Nos Congresonan di Districto Ta Duna Excelente Testimonio di e Berdad
1. Durante e fiestanan cu Jehova a stipula, e Israelitanan por a medita y combersa riba cua berdadnan spiritual importante?
1 E Israelitanan di antiguedad a reuni tres biaha pa aña pa celebra fiestanan cu Jehova a stipula. Maske ta hende homber so tabatin e deber di asisti, mayoria di biaha henter e famia a bay Jerusalem pa disfruta di e reunionnan gososo aki. (Deu. 16:15, 16) E ocasionnan ey a duna e pueblo oportunidad pa medita y combersa riba berdadnan spiritual importante. Cua ta algun di e berdadnan aki? Pa cuminsa, Jehova ta un Dios yen di amor, cu generosamente ta percura pa e necesidadnan di su pueblo. (Deu. 15:4, 5) Un otro berdad ta cu semper nan por a depende riba su guia y proteccion. (Deu. 32:9, 10) Tambe e Israelitanan por a medita riba e echo cu como e pueblo cu ta carga e nomber di Jehova, nan mester a refleha Jehova su husticia na e manera corecto den nan propio bida. (Deu. 7:6, 11) Awe, nos congresonan anual di districto ta beneficia nos di e mesun manera.
2. Con e programa di e congreso di districto lo yuda nos compronde e berdad y aplic’e?
2 E Programa Ta Yuda Nos Compronde e Berdad y Aplic’e: Na nos congresonan di districto, nos ta disfruta di discurso, drama, demostracion y entrevista cu ta yuda nos compronde berdadnan biblico importante mas mihor y aplica nan den nos bida. (Juan 17:17) Jehova su organisacion ya a haci hopi trabou pa e congreso binidero. Nan a prepara e programa specialmente pa satisface e necesidadnan actual di hende rond mundo. (Mat. 24:45-47) Bo ta ansioso pa disfruta di e programa?
3. Kico nos mester haci pa beneficia di e programa?
3 Claro cu nos lo beneficia mihor di e programa si nos t’ei tur tres dia y presta bon atencion. Si bo no a hacie ainda, notifica bo doño di trabou cu lo bo tuma un par di dia liber. Percura pa sosega bon tur anochi pa bo por concentra durante e programa. Loke ta yuda hopi ruman presta atencion ta ora nan ta wak e orador y haci anotacion cortico. Percura pa bo telefon celular of pager no kita bo atencion ni di otro hende. Evita di papia of di manda mensahe via telefon. No come of bebe durante e programa, si no ta pa motibo medico of debi na demasiado calor.
4. Con mayornan por yuda nan yiunan beneficia di e congreso?
4 Den añanan sabatico, e Israelitanan tabata reuni pa scucha lesamento di e Ley durante e Fiesta di Tabernakel of Ramada. Henter famia tabat’ei, incluso e muchanan, “pa nan tende y siña.” (Deu. 31:12) Ta un animacion pa mira famianan sinta hunto durante congreso y wak e chikitinnan keda lanta y presta bon atencion. Lo ta bon pa tur anochi boso repasa boso notanan y combersa tocante e puntonan cu mas boso a disfruta di dje. “Locura ta mara den curason di un mucha”, pesey mayornan no mester laga nan yiunan ‘pa nan cuenta.’ Ta bon pa tira bista riba nan, incluso riba esnan cu ta teenager, durante pausa y na hotel.—Pro. 22:15; 29:15.
5. Con nos bon conducta ta dorna e berdad ora nos ta na hotel?
5 Nos Bon Conducta Ta Dorna e Berdad: Si nos ta asisti na un congreso na un otro stad of pais, nos tin cu corda cu nos bon conducta den e stad caminda ta tene e congreso ta dorna e berdad. (Tito 2:10) Personal di hotel ta tuma nota ora un grupo ta obedece e reglanan di hotel, ta tene pasenshi cu e trahadonan y trata nan cu cortesia. (Col. 4:6) Aña pasa, ora representantenan di sucursal tabata negosha cu un hotel, e director di benta a bisa nan: “Nos gusta pa boso hendenan keda na nos hotel pasobra nan ta amabel y tin bon manera. Anto semper nan ta trata nos trahadonan cu respet y ta cuida nos luga.”
