Con pa Uza e Foyeto Dios Tin Bon Noticia pa Nos!
El A Ser Prepara pa Yuda Nos Haci Rebishita y Cuminsa Estudio di Bijbel
1. Ki publicacion nobo nos a ricibi na e Congreso di Districto “Proteha Bo Curason!” pa yuda nos haci rebishita y cuminsa estudio di Bijbel?
1 Nos a keda masha contento ora nos a ricibi na nos Congreso di Districto “Proteha Bo Curason!” un publicacion nobo pa yuda nos haci rebishita y cuminsa estudio di Bijbel. E foyeto Dios Tin Bon Noticia pa Nos!, cu su lesnan cortico y al caso, ta reemplasa e foyeto Rekerí. Ademas, nos por uza e foyeto aki pa cuminsa estudio di Bijbel na porta. Mientras e foyeto Rekerí ta enfoca riba normanan cristian cu por ta dificil pa un studiante nobo acepta, e foyeto nobo aki ta enfoca riba e bon noticia cu tin den Bijbel.—Echo. 15:35.
2. Dicon a produci e foyeto Bon Noticia?
2 Dicon un foyeto nobo? Rumannan rond mundo a pidi pa algo simpel cu por lanta interes di un hende y dun’e gana di studia e buki Bijbel Ta Siña, nos publicacion principal pa estudio di Bijbel. Y hopi hende ta mas dispuesto pa studia Bijbel for di un foyeto cu for di un buki. Ademas, ta mas facil pa traduci un foyeto den un gran cantidad di idioma.
3. Kico ta haci e foyeto aki diferente for di e otro publicacionnan di estudio?
3 Su Diseño: Mayoria di nos publicacionnan di estudio ta skirbi di tal manera cu un hende por lesa nan y compronde e berdad riba su mes. Pero e foyeto aki ta diferente; e persona interesa mester studi’e cu yudansa di un maestro. Pesey, ta bon pa ora nos ofrece e foyeto nos trata un of dos paragraf cu e persona. Como cu e paragrafnan ta cortico, por studi’e cu e persona na su porta di cas of na su trabou. Aunke lo ta bon pa cuminsa na e prome les, nos por cuminsa un estudio na cua les cu ta.
4. Con e foyeto ta yuda nos siña e studiante directamente for di Bijbel?
4 Den hopi di nos publicacionnan, un persona por haya e contesta di e pregunta imprimi den e paragraf cu el a caba di lesa. Sinembargo, den e foyeto aki e contestanan ta principalmente den Bijbel. Mayoria di hende ta prefera di siña directamente for di Bijbel y no for di nos literatura. Ta pesey casi ningun di e textonan biblico menciona ta cita. E idea ta pa e studiante lesa nan for di Bijbel y asina mira cu loke e ta siña ta bin for di Dios.—Isa. 54:13.
5. Dicon ta importante pa e maestro prepara bon prome cu cada estudio?
5 E foyeto no ta splica tur e textonan tampoco. Dicon no? A hacie pa motiva e studiante pa haci pregunta y pa laga e maestro uza su capacidad di siña. Pesey, ta importante pa prepara bon prome cu cada estudio. Pero tene cuenta si pa no papia hopi. Aunke como Testigo di Jehova nos gusta splica textonan biblico, ta mihor nos laga e studiante splica kico el a compronde di un texto. Nos por uza preguntanan bon pensa pa yud’e yega na e contesta corecto.—Echo. 17:2.
6. Con nos por uza e foyeto: (a) caminda hende no ta kere den Dios of den Bijbel? (b) ora di predica di cas pa cas? (c) ora di ofrece un estudio di Bijbel uzando e metodo directo? (d) ora di haci rebishita?
6 Mescos cu otro publicacionnan di estudio, nos por ofrece e foyeto aki tur momento, maske e no ta e oferta di luna. Hopi publicador lo ta cla pa uza e foyeto aki pa cuminsa estudio di Bijbel na porta uzando e metodo directo. Ademas, manera nos a scucha na e congreso di districto, “e foyeto aki di berdad ta duna bo smaak di haci rebishita!”—Wak e cuadronan na pagina 5-7.
