Capitulo Diesdos

Loke Bo Bautismo Ta Nifica

1. Dicon cada un di nos mester ta personalmente interesa den bautismo den awa?

NA AÑA 29 Era Comun, Huan Bautista a batisa Hesus den Riu Yordan. Yehova tawata wak y a expresa su aprobacion. (Mateo 3:16, 17) Asina Hesus a establece un patronchi pa tur su disipelnan sigui. Tres aña y mei despues, Hesus a duna e instruccionnan aki na su disipelnan: “Tur autoridad a wordo duna na mi den shelo y riba tera. Pesei, bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo.” (Mateo 28:18, 19) Abo a batisa na harmonia cu loke Hesus a manda einan? Si no ta asina, bo ta preparando pa haci esei?

2. Ki pregunta nos mester contesta en conexion cu bautismo?

² Sea cu bo a batisa caba of ta preparando pa batisa, ta importante pa tur hende cu kier sirbi Yehova y biba den su husto mundo nobo, comprende bon cla kico ta bautismo. Preguntanan cu mester di un contesta ta entre otro: Bautismo Cristian djawe tin e mesun nificacion cu Hesus su bautismo? Kico ta nifica batisa “den nomber di e Tata y di e Yiu y di e spirito santo”? Kico ta encera biba di acuerdo cu loke bautismo Cristian den awa ta nifica?

Bautismo Cu Huan A Haci

3. Huan su bautismo tawata limita na ken?

³ Un seis luna prome cu Hesus a batisa, Huan Bautista a cuminsa predica den e desierto di Hudea, bisando: “Repenti, pasobra e reino di shelo ta cerca.” (Mateo 3:1, 2) Hende a tende loke Huan a bisa y a haci caso di su advertencia. Nan a confesa nan picanan abiertamente, repenti di nan, anto a bini cerca Huan pa e batisa nan den Riu Yordan. E bautismo ei tawata pa Hudiu so.—Lucas 1:13-16; Echonan 13:23, 24.

4. Dicon e Hudiunan den prome siglo mester a repenti urgentemente?

⁴ E Hudiunan ei mester a repenti urgentemente. Na aña 1513 prome cu Era Comun, na Sero Sinai, nan antepasadonan a drenta den un aliansa of pacto nacional—un acuerdo formal y solem—cu Yehova Dios. Pero debi na nan picanan grave, nan no a cumpli cu e responsabilidadnan cu nan tawatin bou di e pacto ei. Di manera cu e pacto ei a condena nan. Ya den tempo di Hesus nan situacion tawata critico. “E dia grandi y teribel di SEÑOR” cu Malakias a profetisa, tawata cerca. Na aña 70 Era Comun, e “dia” ei a yega ora ehersito Romano a destrui Herusalem, su tempel y mas cu un miyon Hudiu. Dios a manda Huan Bautista, kende tawatin celo pa adoracion berdadero, prome cu e destruccion ei “pa asina forma un pueblo bon prepara pa Señor.” Nan mester a repenti di nan picanan cu nan a comete contra e pacto di e Lei di Moises y prepara pa acepta e Yiu di Dios, Hesus, cu Yehova tawata bai manda pa nan.—Malakias 4:4-6; Lucas 1:17; Echonan 19:4.

5. (a) Ora Hesus a bini pa batisa, dicon Huan a cuestiona esaki? (b) Kico Hesus su bautismo a simbolisa?

⁵ Entre esnan cu a bini cerca Huan pa batisa tawata Hesus mes. Pero dicon? Sabiendo cu Hesus no tawatin pica pa confesa, Huan a bis’e: “Ta ami mester wordo batisa door di bo, anto abo ta bin cerca mi?” Pero e bautismo di Hesus lo a simbolisa un otro cos. Pesei Hesus a contesta: “Permiti esaki awor, pasobra di e manera aki ta toca nos di cumpli cu tur husticia.” (Mateo 3:13-15) Como cu Hesus tawata sin pica, su bautismo no a simbolisa repentimento di pica; ni e no tawatin nodi dedica su mes na Dios, ya cu e tawata miembro di un nacion dedica caba na Yehova. Mas bien, su bautismo na edad di 30 aña tawata unico, y a simbolisa e echo cu el a presenta su mes na su Tata celestial pa haci Su boluntad adicional.

