“Mantene un Conducta Excelente Meymey di Hende di e Nacionnan”

1. Dicon ta importante pa nos tin un bon conducta durante nos proximo congresonan?

¹ Cada aña cu nos celebra nos congreso, nos ta hala atencion di hende. Pesey ta importante pa mediante nos conducta nos representa e Dios cu nos ta adora na un manera apropia. (Lev. 20:26) Hende tin cu mira na tanto nos bon manera como nos apariencia cu nos realmente ta siguidornan di Cristo. Pero con nos por ‘mantene nos conducta excelente meymey di hende di e nacionnan’ na nos proximo congreso di districto of internacional y asina glorifica nos Tata celestial?—1 Ped. 2:12.

2. Durante e congreso, ki oportunidad nos tin pa demostra e personalidad cristian?

² Demostra e Personalidad Cristian: E amor cu nos tin pa otro y e manera cu nos ta trata “hende di pafo” ta completamente diferente for di e spirito cu ta reina den e mundo aki. (Col. 3:10; 4:5; 2 Tim. 3:1-5) Pesey ta importante pa nos ta bondadoso y tin pasenshi cu personal di hotel y restaurant, hasta ora problema presenta. Tambe ta un muestra di bon manera pa laga tip, si esey ta e custumber, pa esnan cu duna nos servicio.

3. Mayornan ta haya ki recordatorio, y dicon?

³ Mayornan tin cu paga bon tino na nan yiunan na e facilidadnan di congreso, hotel y restaurant. (Prov. 29:15) E gerente di un restaurant na un hotel a bisa un pareha: “Nos ta aprecia boso como testigonan di Jehova. Boso famia y yiunan tin bon manera y ta hopi cortes. Nos personal ta papia bon di boso y nos lo a desea pa boso bin tur weekend.”

4. Dicon ora nos ta na e luga di congreso nos tin cu paga tino na e manera cu nos ta bisti?

⁴ Bisti Apropia: E paña cu nos ta bisti durante congreso mester ta modesto y apropia, y no mester imita e moda extremo cu ta normal den mundo. (1 Tim. 2:9) Nos tin cu evita di bisti demasiado casual of slons ora nos ta “check in” of “check out” na hotel y durante nos tempo liber, tanto prome como despues di e sesionnan. Asina nos lo sinti nos mes bon di tin nos badge di congreso bisti y no tin mester di sinti berguensa pa duna testimonio ora e oportunidad presenta. Nos apariencia y bon conducta durante e proximo congresonan no solamente lo atrae hende di curason sincero na e mensahe di Bijbel cu ta salba bida, sino tambe lo e haci Jehova contento.—Sof. 3:17.

Recordatorionan pa Congreso 2014

◼ Orario di Programa: Lo habri e portanan for di 12:00 p.m. Tur e tres dianan e musica di introduccion lo cuminsa 1:20 p.m. Na e momento ey, nos tur mester tuma asiento pa asina e programa por cuminsa na un manera digno. Riba diabierna y diasabra e cantica y oracion di conclusion lo ta 8:55 p.m. y riba diadomingo 7:50 p.m.

◼ Congreso Internacional: Algun pais lo ta anfitrion di congresonan internacional. Ta bon pa nos tene cuenta cu e sucursalnan di e paisnan ey ta calcula a base di cantidad di asiento, luga di parkeer y camber di hotel disponibel cuanto congregacion y ruman di otro pais nan por invita. Pues, si publicadornan cu no ta invita bay na e congresonan internacional aki, esey por causa un situacion caotico. Si sosode cu bo no por bay na bo congreso asigna, sinti bo liber pa scoge cualkier otro congreso, menos esunnan internacional.

◼ Parkeermento: Tur caminda cu e areanan di parkeer ta cay bou di nos maneho, e luganan di parkeer lo ta gratis y lo ser ocupa segun e orden di yegada. Luga di parkeer sa ta limita, pues ta bon pa nos bay mas tanto posibel hunto den un auto en bes di cada hende bin cu su mes auto. Corda tambe cu tin luganan di parkeer reserva pa hende cu tin un deficiencia, pero ta solamente vehiculonan cu ta bin na consideracion mag di parkeer eynan.

