Capitulo Dies
Un Reino “Cu Nunca Lo No Wordo Destrui”
1. Ki echo sucesonan mundial a enfatisa atrabes di humanidad su historia?
SUCESONAN mundial cu ta tuma luga tur dia ta enfatisa e echo cu hende no a haya felicidad door di rechasa Yehova su gobernacion supremo y purba goberna nan mes. Ni un solo forma di gobierno humano a trece beneficio pa tur hende, sin haci distincion. Aunke hende a desaroya nan conocemento cientifico na un grado nunca bisto, nan no a logra vence malesa ni pone fin na morto, ni sikiera pa un solo persona. Gobernacion humano no a elimina guera, violencia, crimen, corupcion ni pobresa. Den hopi pais, ainda gobiernonan opresivo ta domina hende. (Eclesiastes 8:9) Tecnologia, golosidad y ignorancia ta factornan cu hunto ta contamina tera, awa y aire. Debi na e mal maneho economico di autoridadnan ta dificil pa hopi hende haya e necesidadnan di bida. Miles di aña di gobernacion humano a demostra e echo aki bon cla: “E caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.
2. Kico ta e unico solucion pa e problemanan di humanidad?
2 Kico ta e solucion? E Reino di Dios. Y ta pa e Reino ei Hesus a siña su siguidonan pidi den oracion: “Cu bo reino bin. Cu bo boluntad sosode na tera mescos cu den shelo.” (Mateo 6:9, 10) Na 2 Pedro 3:13, Dios su Reino celestial ta ser describi como e “shelonan nobo” cu lo bai goberna riba e “tera nobo”, esta, un sociedad humano husto. Dios su Reino celestial ta asina importante cu Hesus a hacie e tema central di su predicacion. (Mateo 4:17) El a mustra cu e Reino ei mester tin prioridad den nos bida, bisando: “Ma busca prome e reino di Dios y Su husticia.”—Mateo 6:33.
3. Dicon ta hopi urgente awe pa hende siña tocante e Reino di Dios?
3 Aworaki ta masha urgente pa hende siña tocante e Reino di Dios, ya cu pronto e Reino ei lo tuma accion pa cambia e gobernacion di e tera aki pa semper. Daniel 2:44 ta profetisa: “Den e dianan di e reinan ei [gobiernonan cu ta na mando awor] e Dios di shelo lo lanta un reino [den shelo] cu nunca lo no wordo destrui, y e reino ei lo no pasa pa ningun otro pueblo [nunca mas hende lo bolbe goberna mundo]; e lo garna y pone un fin na tur e reinonan aki [actualmente], ma e mes lo dura pa semper.” Pues e Reino lo pone fin na e ultimo dianan aki door di destrui henter e actual sistema di cosnan malbado. E ora ei e Reino celestial lo ta indiscutiblemente na encargo di gobernacion di e tera. Nos mester ta hopi gradicido cu e alivio cu esaki lo trece ta masha cerca!
4. Kico a tuma luga den shelo na 1914 en conexion cu e Reino, y dicon esei ta importante pa nos?
4 Na 1914, Cristo Hesus a keda instala como Rei y a haya autorisacion pa “goberna meimei di [su] enemigonan.” (Salmo 110:1, 2) E aña ei tambe “e ultimo dianan” di e sistema di cosnan malbado aki a cuminsa. (2 Timoteo 3:1-5, 13) Na mesun tempo, sucesonan cu Daniel a mira den vision profetico, de echo a tuma luga den shelo. “E Anciano di Dianan”, Yehova Dios, a duna e Yiu di hende, Hesucristo, “dominio, gloria y un reino, pa tur pueblo, nacion y hende di tur idioma por sirbie.” Papiando tocante e vision, Daniel a skirbi: “Su dominio ta un dominio eterno cu lo no pasa nunca, y su reino ta un cu lo no wordo destrui.” (Daniel 7:13, 14) Ora Dios a pone nos prome mayornan humano den Paradijs tawata su proposito pa E duna hende un sin fin di cos bon. Ta mediante e Reino celestial aki den man di Cristo Hesus, Dios lo haci posibel pa amante di husticia gosa di tur esakinan.
5. Ki detayenan relaciona cu e Reino ta interesa nos masha, y dicon?
5 Bo ta desea di ta un fiel ciudadano di e Reino? Si ta asina, lo bo ta masha interesa pa sa con e gobierno celestial aki ta organisa y funciona. Lo bo kier sa kico e ta haciendo awor, kico lo e logra den futuro y kico e ta exigi di bo. Segun cu bo ta analisa e Reino cuidadosamente, bo aprecio p’e lo aumenta. Si bo reacciona bon riba su gobernacion, lo bo ta miho ekipa pa conta otro hende tocante e cosnan maravioso cu e Reino di Dios lo haci pa humanidad obediente.—Salmo 48:12, 13.