6. Con serio Hesus tawata den haci loke ta Dios su boluntad p’e?

⁶ Dios su boluntad pa Cristo Hesus a encera actividad en conexion cu e Reino. (Lucas 8:1) Tambe esei a encera e sacrificio di su curpa humano perfecto como un rescate y como base pa un pacto of aliansa nobo. (Mateo 20:28; 26:26-28; Hebreonan 10:5-10) Hesus a tuma masha na serio loke su bautismo den awa a simbolisa. E no a permiti ningun otro interes kita su atencion. Te na fin di su bida riba tera, el a cumpli fielmente cu Dios su boluntad, y su trabou principal tawata di predica e Reino di Dios.—Huan 4:34.

Bautismo den Awa di Disipel Cristian

7. Desde Pentecoste di aña 33 Era Comun, ki encargo Cristiannan a haya en conexion cu bautismo?

⁷ Huan a batisa e prome disipelnan di Hesus den awa y despues a dirigi nan na Hesus como futuro miembro di e Reino di shelo. (Huan 3:25-30) Bou di direccion di Hesus, e disipelnan aki tambe a batisa algun hende y e bautismo aki tawatin e mesun nificacion cu e bautismo di Huan. (Huan 4:1, 2) Sinembargo, for di Pentecoste di aña 33 Era Comun, nan a cuminsa cumpli cu e encargo di batisa “den nomber di e Tata y di e Yiu y di e spirito santo.” (Mateo 28:19) Lo ta hopi probechoso pa bo repasa kico esei ta nifica.

8. Kico ta nifica batisa “den nomber di e Tata”?

⁸ Kico ta nifica batisa “den nomber di e Tata”? Esei ta nifica acepta su nomber, posicion, autoridad, proposito y leinan. Considera kico esaki ta encera. (1) Relaciona cu su nomber, Salmo 83:18 (NW) ta bisa: “Abo, kende su nomber ta Yehova, abo so ta e Haltisimo riba henter tera.” (2) Relaciona cu su posicion, 2 Reinan 19:15 ta declara: “O SEÑOR . . . , abo ta e Dios, abo so.” (3) En cuanto su autoridad, Revelacion 4:11 ta bisa nos: “Digno Bo ta, nos Señor y nos Dios, pa ricibi gloria y honor y poder; pasobra Abo a crea tur cos, y pa motibo di bo boluntad nan tawata existi, y a wordo crea.” (4) Tambe nos tin cu reconoce cu Yehova ta e Dunado di Bida, kende tin e proposito di salba nos for di pica y morto: “Salbacion ta di SEÑOR.” (Salmo 3:8; 36:9) (5) Nos tin cu acepta cu Yehova ta e Dunado Supremo di Lei: “SEÑOR ta nos Hues, SEÑOR ta nos Dunado di lei, SEÑOR ta nos Rei.” (Isaias 33:22) Debi cu E ta tur e cosnan aki, Bijbel ta urgi nos: “Stima SEÑOR bo Dios cu henter bo curason, y cu henter bo alma, y cu henter bo mente.”—Mateo 22:37.

9. Kico ta nifica batisa “den nomber . . . di e Yiu”?

⁹ Kico batisa “den nomber . . . di e Yiu” ta nifica? Esei ta nifica reconoce e nomber, posicion y autoridad di Hesucristo. Su nomber, Hesus, ta nifica “Yehova Ta Salbacion.” E tin e posicion ei pasobra e ta Dios su Yiu unigenito, Dios su prome creacion. (Mateo 16:16; Colosencenan 1:15, 16) Ta di e Yiu aki Huan 3:16 ta bisa nos cu: “Dios a stima mundo [di humanidad cu ta bin na remarke pa rescate] asina tanto, cu El a duna su Yiu unigenito, pa ken cu kere den dje no bai perdi, ma tin bida eterno.” Como cu Hesus a muri fiel, Dios a resucit’e for di morto y a dun’e mas autoridad. Segun apostel Pablo, Dios ‘a halsa Hesus na un puesto superior’ den universo. Ta Yehova so ta mas halto cu ne. Pesei, “pa e nomber di Hesus tur rudia mester dobla . . . [y] tur lenga mester confesa cu Hesucristo ta Señor, pa e gloria di Dios Tata.” (Filipencenan 2:9-11; Hebreonan 1:3, 4) Esaki ta nifica obedece Hesus su mandamentonan, cuanan ta bini for di Yehova mes.—Huan 15:10.

