Recordatorionan pa Congreso

Orario di Programa: Lo habri e portanan for di 8:00 a.m. Tur e tres dianan e musica di introduccion lo cuminsa 9:20 a.m. Na e momento ey, nos tur mester tuma asiento pa asina e programa por cuminsa na un manera digno. E programa di diabierna y diasabra lo conclui mas o menos 5:00 p.m. y riba diadomingo mas o menos 4:00 p.m.

Alaba Jehova cu Cantica: Den antiguedad, e pueblo di Dios tabata alaba Jehova cu cantica. Awe, musica ta keda un parti importante di adoracion berdadero. (Sal. 28:7) Tur sesion di nos congreso regional ta cuminsa cu un introduccion musical. Nan no ta djis musica den background, sino a prepara nan pa nos alaba y siña tocante Jehova. Pesey, ora e presidente introduci e musica, ta tempo pa nos tuma asiento y scucha e musica cu atencion, en bes di combersa. Asina nos ta demostra cu nos ta balora e esfuerso cu miembronan di e orkesta di Watchtower a haci. Dos biaha pa aña nan ta biaha pa Patterson, New York, riba nan mes gasto pa graba musica bunita pa nos disfruta di dje. Despues di scucha e introduccion musical, esnan presente mester canta hunto e canticanan pa alaba Jehova.

Parkeermento: Tur caminda cu e areanan di parkeer ta cay bou di nos maneho, e luganan di parkeer lo ta gratis y lo ser ocupa segun e orden di yegada. Luga di parkeer sa ta limita, pues ta bon pa nos bay mas tanto posibel hunto den un auto en bes di cada hende bin cu su mes auto. Corda tambe cu tin luganan di parkeer reserva pa hende cu tin un deficiencia, pero ta solamente vehiculonan cu ta bin na consideracion so tin mag di parkeer eynan.

Wardamento di Asiento: Ora cu habri e portanan, por fabor no core drenta pura pura manera ta pustamento tin pa haya un luga di sinta preferi. Tene consideracion cu otro hende, hasta si esey ta nifica sinta na un luga cu no ta di bo preferencia. Nos spirito di sacrificio propio ta identifica nos como cristiannan berdadero y ta laga esnan cu ta mira alaba Jehova, esta, papia bon di dje. (Juan 13:34, 35; 1 Cor. 13:5; 1 Ped. 2:12) Bo por wanta asiento solamente pa esnan cu ta bin den auto cu bo, ta biba na e mesun cas cu bo y esnan cu bo ta studiando cu ne actualmente. Por fabor, no pone cos riba e asientonan cu bo no ta wanta pa otro hende. Bo cooperacion den esaki lo yuda otronan compronde cu e luganan ey ta liber. A reserva asiento pa rumannan di edad y esnan enfermo. Como cu e luganan aki ta limita, solamente un of dos persona cu ta yuda e ruman di edad of enfermo por sinta hunto cu ne.

Bisti Apropia: Nos manera di bisti durante congreso mester ta modesto y apropia; nos no mester imita e moda extremo cu ta normal den mundo. (1 Tim. 2:9) Nos no mester ta demasiado casual of slons bisti ora nos ta check in of check out na un hotel ni durante nos tempo liber, tanto prome como despues di e sesionnan. Asina nos lo sinti nos bon di tin nos badge di congreso bisti y lo no sinti berguensa pa duna testimonio ora un oportunidad presenta. Nos apariencia y bon conducta durante e proximo congresonan no solamente lo atrae hende di curason sincero na e mensahe di Bijbel cu ta salba bida, sino tambe lo haci Jehova contento.—Sof. 3:17.

Uzo di Aparato Electronico: Nos ta mustra bon manera durante e programa ora nos pone nos celular of otro aparato electronico riba silent pa e no stroba otro hende. Tene consideracion cu otro hende; no blokia nan bista si nos tin cu saca potret of graba cu aparatonan electronico manera tablet, camara etc. Nos ta mustra bon manera tambe ora nos ta evita di manda mensahe of e-mail innecesariamente durante e programa.

Cuminda: En bes di bandona e sitio di congreso pa bay busca cuminda durante pausa, bin cu algo di come. Bo por bin cu un jug chikito cu por bay bou di bo stoel. No ta permiti pa bin cu jug grandi di picnik, ni nada di glas den e luga di congreso.

Donacion: Nos por mustra aprecio pa e organisacion y facilidadnan di e congreso mediante nos contribucion boluntario pa e obra mundial na e congreso. Esun cu kier haci esey mediante cheque mester skirbie na nomber di “Watch Tower.”

Remedi: Si bo ta uza remedi, corda bin cu nan, ya cu esakinan lo no ta disponibel na e congreso. Personanan diabetico cu ta uza hangua mester benta esakinan afo na un manera responsabel, ya cu nan ta cay bou di desperdicio peligroso. No benta nan den bari na e luga di congreso ni na hotel.

Medida di Precaucion: Tene cuidou pa bo no slip of cay. Tur aña ta sosode accidente pa motibo di sapato inapropia, specialmente sapato hilchi halto. Pa preveni accidente, ta bon pa bisti sapato comodo y modesto; esey lo yuda bo cana sin peliger riba trapi y areanan di subida; asina lo bo evita tambe cu bo sapato ta pega den rooster, etc.

Hende Cu Tin Problema cu Oido: Lo transmiti e programa riba un frecuencia FM. Pa bo por scucha e programa, lo bo tin cu trece un radio di bateria y un headphone.

Stroller di Baby y Stoel: No trece stroller di baby ni stoel grandi cu por stroba otro hende na e sitio di congreso. Loke si ta permiti ta asiento di mucha, manera e tipo cu ta uza den auto, cu ta keda safe den un asiento banda di e mayor.

Perfume: Mayoria di congreso ta tuma luga den edificionan cera cu ta depende di sistema di ventilacion. Pesey, lo ta amoroso di nos parti pa limita uzo di perfume y colonia fuerte cu lo por causa reaccion alergico cerca esnan cu tin problema respiratorio of otro problema parecido.—1 Cor. 10:24.

Formulario Por Fabor Atendé (S-43): Uza e formulario Por Fabor Atendé pa duna informacion relaciona cu cualkier persona cu mustra interes como resultado di testimonio informal durante e congreso. Por entrega formulario yena sea na e Departamento di Literatura of na e secretario di bo congregacion ora bo ta bek den bo congregacion.

Restaurant: Si bo ta bay restaurant den e area di congreso, honra Jehova su nomber mediante bo bon conducta. Bisti na un manera cu ta pas pa un cristian. Corda laga un tip adecuado si esey ta e custumber local.

Servicio di Boluntario: Si bo kier traha como boluntario, meld na e Departamento di Servicio di Boluntario na e congreso. Mucha bou di 16 aña cu kier yuda por haci esaki, pero bou di guia di un mayor of voogd of un adulto aproba pa un di nan.