Capitulo Diesun

Sigui “Busca Prome e Reino”

1. (a) Dicon Hesus a urgi su oyentenan pa busca prome e Reino? (b) Kico nos tin cu puntra nos mes?

MAS cu 1.900 aña pasa den un discurso na Galilea, Hesus a urgi su oyentenan: “Ma busca prome e reino di Dios y Su husticia.” Pero dicon esei tawata urgente? No tawata falta hopi siglo ainda pa Cristo ricibi poder di Reino? Si, pero e Reino Mesianico tawata e medio cu Yehova lo a uza pa duna prueba di su derecho di goberna y pa cumpli cu su gran proposito pa e tera. Ken cu di berdad a comprende e importancia di e cosnan ei lo a pone e Reino na prome luga den su bida. Si esei tawata asina den prome siglo, cuanto mas awe cu Cristo ya ta entronisa como Rei! Pesei e pregunta ta: Mi estilo di bida ta mustra cu mi ta busca prome e Reino di Dios?—Mateo 6:33.

2. Kico hende en general ta core tras di dje cu empeño?

² Awe, de echo tin miyones di hende rond mundo cu ta busca prome e Reino. Nan ta demostra nan apoyo na e gobernacion di e Reino door di dedica nan mes na Yehova y laga su boluntad bira e cos central den nan bida. Di otro banda, e gran mayoria di humanidad ta interesa den busca cosnan di mundo. Hende ta core tras di placa y tambe tras di e posesion- y placernan cu bo por cumpra cu placa. Of nan ta hinca tur nan energia den un carera profesional. Nan estilo di bida ta demostra cu loke ta interesa nan mas ta satisfaccion personal, cosnan material y placer den bida. Nan ta pone Dios na segundo luga, si acaso nan ta kere den Dje mes.—Mateo 6:31, 32.

3. (a) Ki clase di tesoro Hesus a anima su disipelnan pa busca, y dicon? (b) Dicon nos no tin nodi ta demasiado precupa tocante cosnan material?

³ Sinembargo, Hesus a conseha su disipelnan: “No montona tesoro pa boso mes riba tera”, ya cu ningun di e posesionnan ei ta dura pa semper. Hesus di: “Ma montona tesoro pa boso mes den shelo” door di sirbi Yehova. El a urgi su siguidonan pa tene nan wowo “bon” [“simpel”, NW] door di enfoca nan atencion y energia riba hacimento di Dios su boluntad. El a bisa nan: “Boso no por sirbi Dios y Rikesa.” Pero kico di nan necesidadnan material: cuminda, paña pa bisti y cas? Hesus a conseha: “No precupa boso mes.” Y el a dirigi nan atencion na e parhanan: Dios ta alimenta nan. Hesus a anima su siguidonan pa siña un les for di e flornan: Dios ta bisti nan. Acaso Yehova su sirbidonan humano inteligente no ta bal mas cu esakinan? Pesei Hesus a bisa: “Ma busca prome e reino di Dios y Su husticia, y tur e cosnan [necesario] aki lo wordo añadi na boso.” (Mateo 6:19-34) Bo accionnan ta mustra cu bo ta kere esei?

No Laga Otro Cos Hoga e Berdad di Reino

4. Si un persona pone demasiado enfasis riba cosnan material, kico por ta e resultado?

⁴ Ta na su luga pa un persona precupa pa e tin suficiente pa satisface su necesidadnan material y di su famia. Pero si un persona ta demasiado precupa cu cosnan material, e resultado por ta desastroso. Maske kisas e ta bisa cu e ta kere den e Reino, si den su curason e ta pone otro cos na prome luga, e cosnan ei lo hoga e berdad di Reino. (Mateo 13:18-22) Por ehempel, na un ocasion un hoben gobernante rico a puntra Hesus: “Kico mi mester haci pa hereda bida eterno?” E tawata hiba un bida di bon moral y a trata otro hende bon, pero su posesionnan material tawata mucho pega na su curason. E no por a laga su posesionnan material pa bira un siguido di Cristo. Asina el a perde e oportunidad di ta hunto cu Cristo den e Reino celestial. Hesus a bisa na e ocasion ei: “Ki dificil lo ta pa esnan cu ta rico drenta e reino di Dios!”—Marco 10:17-23.

