Uza e Foyeto Bon Noticia pa Siña Hende
1. Con e foyeto Bon Noticia ta hinca den otro?
1 Manera Nos Ministerio di Reino di juli a trece padilanti, un herment basico pa siña hende e berdad ta e foyeto Dios Tin Bon Noticia pa Nos! Pakico e textonan di Bijbel menciona den e foyeto no ta cita? Wel esey ta pa e studiante por lesa nan directamente for di Bijbel. Aunke cu mayoria di nos publicacionnan un persona por studia y siña e berdad riba su mes, den caso di e foyeto aki si e mester di un maestro. Pesey, ora nos ofrece e persona e foyeto, nos mester mustr’e con un estudio di Bijbel ta bay pa asina e mira con interesante ta pa siña e bon noticia cu tin den Bijbel.—Mat. 13:44.
2. Con nos por uza e foyeto Bon Noticia na e prome bishita?
2 Na e Prome Bishita: Bo por bisa: “Hopi hende ta puntra nan mes con lo para cu e mundo aki. Bo ta kere cu cos lo mehora algun dia? [Permiti e persona contesta.] Bo tabata sa cu Bijbel tin bon noticia cu ta duna speransa? Wak algun pregunta cu Bijbel ta contesta.” Duna e persona e foyeto y pidie scoge for di e ultimo pagina di e foyeto un pregunta cu ta interes’e. Despues uza e prome paragraf di e les cu e scoge y mustr’e con nos ta studia Bijbel cu hende. Tambe bo por haci e persona un pregunta basa riba un les cu abo a scoge y mustr’e con e foyeto ta yud’e haya e contesta den Bijbel. Si riba jw.org tin un video cu ta trata e mesun topico, bo por inclui esaki den bo presentacion.
3. Splica con nos por dirigi un estudio for di e foyeto Bon Noticia.
3 Con pa Dirigi e Estudio: (1) Lesa e pregunta numera cu ta skirbi cu letter diki pa hala e persona su atencion na e punto principal. (2) Lesa e paragraf. (3) Lesa e textonan di Bijbel cu ta skirbi cu letter schuin y uza otro preguntanan bon pensa pa yuda e persona mira con Bijbel ta contesta e pregunta numera. (4) Si tin mas cu un paragraf bou di e pregunta, ripiti paso 2 y 3. Si tin un video cu ta trata e mesun topico, bo por laga e persona wak e si bo no a mustr’e ainda. (5) Por ultimo, pidi e persona contesta e pregunta, asina bo por tin sigur cu el a compronde e informacion bon.
4. Kico bo por haci pa yuda bo uza e herment valioso aki habilmente?
4 Familiarisa bo mes cu e herment valioso aki y uz’e tur momento apropia. Prome cu cada estudio, pensa riba e studiante y e mihor manera pa rasona cu ne, uzando e textonan den e les. (Prov. 15:28; Echo. 17:2, 3) Segun cu bo ta haya mas experencia y ta bira mas habil den uza e foyeto, lo bo por haya cu e foyeto aki por bira un di bo hermentnan faborito pa siña hende e berdad.