Un Invitacion Special
1. Na ki momento nos lo cuminsa parti invitacion pa e congresonan di 2014?
1 Ora bo haci hopi esfuerso y gasto pa prepara un cuminda special pa bo amigo- y famianan, no tin duda cu lo bo invita nan cu entusiasmo. Asina tambe hopi trabou a bay den preparacion di e bankete spiritual cu nos lo haya na nos congreso di districto y internacional di 2014. Tres siman prome cu nos congreso cuminsa, nos tin e privilegio di invita hende pa asisti. Kico por yuda nos haci esaki cu entusiasmo?
2. Kico lo motiva nos pa participa plenamente den e campaña?
2 Si nos para keto y pensa cuanto nos mes ta beneficia di e bankete spiritual cu Jehova ta percura na nos congresonan, esaki lo motiva nos pa participa plenamente den e campaña. (Isa. 65:13, 14) Tambe nos mester corda cu tur aña e campaña aki ta duna bon resultado, ya cu algun di e hendenan cu nos invita ta asisti na e congreso cu nos. Pero, sin importa cuanto hende reacciona, nos esfuersonan durante e campaña ta trece alabanza na Jehova y ta mustra con generoso e ta.—Sal. 145:3, 7; Rev. 22:17.
3. Con nos lo parti e invitacionnan?
3 Cada cuerpo di anciano mester determina con e congregacion lo parti e invitacionnan, incluyendo si lo laga nan ora no haya hende na cas of si lo ofrece nan ora ta predica na luganan publico. Den weekend, si ta apropia, nos lo ofrece e revistanan hunto cu e invitacion. Si e prome diasabra di luna ta cay den e periodo di e campaña, nos lo concentra riba parti invitacion en bes di cuminsa estudio di Bijbel. Despues di e campaña, nos lo por ta contento cu nos a participa cu entusiasmo y cu nos a invita mas tanto hende posibel pa ta hunto cu nos na e bankete spiritual cu Jehova a percura.