10. Kico ta nifica batisa “den nomber . . . di e spirito santo”?

¹⁰ Kico ta nifica batisa “den nomber . . . di e spirito santo”? Esei ta nifica reconoce kico ta e funcion di spirito santo y tambe kico ta tur loke e ta haci. Y kico e spirito santo ta? E ta Yehova su forsa activo cu cua E ta realisa su proposito. Hesus a bisa su siguidonan: “Lo mi pidi e Tata, y E lo duna boso un otro consolador, pa e keda cerca boso pa semper, esta, e spirito di berdad.” (Huan 14:16, 17) Kico esaki lo a capacita nan pa haci? Hesus a bisa nan despues: “Boso lo ricibi poder ora spirito santo bin riba boso, y boso lo ta mi testigonan na Herusalem y na henter Hudea y Samaria, y te na e parti mas aleha di mundo.” (Echonan 1:8) Tambe mediante e spirito santo, Yehova a inspira e skirbimento di Bijbel: “Nunca profecia no a wordo duna pa medio di e boluntad di hende, ma hombernan santo di Dios a papia, inspira door di spirito santo.” (2 Pedro 1:21) Pues, nos ta reconoce e papel di spirito santo ora nos ta studia Bijbel. Un otro manera cu nos ta reconoce e funcion di e spirito santo ta door di pidi Yehova yuda nos produci “fruta di e spirito”, cuanan ta “amor, goso, pas, pasenshi, cariño, bondad, fieldad, mansedumbre, dominio propio.”—Galationan 5:22, 23.

11. (a) Kico ta e berdadero nificacion di bautismo den nos tempo? (b) Den ki sentido un persona ta muri y resucita ora e batisa?

¹¹ E prome personanan cu a batisa na harmonia cu e instruccionnan di Hesus tawata Hudiu y hende cu a comberti na religion Hudiu, cuminsando na aña 33 Era Comun. Djis despues, a extende e privilegio di bira disipel Cristian na e Samaritanonan. Anto na aña 36 Era Comun, e yamada a expande pa inclui hende cu no tawata Hudiu circuncida. Prome cu Samaritano y hende cu no tawata Hudiu circuncida a batisa, nan tawatin cu dedica nan mes personalmente na Yehova pa sirbie como disipel di su Yiu. Te awe, esei ta loke bautismo Cristian den awa ta nifica. Bai completamente bou di awa ta un simbolo apropiado di e dedicacion personal aki, ya cu bautismo ta un entiero simbolico. Ora bo bai bou di awa pa batisa, esei ta nifica cu bo a muri pa cu bo forma di bida anterior. Ora bo sali for di bou di awa, esei ta simbolisa cu bo a resucita pa haci Dios su boluntad. E “un bautismo” aki ta aplica na tur hende cu bira un Cristian berdadero. Ora nan batisa nan ta bira un Testigo Cristian di Yehova, nombra pa Dios como un sirbido cualifica pa predica.—Efesionan 4:5; 2 Corintionan 6:3, 4.

12. Cu kico bautismo Cristian ta coresponde, y den ki manera?

¹² Tal bautismo tin gran balor den bista di Dios, pasobra e por salba un persona. Por ehempel, despues di menciona con Noe a traha e arca den cua e cu su famia a scapa e Dilubio, apostel Pedro a skirbi: “Corespondiendo na esei, bautismo awor ta salba boso—no e kimamento di sushi for di e carni, ma un apelacion na Dios pa un bon consenshi—pa medio di e resureccion di Hesucristo.” (1 Pedro 3:21) E arca tawata un prueba concreto cu Noe a cumpli fielmente cu e trabou cu Dios a asign’e. Despues cu nan a caba di traha e arca, “e mundo di e tempo ei a wordo destrui, siendo inunda cu awa.” (2 Pedro 3:6) Pero Noe cu su famia, “ocho persona, a wordo hiba sano y salvo door di e awa.”—1 Pedro 3:20.