5. (a) Pablo a anima Timoteo pa keda contento cu kico, y dicon? (b) Con Satanas ta uza “amor pa placa” como un trampa destructivo?

⁵ Añanan despues, apostel Pablo a skirbi Timoteo, kende e tempo ei tawata na Efeso, un centro comercial prospero. Pablo a record’e: “Nos no a trece nada den mundo, y nos no por hiba nada for di dje tampoco. Y si nos tin cuminda y paña pa bisti, cu esakinan nos mester ta contento.” Ta corecto pa un hende traha pa percura “cuminda y paña pa bisti” pa su mes y pa su famia. Pero Pablo a spierta: “Esnan cu kier bira rico ta cai den tentacion y den trampa y den hopi deseonan loco y dañino, cuanan ta hundi hende den ruina y destruccion.” Satanas ta mañoso. Na prome instante kisas e ta tenta un persona cu cosnan chikito. Kisas despues ta sigui presion mas grandi, podise e oportunidad pa haya promocion na trabou of un miho empleo cu ta paga mas pero cu ta exigi mas tempo, tempo cu antes e persona tawata dedica na asuntonan spiritual. Si nos no vigila, “amor pa placa” por hoga e asuntonan hopi mas importante cu tin di aber cu e Reino. Pablo a expres’e asin’aki: “Algun hende, door di desea esaki, a desvia for di e fe, y a traspasa nan mes cu hopi dolo.”—1 Timoteo 6:7-10.

6. (a) Kico nos mester haci pa evita di cai den e trampa di materialismo? (b) Ki confiansa nos por tin apesar di e situacion economico di mundo djawe?

⁶ Cu amor sincero pa su ruman Cristian, Pablo a urgi Timoteo: “Hui pa e cosnan aki” y: “Lucha e bon lucha di fe.” (1 Timoteo 6:11, 12) Nos mester haci esfuerso sinsero si nos kier evita pa e estilo di bida materialista di e mundo rond di nos hiba nos bai cu ne. Pero si nos haci esfuerso vigoroso na harmonia cu nos fe, Yehova nunca lo bandona nos. Maske con caro bida bira y cuanto desempleo reina, Yehova lo haci sigur cu nos tin loke nos realmente mester. Pablo a skirbi: “Laga boso caracter ta liber di amor pa placa y sea contento cu loke boso tin; pasobra [Dios] mes a bisa: ‘Nunca lo mi no bandona bo, y nunca lo mi no laga bo desampara’, asina cu nos ta bisa cu tur confiansa: ‘SEÑOR ta mi yudado, lo mi no tin miedo. Kico hende por haci mi?’” (Hebreonan 13:5, 6) Y Rei David a skirbi: “Mi tawata jong, y awor mi ta bieu; ma nunca mi no a mira e husto desampara, ni su desendientenan ta pidi pan.”—Salmo 37:25.

E Prome Disipelnan Ta Pone un Ehempel

7. Ki instruccion tocante e predicacion Hesus a duna su disipelnan, y dicon esaki tawata apropiado?

⁷ Despues cu Hesus a duna su apostelnan un entrenamento apropiado, el a manda nan bai predica e bon nobo den Israel y declara: “E reino di shelo ta cerca.” Ki un mensahe emocionante esei tawata! Hesucristo, e Rei Mesianico, tawata meimei di nan. Como cu e apostelnan tawata dedica nan mes na e sirbishi di Dios, Hesus a urgi nan pa confia cu Dios lo percura pa nan. Pesei el a bisa: “No hiba nada pa na caminda, ni garoti, ni saco, ni pan, ni placa, ni ningun tunica extra. Y den cualkier cas cu boso drenta, keda einan, y sigui biaha for di einan.” (Mateo 10:5-10; Lucas 9:1-6) Yehova lo a percura pa otro Israelita satisface nan necesidadnan, ya cu pa e pueblo tawata normal pa mustra hospitalidad na hende straño.

