Entrante e Siman di 6 di Januari Nos Lo Studia e Buki Hala Serca Yehova
1. Entrante e siman di 6 di januari, ki oportunidad nos lo haya pa hala cerca Dios?
1 Jehova kier pa nos hala cerca dje. (Sant. 4:8) Pa yuda nos cu esaki, entrante e siman di 6 di januari, nos lo studia e buki Hala Serca Yehova na e Estudio di Bijbel di Congregacion. E pagina di introduccion ta bisa di su proposito: “Ora nos medita riba e manera cu Jehova ta manifesta cada un di su cualidadnan, con Hesucristo a refleha nan perfectamente, y ora nos compronde con nos tambe lo por cultiva nan, nos lo hala mas cerca Dios.” Nos a yega di studia e buki aki caba durante 2004 y 2005 den congregacion. Pero pa e rond di dos miyon publicador cu a bin den e berdad despues di e añanan ey, esaki lo ta e prome biaha cu nan lo bay analisa e bunita cualidadnan di Jehova en detaye. Pa esnan cu a studia e buki aki caba, e ripiticion lo aumenta nan aprecio pa e cualidadnan di Jehova.—Sal. 119:14.
2. Con nos lo studia Hala Serca Yehova?
2 Con Nos Lo Studia e Buki Aki? E ruman cu ta dirigi e les lo cuminsa cu un introduccion breve, kisas di un of dos frase. Como cu den e buki no ta para ki texto mester lesa, e mes tin cu scoge e textonan clave pa lesa durante di e estudio. Na final di cada estudio, e por haci un of dos pregunta di repaso. Si den e informacion cu tin cu studia tin e cuadro “Pregunta pa Medita Ariba”, e ruman cu ta dirigi por uza esaki pa e repaso. Si tempo permiti, e por laga lesa algun di e textonan menciona den e cuadro y despues haci algun pregunta adicional pa esnan presente contesta.
3. Mientras nos ta studia e buki aki, kico nos mester haci y dicon?
3 Con Nos Por Beneficia Plenamente? Prepara di antemano, hasta si bo a yega di studia e buki caba. Participa cu bo comentarionan y asina duna alabanza na Jehova. Tambe nan lo yuda bo corda e informacion y sirbi como estimulo pa otronan. (Sal. 35:18; Heb. 10:24, 25) Ora bo medita riba e cualidadnan inigualabel di Jehova, lo bo hala cerca dje. (Sal. 77:11-13) Como resultado, lo bo ta mas determina pa obedece su mandamentonan y mas motiva pa conta otro hende tocante dje.—Sal. 150:1-6.