Haci e Temporada di Conmemoracion Algo Gososo!
1. Con ta un manera cu nos por haya mas goso den e temporada di Conmemoracion?
1 Lo bo kier haya mas goso den maart, april y mei? Un manera pa logra esey ta di sali mas den sirbishi y, si ta posibel, traha como pionero auxiliar. Pero con esaki por duna bo mas goso?
2. Dicon nos ta haya mas goso ora nos ta sali mas den sirbishi?
2 Con pa Haya Mas Goso: Jehova a crea nos cu e capacidad di sinti goso ora nos ta ador’e y asina satisface nos necesidad spiritual. (Mat. 5:3) Tambe el a traha nos di tal manera cu nos por sinti nos feliz ora nos haci algo pa otro hende. (Echo. 20:35) Ora nos sali den sirbishi nos ta haci tur dos, esta adora Dios y yuda otro hende. Pues ta logico cu mas nos sali den sirbishi, mas goso nos ta haya. Anto mas nos predica, mas experencia y confianza nos ta haya, y nos lo ta menos nervioso. Ademas, nos lo haya mas oportunidad pa duna testimonio y cuminsa estudio di Bijbel. Tur esaki ta haci nos sirbishi mas dushi.
3. Dicon maart y april ta dos luna ideal pa traha pionero auxiliar?
3 Maart y april ta dos luna ideal pa traha pionero auxiliar ya cu nos por scoge pa traha sea 30 of 50 ora. Ademas, nos campaña pa invita hende pa bin na e Conmemoracion lo cuminsa diasabra 22 di maart y dura te dialuna 14 di april, e dia cu nos lo conmemora e morto di Hesucristo. Tur congregacion lo ta entusiasma ya cu hopi publicador lo ta trahando “den un acuerdo [of uni]” pa cubri mas tanto teritorio posibel den e tempo stipula.—Sof. 3:9.
4. Kico nos tin cu haci si nos kier traha pionero auxiliar?
4 Cuminsa Plania: Si bo no a haci esaki ainda, tuma tempo pa wak bo programa y mira unda bo por haci ahuste pa bo sali mas den sirbishi durante un of mas luna. Pidi Jehova su guia. (Sant. 1:5) Papia cu bo famia y e rumannan di bo congregacion tocante bo plan. (Prov. 15:22) A pesar di un programa druk of problema cu salud, kisas bo tambe lo por sinti e goso di traha pionero auxiliar.
5. Kico nos lo logra ora nos ta sali mas den sirbishi den e temporada di Conmemoracion?
5 Jehova kier pa su sirbidornan ta feliz. (Sal. 32:11) Ora nos haci esfuerso pa sali mas den sirbishi den e temporada di Conmemoracion, nos lo tin mas goso; pero no esey so, tambe nos lo haci nos Tata celestial contento.—Prov. 23:24; 27:11.