8. (a) Dicon djis prome cu su morto, Hesus a duna e disipelnan instruccion nobo pa predica? (b) Kico toch mester a keda na prome luga den bida di e siguidonan di Hesus?

⁸ Despues, djis prome cu su morto, Hesus a alerta su apostelnan pa e echo cu den futuro nan lo a bai traha bou di otro sircunstancia. Como resultado di oposicion oficial contra nan actividad, hende den Israel kisas lo no a mustra hospitalidad na nan dje facil ei. Tambe, denter di poco nan lo a hiba e mensahe di Reino na paisnan cu no ta Hudiu. Pesei awor nan mester a bai cu “un potmoni” y “un saco di cuminda.” Pero toch, nan mester a sigui busca prome Yehova su Reino y su husticia, cu e confiansa cu Dios lo a bendiciona nan esfuersonan pa haya e cuminda y paña necesario.—Lucas 22:35-37, NW.

9. Con Pablo a pone e Reino na prome luga den su bida y a la bes percura pa su necesidadnan fisico? Y ki conseho el a duna riba e asunto aki?

⁹ Apostel Pablo ta un bon ehempel di un persona cu a aplica e conseho di Hesus. Pablo a haci e predicacion di e palabra e cos principal den su bida. (Echonan 20:24, 25) Ora el a bai un area pa predica, e tawata percura pa su propio necesidadnan material, y asta a traha tent pa mantene su mes. E no a spera cu ta otro hende tawatin cu cuid’e. (Echonan 18:1-4; 1 Tesalonicencenan 2:9) Sinembargo, ora otro hende a expresa nan amor na dje door di mustr’e hospitalidad y dun’e regalo, el a acepta esei cu aprecio. (Echonan 16:15, 34; Filipencenan 4:15-17) Pablo no a anima Cristiannan pa neglisha nan obligacion familiar pa nan por predica, sino mas bien pa nan balansa e varios responsabilidadnan cu nan tawatin. El a conseha nan pa traha, stima nan famia y comparti cos cu otro hende. (Efesionan 4:28; 2 Tesalonicencenan 3:7-12) El a urgi nan pa confia den Dios, no den posesion material, y pa uza nan bida den un manera cu a demostra cu di berdad nan a comprende kico ta e cosnan mas importante. Na harmonia cu e siñansa di Hesus, esei tawata kiermen busca prome e Reino di Dios y su husticia.—Filipencenan 1:9-11.

Tene e Reino na Prome Luga den Bo Bida

10. Kico kiermen busca prome e Reino?

¹⁰ Te na ki grado nos ta haci esfuerso personalmente pa comparti e bon noticia di e Reino cu otro hende? Pa un parti, esei ta depende di nos sircunstancia y di e profundidad di nos aprecio. Corda cu Hesus no a bisa: ‘Busca e Reino ora bo no tin nada otro di haci.’ Conociendo e importancia di e Reino, el a expresa e boluntad di su Tata, bisando: “Busca su reino continuamente.” (Lucas 12:31, NW) Aunke mayoria di nos tin cu traha pa satisface nos necesidadnan y di nos famia, si nos tin fe, e trabou di Reino cu Dios a duna nos pa haci lo ta e cos mas importante den nos bida. Na mesun tempo, nos lo atende nos responsabilidadnan di famia.—1 Timoteo 5:8.

11. (a) Con Hesus a ilustra cu no ta tur hende lo por haci mes tanto pa plama e mensahe di Reino? (b) Kico ta e cosnan cu ta determina cuanto un hende por haci?

¹¹ Algun di nos por dedica mas tempo cu otro na predica e bon noticia di e Reino. Pero den su comparacion tocante varios tipo di tera, Hesus a mustra cu tur hende cu tin un curason manera bon tera, lo produci fruta. Te na ki grado nan ta produci fruta? E sircunstancianan individual ta varia. Edad, salu y responsabilidad di famia ta hunga un rol. Pero ora hende di berdad ta aprecia e bon noticia di e Reino, nan por logra hopi.—Mateo 13:23.

