “Mi no ta cla pa batisa.”

Si bo ta sinti asina, bo ta pensa cu bautismo ta un bon meta pa alcansa?

RESUMEN

Hesus a bisa cu pa bo por ta un cristian bo mester batisa. Prome cu un persona batisa, e mester fortalece su fe den Jehova, biba segun su normanan y dedica su mes na dje.

Repaso

Con mester batisa un persona, y dicon bautismo ta importante?
Kico un persona ta demostra ora e batisa?
Kico un persona mester haci prome cu e dedica su mes na Jehova y batisa?

A completa e les aki dia:

Meta

Bay na e listanan “Mi Ta Cla pa Predica cu e Congregacion?” y “Mi Ta Cla pa Batisa?” na final di Parti 4. Uza e listanan aki pa wak si bo ta cla pa predica y batisa.

Otro meta:

Your other goal

MAS INFORMACION INTERESANTE

Haya sa kico bautismo ta y kico ta algun idea robes tocante bautismo.

“Kico Ta Bautismo?” (articulo riba jw.org)

Wak algun cos cu un persona por haci pa yega na bautismo.

“Amor pa Jehova Lo Motiva Bo pa Batisa” (E Toren di Vigilansia di maart 2020)

Lesa kico a motiva un homber pa batisa.

“Nan Tabata Kier pa Mi Mes Wak Kico Bijbel Ta Siña” (E Toren di Vigilancia di 1 di februari 2013)

Wak dicon bautismo ta un meta cu ta bale la pena pa alcansa y kico bo tin cu haci pa logra e meta ey.

“Mi Mester Batisa?” (Lo que los jóvenes preguntan. Respuestas prácticas (volumen 2), capitulo 37)

a Si un persona a yega di batisa den un otro religion, e mester batisa atrobe. Dicon? Pasobra e religion ey no a siña e persona e berdadnan di Bijbel.—Wak Echonan 19:1-5 y Les 13.