13. Di kico bautismo den awa ta salba un Cristian?

¹³ Awendia, hende cu dedica nan mes na Yehova a base di nan fe den Cristo resucita, ta batisa como simbolo di nan dedicacion. Nan ta cuminsa haci loke ta Dios su boluntad pa nos tempo y ta ser salba for di e mundo malbado actual. (Galationan 1:3, 4) Nan no ta rumbo pa destruccion mas hunto cu e mal sistema di cosnan aki. Nan ta scapa di esaki y Dios ta duna nan un bon consenshi. Apostel Huan ta sigura sirbidonan di Dios: “Mundo ta pasa bai y su deseonan tambe, ma esun cu haci e boluntad di Dios ta permanece pa semper.”—1 Huan 2:17.

Cumpliendo cu Nos Responsabilidad

14. Dicon bautismo riba su mes no ta un garantia pa haya salbacion?

¹⁴ Lo ta un kibocacion pa kere cu bautismo riba su mes ta un garantia pa haya salbacion. E tin balor solamente si un persona realmente a dedica su mes na Yehova mediante Hesucristo y despues di esei ta cumpli cu Dios su boluntad, kedando fiel te na fin. “Esun cu persevera te na fin, esei lo ta salba.”—Mateo 24:13.

15. (a) Awe, kico ta Dios su boluntad pa Cristiannan batisa? (b) Con importante ser un disipel Cristian mester ta den nos bida?

¹⁵ Dios su boluntad pa Hesus a encera e manera cu el a uza su bida como hende. E tawatin cu entrega su bida como sacrificio. Den nos caso, nos tin cu presenta nos curpa na Dios, y nos tin cu hiba un bida di sacrificio propio door di haci Dios su boluntad. (Romanonan 12:1, 2) Sigur nos lo no ta haciendo Dios su boluntad si nos ta comporta nos mes—maske ta de bes en cuando so—deliberadamente mescos cu e mundo rond di nos of si nos bida ta enfoca riba actividadnan egoista y nos ta sirbi Dios djis pa formalidad. (1 Pedro 4:1-3; 1 Huan 2:15, 16) Ora un Hudiu a puntra kico e tin cu haci pa haya bida eterno, Hesus a confirma cu ta importante pa hiba un bida moralmente limpi. Pero despues el a indica algo cu ta asta mas importante: un hende mester ta un disipel Cristian, un siguido di Hesus. Esei mester ta e cos principal den bida. E no por ta na di dos luga, despues di actividadnan material.—Mateo 19:16-21.

16. (a) Ki responsabilidad tur Cristian tin en conexion cu e Reino? (b) Manera e ilustracionnan na pagina 116 y 117 ta mustra, cua ta algun manera eficas pa haci e trabou di Reino? (c) Si nos ta participa cu henter nos curason den e trabou di duna testimonio, esei ta duna evidencia di kico?

¹⁶ Nos mester bolbe enfatisa cu Dios su boluntad pa Hesus a encera actividad vital en conexion cu e Reino di Dios. Hesus mes a ser ungi como Rei. Pero mientras e tawata riba tera, el a duna tambe un testimonio celoso tocante e Reino. Nos tin un trabou similar di duna testimonio, y nos tin tur motibo pa participa den dje cu henter nos curason. Haciendo esei, nos ta demostra nos gratitud pa Yehova su gobernacion supremo y tambe nos amor pa nos prohimo. (Mateo 22:36-40) Ademas nos ta demostra cu nos ta uni cu compañeronan di adoracion mundialmente, ya cu nan tur ta proclamado di Reino. Hunto, den union mundial, nos ta sigui padilanti pa alcansa e meta di bida eterno den e teritorio terenal di e Reino ei.

Como Repaso

• Ki similaridad y ki diferencia tin entre e bautismo di Hesus y bautismo den awa djawe?

• Kico ta nifica batisa “den nomber di e Tata y di e Yiu y di e spirito santo”?

• Kico ta encera cumpli cu e responsabilidad di bautismo Cristian den awa?

[Plachi na pagina 116 y 117]

ALGUN MANERA PA PROCLAMA E REINO

Di cas pa cas

Na famia

Na colega di trabou

Na compañero di scol

Riba caya

Rebishitando hende interesa

Na studio di Bijbel na cas