E Gobernantenan di e Reino di Dios
6. (a) Segun e Scritura, ta ken su gobernacion supremo ta ser manifesta mediante e Reino Mesianico? (b) Loke nos siña tocante e Reino mester tin ki influencia riba nos?
6 Un di e prome cosnan cu tal analisis ta revela ta cu e Reino Mesianico aki ta un manera cu Yehova ta manifesta su propio gobernacion supremo. Ta Yehova ta esun cu a duna su Yiu “dominio, gloria y un reino.” Despues cu Dios a duna su Yiu poder pa cuminsa goberna como Rei, bosnan den shelo a declara apropiadamente: “E reino di mundo a bira e reino di nos Señor [Yehova Dios], y di Su Cristo; y E [Yehova] lo reina pa semper y semper.” (Revelacion 11:15) Pesei tur loke nos siña tocante e Reino aki y loke e ta logra, por hala nos mas cerca di Yehova. Loke nos siña mester lanta den nos e deseo di somete nos mes na su gobernacion supremo pa semper.
7. Dicon nos ta masha interesa den e echo cu ta Hesucristo ta Yehova su Gobernante Asistente?
7 Considera tambe e echo cu Yehova a pone Hesucristo riba trono como su Gobernante Asistente. Como e Trahado Experto cu Dios a uza pa traha tera y hende, Hesus conoce nos necesidadnan miho cu nos mes. Ademas, for di principio di historia humano el a demostra cu su “delicia tawata den e yiunan di hende.” (Proverbionan 8:30, 31; Colosencenan 1:15-17) Su amor pa hende tawata asina grandi, cu e mes a bini na tera y a duna su bida como rescate pa nos. (Huan 3:16) Asina el a percura e medio pa libra nos di pica y morto y habri e oportunidad pa nos haya bida eterno.—Mateo 20:28.
8. (a) Na contraste cu gobernacionnan humano, dicon e gobierno di Dios lo dura? (b) Ki relacion e “esclabo fiel y prudente” tin cu e gobierno celestial?
8 E Reino di Dios ta un gobierno stabil y permanente. Nos tin e garantia cu lo e dura debi na e echo cu Yehova mes no por muri. (Habacuk 1:12, SAB) Na contraste cu reinan humano, Hesucristo, esun na ken Dios a confia e reinado, tambe ta inmortal, e no por muri. (Romanonan 6:9; 1 Timoteo 6:15, 16) Hunto cu Cristo riba trono celestial lo tin 144.000 persona mas, fiel sirbidonan di Dios for di “tur tribu y lenga y pueblo y nacion.” Nan tambe ta haya bida inmortal. (Revelacion 5:9, 10; 14:1-4; 1 Corintionan 15:42-44, 53) E gran mayoria di e 144.000 ta den shelo caba, y e resto di nan cu ainda ta riba tera ta forma e “esclabo fiel y prudente” djawe, cu fielmente ta promove asuntonan relaciona cu e Reino ei aki riba tera.—Mateo 24:45-47.
9, 10. (a) Ki influencianan cu ta corumpi hende y causa desunion e Reino lo elimina? (b) Si nos no kier bira enemigo di e Reino di Dios nos mester evita di ta envolvi den kico?
9 Djis aki, na Yehova su tempo señala, lo E manda su ehercito di ehecucion drenta den accion pa limpia mundo. Nan lo destrui pa semper e hendenan cu di nan propio boluntad ta nenga di reconoce Yehova su gobernacion supremo, y ta trata cu desprecio e areglonan amoroso cu E ta haci mediante Hesucristo. (2 Tesalonicencenan 1:6-9) Esei lo ta e dia di Yehova, e tempo tan spera pa E demostra fuera di tur duda cu E ta e Soberano di universo. “Mira, e dia di SEÑOR ta bin, cruel, cu furia y cu rabia ardiente, . . . y E lo caba cu e pecadornan cu tin den [e tera].” (Isaias 13:9) “E dia ei ta un dia di furia, un dia di problema y angustia, un dia di destruccion y desolacion, un dia di scuridad y tiniebla, un dia di nubia y scuridad profundo.”—Sofonias 1:15.