7. Con nos por uza e foyeto pa studia cu un hende?
7 Con pa Conduci e Estudio: Nos por cuminsa na lesa e pregunta numera cu ta aparece cu letter diki y e paragrafnan corespondiente. Despues nos por busca den Bijbel e textonan menciona cu tin e palabra “lesa” nan dilanti y pa medio di pregunta trata na yuda e persona compronde e textonan aki. Anto, prome cu nos bay na e siguiente seccion, nos por bolbe haci e pregunta cu letter diki pa haci sigur cu e persona a compronde e punto bon. Na e prome bishitanan ta mihor nos trata solamente un di e preguntanan cu letter diki. Cu tempo, nos por haci e estudio mas largo te ora nos por trata henter un les.
8. Con nos mester introduci e textonan biblico, y dicon?
8 E textonan menciona cu tin e palabra “lesa” nan dilanti ta esnan cu ta contesta e pregunta cu letter diki mas directamente. Ora nos ta bay lesa un texto biblico, nos mester evita di bisa “apostel Pablo a skirbi” of, “tuma nota di loke e profecia di Jeremias ta bisa”, ya cu e persona por pensa cu nos ta citando palabra di hende. Lo ta mihor pa bisa: “E Palabra di Dios ta bisa” of, “tuma nota kico Bijbel a profetisa.”
9. Nos mester lesa tur texto cu tin den e paragrafnan?
9 Nos mester lesa tur e textonan menciona of solamente esnan cu tin e palabra “lesa” nan dilanti? Esey ta depende di circunstancia. Tur texto menciona t’ey pa un motibo. Cada un di nan tin informacion cu ta bale la pena pa trata. Pero, si e studiante no tin hopi tempo, no ta dje interesa ey of no ta lesa bon, kisas ta mihor pa nos busca solamente e textonan cu tin e palabra “lesa” nan dilanti.
10. Ki ora nos por pasa pa e buki Bijbel Ta Siña?
10 Ki Ora Nos Por Pasa pa e Buki Bijbel Ta Siña? Ora un persona ta studia regularmente, nos por opta pa pasa pa e buki Bijbel Ta Siña of sigui den e foyeto Bon Noticia te ora nos caba cu ne. Publicadornan por uza discernimento pa dicidi na ki momento ta bon pa haci e cambio. Ora nos pasa pa e buki Bijbel Ta Siña, nos mester cuminsa na e prome capitulo? No tin un regla pa esey ya cu cada studiante ta diferente. Sinembargo, lo ta bon pa e studiante repasa e mesun temanan atrobe, bayendo mas den detaye den e buki Bijbel Ta Siña.
11. Dicon nos mester haci bon uzo di e foyeto aki?
11 Den un mundo yen di mal noticia, nos tin e gran privilegio di declara e mihor noticia cu tin: E Reino di Dios ta goberna y pronto lo e trece un mundo nobo den cua husticia ta biba. (Mat. 24:14; 2 Ped. 3:13) Nos tin sigur cu hopi di esnan cu scucha e mensahe aki lo ta di acuerdo cu e palabranan inspira: ‘Ki bunita riba e seronan ta e pianan di esun cu ta trece bon noticia, cu ta anuncia paz y ta trece bon noticia di felicidad, cu ta anuncia salbacion y cu ta bisa Sion: “Bo Dios ta reina!”’ (Isa. 52:7) Laga nos haci bon uzo di e foyeto aki pa hiba bon noticia di parti di Dios na hende cu tin sed spiritual.
[Cuadro na pagina 5]
Pa Uza Caminda Hende No Ta Kere den Dios of den Bijbel:
● Experencia ta mustra cu den algun area hende no kier scucha ora nos uza palabranan manera “Dios” of “Bijbel.” Den e teritorionan ey ta mihor nos cuminsa papia riba cosnan cu ta preocupa e comunidad, manera e necesidad di un bon gobierno, unda famianan por haya yudansa practico y kico futuro lo trece cu ne. Nos por introduci e foyeto Bon Noticia despues cu nos a combersa varios biaha cu e persona y a mustr’e cu Dios ta existi y cu su Palabra ta confiabel.