◼ Wardamento di Asiento: Ora cu habri e portanan, por fabor no core drenta pura pura manera ta pustamento tin pa haya un area di sinta preferi. Como cristian berdadero, nos ta wak bienestar di otro hende y esaki ta laga esnan cu ta mira alaba Jehova, esta, papia bon di dje. (Juan 13:34, 35; 1 Cor. 13:4, 5; 1 Ped. 2:12) Bo por warda asiento solamente pa esnan cu ta biba den cas cu bo y esnan cu ta bin den e mesun vehiculo cu bo of esnan cu bo ta studiando cu ne actualmente. A reserva asiento pa rumannan di edad y esnan enfermo. Como cu e luganan aki ta limita, solamente un of dos persona cu ta yuda e ruman di edad of enfermo por sinta hunto cu ne.

◼ Cuminda: En bes di bandona e sitio di congreso pa bay busca cuminda durante pausa, bin cu algo di come. Bo por bin cu un jug chikito cu por bay bou di bo stoel. No ta permiti pa bin cu jug grandi di picnik, ni nada di glas den e luga di congreso.

◼ Donacion: Nos por mustra aprecio pa e organisacion y facilidadnan di e congreso mediante nos contribucion boluntario pa e obra mundial na e congreso. Esun cu kier haci esey mediante cheque mester skirbie na nomber di “Watch Tower.”

◼ Remedi: Si bo ta uza remedi, corda bin cu nan, ya cu esakinan lo no ta disponibel na e congreso. Personanan diabetico cu ta uza hangua mester benta esakinan afo na un manera responsabel, ya cu nan ta cay bou di desperdicio peligroso. No benta nan den coy sushi na e luga di congreso ni na hotel.

◼ Medida di Precaucion: Tene cuidou pa bo no slip of cay. Tur aña ta sosode accidente pa motibo di sapato inapropia, specialmente sapato hilchi halto. Pa preveni accidente, ta bon pa bisti sapato comodo y modesto; esey lo yuda bo cana sin peliger riba trapi y areanan di subida; asina lo bo evita tambe cu bo sapato ta pega den rooster, etcetera.

◼ Hende Cu Tin Problema cu Oido: Lo transmiti e programa riba un frecuencia FM. Pa bo por scucha e programa, lo bo tin cu trece un radio di bateria y earphone.

◼ Stroller di Baby y Stoel: No trece stroller di baby ni stoel grandi cu por stroba otro hende na e sitio di congreso. Loke si ta permiti ta asiento di mucha, manera e tipo cu ta uza den auto, cu ta keda safe den un asiento banda di e mayor.

◼ Perfume: Mayoria di congreso ta tuma luga den edificionan cera cu ta depende di sistema di ventilacion. Pesey, lo ta amoroso di nos parti pa limita uzo di perfume y colonia fuerte cu lo por causa reaccion alergico cerca esnan cu tin problema respiratorio of otro problema parecido.—1 Cor. 10:24.

◼ Formulario Por Fabor Atendé (S-43): Uza un formulario Por Fabor Atendé pa duna informacion relaciona cu cualkier persona cu mustra interes como resultado di testimonio informal durante e congreso. Por entrega formulario yena sea na e Departamento di Literatura of na e secretario di bo congregacion ora bo ta bek den bo congregacion.

◼ Restaurant: Si bo ta bay restaurant den e area di congreso, honra Jehova su nomber mediante bo bon conducta. Bisti na un manera cu ta klop pa un cristian. Corda laga un tip adecuado si esey ta e custumber local.

◼ Servicio di Boluntario: Si bo kier traha como boluntario, meld na e Departamento di Servicio di Boluntario na e congreso. Mucha bou di 16 aña cu kier yuda por haci esaki, pero bou di guia di un mayor of voogd of un adulto aproba pa un di nan.