Ken Awe Ta Haci e Boluntad di Jehova?
1. Ki dia nos lo cuminsa studia e foyeto Ken Awe Ta Haci e Boluntad di Jehova? y con e foyeto lo beneficia nos?
1 Cuminsando cu e siman di 28 di october, nos lo studia e foyeto Ken Awe Ta Haci e Boluntad di Jehova? na e Estudio di Bijbel di Congregacion. A prepara e foyeto nobo aki cu nos a haya na e Congreso di Districto “Proteha Bo Curason!” pa dirigi studiantenan di Bijbel na e organisacion. E publicacion aki no solamente lo duna nos mas aprecio pa e echo cu nos ta parti di Jehova su organisacion, sino tambe lo yuda nos familiarisa cu e publicacion valioso aki pa nos sirbishi.—Sal. 48:13.
2. Con nos lo studia e foyeto den congregacion?
2 Con Nos Lo Studia e Foyeto? E ruman ku ta dirigi e estudio lo mester uza e mesun cantidad di tempo pa cada les. Lo e introduci cada un di e 28 lesnan cu e pregunta principal di cada les i pidi e lesado pa lesa e paragraf di introduccion. Caba, e ta haci esnan presente un pregunta cu el a prepara pa e introduccion. Despues di esey, mester lesa y trata cada seccion cu ta cuminsa cu letter diki un pa un. Despues di lesa un seccion, e ruman ku ta dirigi lo pidi esnan presente pa comenta con esaki ta contesta e pregunta principal di e les. Por comenta tambe riba tur e plachinan. Si tin tempo, por lesa e textonan clave. Prome cu pasa pa e siguiente les, e ruman ku ta dirigi lo haci un repaso uzando e preguntanan cu tin na final di e pagina. Si tin e cuadro “Bo Kier Sa Mas?”, les’e y pidi esnan presente pa comenta con un studiante di Bijbel lo beneficia di e sugerencianan ey. Na final di e Estudio di Bijbel di Congregacion, si tempo permiti, por uza e titulo di e lesnan como pregunta di repaso. Tene cuenta cu esaki no necesariamente ta e procedura cu mester sigui ora nos ta studia Bijbel cu hende.
3. Kico nos mester haci pa nos por beneficia plenamente ora nos studia e foyeto aki?
3 Pa nos por beneficia plenamente di e reunion, nos mester ta bon prepara. Haci esfuerso pa duna comentario. Durante e estudio, pensa con e informacion lo por beneficia studiantenan di Bijbel. E foyeto nobo aki lo ekipa nos pa yuda otro hende haci e boluntad di Dios pa asina nan tambe por tin e speransa di biba pa semper.—1 Juan 2:17.