10 Tur religion falso y tur gobierno humano y nan ehersitonan cu e gobernante malbado invisibel di e mundo aki tawata manipula, lo ser destrui pa semper. Ken cu ta indica cu nan ta na banda di e mundo aki door di sigui un estilo di bida egoista, deshonesto y inmoral, lo ser destrui. Lo kita Satanas y su demoñonan for di tur contacto cu e habitantenan di mundo; nan lo keda encarsela den abismo pa mil aña. E ora ei e Reino di Dios lo tin control total riba tur asunto di mundo. Ki un alivio esei lo ta pa tur amante di husticia!—Revelacion 18:21, 24; 19:11-16, 19-21; 20:1, 2.
Con e Reino Ta Logra Su Metanan
11. (a) Con e Reino Mesianico lo cumpli cu Yehova su proposito pa e tera? (b) Kico e gobernacion di e Reino lo nifica pa hende cu ta biba riba tera e tempo ei?
11 E Reino Mesianico lo cumpli completamente cu Dios su proposito original pa e tera. (Genesis 1:28; 2:8, 9, 15) Te awe, humanidad no ta apoya e proposito ei. Sinembargo, “e mundo cu ta bin” lo ta someti na e Yiu di hende, Hesucristo. Tur hende cu sobrevivi e huicio cu Yehova trece riba e sistema bieu aki, lo traha unidamente bou di Cristo e Rei. Gustosamente nan lo haci tur loke e manda, y asina tera ta bira un paradijs mundial. (Hebreonan 2:5-9) Henter humanidad lo disfruta di e obra di nan mannan y lo beneficia plenamente di e abundancia cu tera lo produci.—Salmo 72:1, 7, 8, 16-19; Isaias 65:21, 22.
12. Con e ciudadanonan di e Reino lo logra perfeccion di mente y curpa?
12 Ora Dios a crea Adam cu Eva, nan tawata perfecto, y tawata su proposito pa yena e tera cu nan yiunan, y pa nan tur hunto disfruta di perfeccion di mente y curpa. Bou di gobernacion di e Reino e proposito ei lo bira un realidad magnifico. Pa logra esaki mester kita tur e efectonan di pica, y pesei Cristo ta sirbi no solamente como Rei sino tambe como Sumo Sacerdote. Cu pasenshi lo e yuda su ciudadanonan obediente beneficia di e sacrificio di su propio bida humano cu tin e balor di kita pica.
13. Ki beneficionan fisico lo ser realisa bou di gobernacion di e Reino?
13 Bou di e gobernacion di Reino, e habitantenan di tera lo haya beneficionan fisico maravioso. “E ora ei wowo di e ciegonan lo mira, y horea di e sordonan lo tende. Anto e cohonan lo bula manera bina, y lenga di e mudo lo grita di alegria.” (Isaias 35:5, 6) Cuero desfigura door di biehes of malesa, lo bira mas jong cu di un mucha, y na luga di malesa cronico lo tin bon salu. “Laga su carni bira mas suave cu esun di mucha, lag’e bolbe na e dianan di vigor di su hubentud.” (Job 33:25) Lo yega e dia cu ningun hende lo tin motibo pa bisa: “Mi ta malo.” Dicon? Pasobra hende temeroso di Dios lo ser libra di e carga di pica y di su efectonan penoso. (Isaias 33:24; Lucas 13:11-13) Si, Dios “lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.”—Revelacion 21:4.
14. Yega na perfeccion humano ta encera kico?
14 Sinembargo, yega na perfeccion ta encera hopi mas cu haya un curpa sano y un mente sano. E ta encera refleha Yehova su cualidadnan debidamente, ya cu nos a ser traha ‘den Dios su imagen, conforme su semehansa.’ (Genesis 1:26) Hopi educacion mester tuma luga pa logra esei. Den e mundo nobo, ‘husticia lo biba.’ Pesei, manera Isaias a profetisa, “e habitantenan di mundo ta siña husticia.” (2 Pedro 3:13; Isaias 26:9) E cualidad aki ta hiba na pas; pas entre hende di tur rasa, pas entre amistadnan intimo, pas den famia y riba tur cos, pas cu Dios mes. (Salmo 85:10-13; Isaias 32:17) Esnan cu siña husticia, progresivamente lo siña kico ta Dios su boluntad pa nan. Segun cu amor pa Yehova ta bira firme den nan curason, nan lo sigui su normanan y su manera di haci cos den tur aspecto di nan bida. Nan lo por bisa mescos cu Hesus: ‘Semper mi ta haci e cosnan cu ta agrada mi Tata.’ (Huan 8:29) Esta dushi bida lo ta ora esei ta e caso di henter humanidad!