[Cuadro na pagina 6]
Pa Uza di Cas pa Cas:
● “Hopi hende ta puntra nan mes kico Dios tin na mente pa futuro di humanidad. Lo mi kier mustra bo con facil bo por haya sa esey. Por ehempel, bo ta kere cu Dios lo libra nos di tur sufrimento? [Permiti e persona contesta.] E foyeto aki ta yuda bo haya e contesta pa e pregunta ey den bo mes Bijbel. [Dun’e un foyeto, anto lesa tanto e prome paragraf di les 1, como Jeremias 29:11.] For di loke nos a caba di lesa, no ta bisto cu Dios kier pa nos tin un mihor futuro? [Permiti e persona contesta.] Bo por keda cu e foyeto. Anto otro biaha nos por trata e di dos paragraf pa haya e contesta cu Bijbel ta duna riba e pregunta: ‘Con Dios lo libra hende di tur loke ta causa sufrimento?’” Si e persona tin mas tempo, bo por lesa y trata e di dos paragraf y e tres textonan di Bijbel. Traha un afspraak pa trata e di dos pregunta di e les.
● “Hopi bes nos ta acerca Dios den oracion, specialmente ora nos tin problema, no ta berdad? [Permiti e persona contesta.] Bo ta kere cu Dios ta scucha tur oracion, of tin oracion cu ta desagrad’e? [Permiti e persona contesta.] Mi tin un foyeto aki cu ta mustra unda den Bijbel nos por haya contesta pa e preguntanan ey. [Entreg’e un foyeto, y trata cu ne e prome paragraf di les 12 y e textonan cu tin e palabra “lesa” nan dilanti.] Bo no ta contento pa sa cu Dios kier pa nos acerc’e den oracion? Pero pa nos por disfruta plenamente di e privilegio aki, nos mester conoce Dios bon. [Bay na les 2 y mustr’e cada subtema.] Si bo kier, mi por laga e foyeto aki pa bo y na un otro ocasion nos por lesa e contestanan cu Bijbel ta duna riba e preguntanan interesante aki.”
● “Hopi hende ta puntra nan mes con lo para cu e mundo aki. Bo ta kere cu cos lo drecha algun dia? [Permiti e persona contesta.] Bo tabata sa cu den Bijbel tin bon noticia cu ta duna nos speransa? Wak algun pregunta cu Bijbel ta contesta.” Dun’e un foyeto y pidie scoge for di e ultimo pagina di e foyeto un pregunta cu ta interes’e. Despues bay na e les cu el a scoge y mustr’e con nos ta studia Bijbel cu hende. Traha un afspraak pa bo bolbe y trata e siguiente pregunta di e les.
[Cuadro na pagina 7]
Pa Uza cu e Metodo Directo:
● “Mi ta di bishita pa mustra bo un curso nobo cu nos tin pa studia Bijbel. E foyeto aki tin 15 les cu ta mustra unda den Bijbel bo por haya contesta pa preguntanan masha importante. [Mustr’e e parti dilanti y e parti patras di e foyeto.] Abo a yega di purba compronde Bijbel? [Permitie contesta.] Laga mi mustra bo con facil e lesnan ta. [Trata e prome paragraf di pregunta 3 di les 3, y lesa Revelacion 21:4, 5. Si ta posibel, trata e siguiente paragraf y e textonan pa “lesa.”] Si bo ta desea, bo por keda cu e foyeto aki. Nos ta anima bo pa bo purba sikiera un les. Si bo gusta, bo por sigui cu e curso. E proximo biaha nos por trata e prome les cu ta un pagina so.”
[Cuadro na pagina 7]
Pa Uza Ora di Haci Rebishita:
● Ora nos bolbe bishita un persona cu a mustra interes, nos por bis’e: “Mi ta contento di topa bo atrobe. Mi a trece e foyeto aki cu ta uza textonan di Bijbel pa contesta hopi pregunta interesante. [Dun’e un foyeto y pidie wak e ultimo pagina.] Cua di e topiconan aki bo ta haya mas interesante? [Permitie contesta. Despues bay na e les cu el a scoge.] Laga mi mustra bo con por uza e foyeto aki pa haya e contesta cu Bijbel ta duna riba e pregunta ey.” Pa demostra con nos ta studia Bijbel cu hende, trata un of dos paragraf y e textonan cu tin e palabra “lesa” nan dilanti. Bo ta wak con facil ta pa cuminsa un estudio! Laga e persona cu e foyeto y traha un afspraak pa bolbe. Ora bo caba di considera e les, laga e persona scoge un otro tema of cuminsa te dilanti.