12. Ki meta spiritual saludabel ta bon pa hobennan pensa ariba?

¹² Ta bon pa nos tin meta cu lo yuda nos expande nos participacion den e sirbishi di Reino. Hobennan mester pensa seriamente riba e excelente ehempel di e hoben Cristian celoso Timoteo. (Filipencenan 2:19-22) Kico lo por ta mas miho pa nan cu drenta den e sirbishi di tempo completo ora nan caba scol? Hende grandi tambe lo beneficia si nan pone metanan spiritual saludabel.

13. (a) Ken ta dicidi kico nos cada un por haci den sirbishi di Reino? (b) Si di berdad nos ta busca prome e Reino, esei ta prueba di kico?

¹³ En bes di critica hende cu tal bes nos ta haya lo por haci mas, nos fe mester impulsa nos pa traha pa mehora nos propio sirbishi ya asina nos por sirbi Dios te caminda nos sircunstancia ta permiti. (Romanonan 14:10-12; Galationan 6:4, 5) Manera a keda demostra den e caso di Job, Satanas ta argumenta cu loke mas ta interesa nos ta nos posesionnan material, nos propio comodidad y nos bienestar personal, y cu nos ta sirbi Dios pa motibo egoista. Pero si di berdad nos ta buscando prome e Reino, nos ta yuda comproba cu realmente Diabel ta un gran mentiroso. Asina nos ta duna prueba cu loke ta bini na prome luga den nos bida ta nos sirbishi na Dios. Cu echo y palabra, nos ta duna prueba di nos amor profundo pa Yehova, nos apoyo leal na su derecho di goberna y nos amor pa prohimo.—Job 1:9-11; 2:4, 5; Proverbionan 27:11.

14. (a) Dicon ta bon pa nos tin un programa pa sirbishi di veld? (b) Te na ki grado hopi Testigo ta participa den sirbishi di veld?

¹⁴ Un programa por yuda nos logra mas tanto. Yehova mes tin “un tempo fiho” pa cumpli cu su proposito. (Exodo 9:5; Marco 1:15) Si ta posibel, ta bon pa tur siman nos tin un of mas dia fiho pa sali den sirbishi di veld. Cientos di miles di Testigo di Yehova rond mundo a yega di inscribi como pionero ausiliar, dedicando alrededor di dos ora pa dia na predica e bon nobo. Cientos di miles di otronan ta sirbi como pionero regular, uzando mas o menos dos ora y mei pa dia pa proclama e mensahe di Reino. Pionero special y misioneronan ta pasa asta mas ora den sirbishi di Reino. Tambe nos por busca oportunidad pa comparti e speransa di Reino informalmente cu ken cu kier scucha. (Huan 4:7-15) Nos deseo mester ta pa participa plenamente den e trabou ei te caminda nos sircunstancia ta permiti, pasobra Hesus a profetisa: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.”—Mateo 24:14; Efesionan 5:15-17.

15. En conexion cu nos proclamacion di e palabra, dicon bo ta haya cu e conseho na 1 Corintionan 15:58 ta oportuno?

¹⁵ Unidamente, Testigonan di Yehova den tur parti di mundo, sin importa den cua nacion nan ta biba, ta participa den e privilegio di sirbishi aki. Nan ta aplica na nan mes e conseho biblico inspira: “Sea firme, constante, semper abundando den e trabou di Señor, sabiendo cu boso trabou no ta en vano den Señor.”—1 Corintionan 15:58.

[Komentario di e plachi na página 109]

Como Repaso

• Ora Hesus a bisa pa sigui “busca prome e reino”, kico e tawata indica cu mester bai na di dos luga?

• Ki punto di bista nos mester tin tocante percura pa nos necesidadnan fisico y di nos famia? Con Dios lo yuda nos?

• Den ki rasgonan di sirbishi di Reino nos por participa?

[Plachi na pagina 107]

Den tur pais, Testigonan di Yehova djawe ta predica e bon nobo, prome cu e fin bini