Logronan Cu Ta Bisto Caba
15. Uza e preguntanan den e paragraf aki pa destaca algun logro di e Reino y mustra kico nos lo mester ta haciendo awor.
15 E logronan impresionante di e Reino di Dios y di su ciudadanonan ta bisto. E siguiente preguntanan y textonan biblico lo corda bo di algun di e logronan aki, y tambe di loke tur ciudadano di e Reino por haci y lo mester ta haciendo awor.
Contra ken e Reino a tuma accion prome, y cu ki resultado? (Revelacion 12:7-10, 12)
Reunimento hunto di e miembronan cu a sobra di cua grupo ta ricibi atencion desde cu Cristo a ser entronisa? (Revelacion 14:1-3)
Manera ta para skirbi na Mateo 25:31-33, ki trabou Hesus a profetisa cu lo e haci despues cu e gran tribulacion cuminsa?
Ki trabou preliminar ta tumando luga awe? Ken ta participa den dje? (Salmo 110:3; Mateo 24:14; Revelacion 14:6, 7)
Con bini opositornan politico y religioso no por a stop e trabou di predica? (Zacarias 4:6; Echonan 5:38, 39)
Ki cambionan a tuma luga den bida di esnan cu ta somete nan mes na e gobernacion di e Reino? (Isaias 2:4; 1 Corintionan 6:9-11)
Reino di Mil Aña
16. (a) Pa cuanto tempo Cristo lo reina? (b) Ki cosnan maravioso lo tuma luga durante y despues di e tempo ei?
16 Despues di cera Satanas y su demoñonan den abismo, Hesucristo y su 144.000 coheredero lo goberna como rei y sacerdote pa mil aña. (Revelacion 20:6) Durante e periodo ei, humanidad lo bira perfecto, y pica y morto causa door di Adam lo keda elimina pa semper. Na fin di e Reinado di Mil Aña, despues di a cumpli exitosamente cu su asignacion como Rei y Sacerdote Mesianico, Hesus “ta entrega e reino” na su Tata, “pa Dios por ta tur [cos] den tur.” (1 Corintionan 15:24-28) E ora ei, Satanas lo ser libra for di abismo pa un poco tempo pa test humanidad rescata, pa wak si nan lo apoya Yehova su derecho di goberna como esun supremo den universo. Despues cu completa e test final ei, Yehova lo destrui Satanas y e rebeldenan cu a tuma parti p’e. (Revelacion 20:7-10) Esnan cu a apoya Yehova su soberania—su derecho di goberna—lo a demostra cabalmente nan fieldad inkebrantabel. E ora ei nan lo drenta den un relacion apropiado cu Yehova, y lo E acepta nan como su yiunan homber y mohe, dibinamente aproba pa bida eterno.—Romanonan 8:21.
17. (a) Kico lo pasa cu e Reino na fin di e mil aña? (b) Den ki sentido ta cierto cu e Reino “nunca lo no wordo destrui”?
17 Pues, e papel di Hesus y esun di e 144.000 lo cambia relaciona cu tera. Kico lo ta nan siguiente actividad? Bijbel no ta bisa. Pero si nos apoya Yehova su soberania fielmente, nos lo ta na bida na fin di e Reinado di Mil Aña pa haya sa kico ta Yehova su proposito pa nan y tambe pa su universo impresionante. Pero toch, Cristo su gobernacion di mil aña “ta un dominio eterno” y su Reino “lo no wordo destrui.” (Daniel 7:14) Den ki sentido? Un factor ta cu e autoridad di goberna lo no cai den man di personanan cu tin otro meta, ya cu Yehova lo ta e Gobernante. Tambe, e Reino “nunca lo no wordo destrui” pasobra su logronan lo keda pa semper. (Daniel 2:44) Y e Rei-Sacerdote Mesianico hunto cu su cogobernantenan rei-sacerdote lo ser honra pa semper debi na nan fiel sirbishi na Yehova.
Como Repaso
• Dicon e Reino di Dios ta e unico solucion pa e problemanan di humanidad? Na ki tempo e Rei di e Reino di Dios a cuminsa goberna?
• Kico en particular abo ta gusta tocante e Reino di Dios y di loke lo e logra?
• Ki logronan di e Reino nos por mira caba, y ki participacion nos tin den esakinan?
[Plachi na pagina 93]
Bou di e Reino di Dios, tur hende lo siña husticia