Con pa Uza e Foyeto Ken Awe Ta Haci e Boluntad di Jehova?
El A Ser Prepara pa Dirigi Studiante di Bijbel na Nos Organisacion
1. Cu ki tres meta a produci e foyeto Boluntad di Jehova?
1 Bo a cuminsa uza e foyeto nobo Ken Awe Ta Haci e Boluntad di Jehova? Su meta ta (1) pa laga e studiante di Bijbel cera conoci cu nos, (2) pa yud’e haya sa mas di nos actividadnan y (3) pa lag’e mira con nos organisacion ta funciona. Como cu cada les di e foyeto Boluntad di Jehova ta riba un pagina, ta facil pa trata un les den 5 pa 10 minuut na fin di cada estudio.
2. Describi e diseño y caracteristicanan di e foyeto aki.
2 Su Diseño: Manera bo por a nota den e paragraf akiriba, e foyeto ta parti den tres seccion; cada un ta trata un aspecto di e organisacion di Jehova. E tema di cada un di e 28 lesnan ta den forma di pregunta, y e subtemanan cu letter diki ta contesta e preguntanan ey. Tambe tin potret di mas cu 50 pais, pa asina duna e studiante un idea di e alcance internacional di nos obra. Varios les tin e cuadro “Bo Kier Sa Mas?”, cu ta ofrece sugerencianan cu bo por anima bo studiantenan pa aplica.
3. Con nos por uza e foyeto Boluntad di Jehova?
3 Con Bo Por Uz’e? Cuminsa na mustra e studiante e tema di e les cu ta den forma di pregunta. Despues, mientras cu boso ta lesa e paragrafnan, hala atencion na e subtemanan cu letter diki. Despues, trata e preguntanan di repaso na final di e pagina. Bo por lesa e les completo, of, si bo ta prefera, bo por trata e les paragraf pa paragraf. Uza discernimento pa dicidi cua texto menciona bo ta lesa y no keda sin comenta riba e potretnan ni e cuadro “Bo Kier Sa Mas?” Den mayoria di caso ta sabi pa considera e lesnan den e secuencia cu nan ta aparece. Sinembargo, si un les ta trata un punto cu na e momento ey ta importante, bo por trata esaki sin niun problema. Por ehempel, si un asamblea of congreso ta na caminda, bo por bay na les 11.
4. Dicon nos ta contento cu nos tin e publicacion nobo aki?
4 Ora nos ta studia Bijbel cu un persona, nos ta yud’e conoce nos Tata celestial. Pero nos tin cu siñ’e tambe tocante e organisacion di Jehova. (Prov. 6:20) Nos ta masha contento cu nos tin e publicacion nobo aki cu por yuda nos haci esaki!