6. Con nos manera di bisti por dorna e berdad durante nos estadia den e area di congreso?
6 Nos ta bisti nos badge no solamente pa hala atencion na e congreso y pa e rumannan sa ta ken nos ta, pero tambe pa duna testimonio. Hende lo ripara cu esnan cu tin un badge di e congreso ta bisti nechi y modesto, nada na comparacion cu e estilo con cu ta y provocativo di mundo. (1 Tim. 2:9, 10) Pesey, nos mester presta atencion na nos manera di bisti y na nos areglo personal, incluso ora nos ta check in na hotel. Si nos yega hotel na short y flanel, esey lo no refleha e dignidad di e ocasion. Asta si e congreso ta den stadion, nos paña mester ta digno di un congreso. Si nos ta opta pa cambia paña despues di e programa pa bay come, nos mester corda cu ainda nos ta delegado di congreso y no mester bisti mucho informal.
7. Con nos por disfruta di nos hermandad durante congreso?
7 Na e fiestanan cu Jehova a stipula, e Israelitanan a haya oportunidad pa tin asociacion edificante cu otro sirbidornan di Dios cu a bin for di otro parti di e pais y di mundo; esaki a promove union. (Echo. 2:1, 5) Durante nos congresonan di districto, hende cu ta observa nos ta keda hopi biaha impresiona ora nan mira nos hermandad cristian unico. E ta un dushi aspecto di nos paradijs spiritual. (Sal. 133:1) En bes di sali bay cumpra coy come den pausa, nos por probecha di e oportunidad pa cera conoci y combersa cu nos rumannan rond di nos mientras cu nos ta come algo leve.
8. Ki motibonan nos tin pa traha como boluntario na e congreso si nos por?
8 E manera bon organisa y na ordo cu nos congreso ta cana, hopi biaha ta impresiona hende cu ta observa nos, y mas aun ora nan haya sa cu tur trabou ta boluntario. Bo por ‘pone bo mes disponibel’ pa traha como boluntario na congreso? (Sal. 110:3) Tin biaha mayornan ta traha como boluntario hunto cu nan yiunan pa asina siña nan yuda otro hende. Si bo ta timido, e trabou di boluntario ta un bon manera pa conoce otro rumannan. Un ruman muher a bisa: “Aparte di mi famia y un par di amigo, mi no tabata conoce niun otro ruman na e congreso. Pero ora mi a yuda cu limpieza, mi a cera conoci cu hopi ruman. Tabata masha dushi mes!” Nos lo tin hopi goso na congreso si nos haya mas amigo ora nos traha como boluntario. (2 Cor. 6:12, 13) Si nunca bo no a traha como boluntario, puntra e ancianonan con bo por cualifica pa yuda.
9. Con nos lo invita hende pa asisti na congreso?
9 Invita Hende pa Scucha e Berdad: Manera nos a bin ta haci ultimo añanan, tres siman prome cu congreso, nos lo tin un campaña pa invita hende. E congregacionnan lo trata di parti e invitacionnan den mas tanto teritorio posibel. (Wak e cuadro “Con Nos Lo Ofrece e Invitacion?”) Si resta invitacion, trece nan na e congreso. Otro delegadonan por uza nan pa duna testimonio informal durante e dianan di congreso.
10. Conta algun experencia cu ta mustra cu e campaña anual di invita hende na congreso ta duna bon resultado.
10 Acaso e campaña anual aki ta duna resultado? Na un congreso, un usher a yuda un pareha casa haya asiento. Nan a bis’e cu nan a haya un invitacion y “el a parce interesante.” Nan a core 320 kilometer cu auto pa asisti! Den un otro caso, un ruman muher, trahando di cas pa cas, a duna e invitacion na un homber cu tabata kier sa mas tocante e congreso. Pues, e ruman a tuma un par di minuut pa papia tocante e invitacion cu ne. Un par di dia despues na e congreso, e ruman a mira e homber hunto cu un amigo, y nan tabatin un di e publicacionnan nobo den nan man.
11. Dicon ta importante pa asisti na nos congreso di districto anual?
11 E fiestanan santo tabata un manera amoroso cu Jehova a percura pa yuda e Israelitanan “sirbie cu sinceridad y den berdad.” (Jos. 24:14) Nos asistencia anual na nos congresonan di districto tambe ta yuda nos “sigui cana den e berdad” y ta un parti importante di nos adoracion. (3 Juan 3) Jehova bendiciona e esfuerso cu tur esnan cu ta stima e berdad ta haci pa asisti na e congreso y pa beneficia plenamente di dje!
[Comentario na pagina 4]
Nos bon conducta den e area caminda ta tene e congreso ta dorna e berdad
[Comentario na pagina 5]
Tres siman prome cu congreso, nos lo tin un campaña pa invita hende
[Cuadro na pagina 3-6]
Recordatorionan Pa Congreso Di Districto 2012
◼ Orario di Programa: E programa lo cuminsa 1:20 p.m. tur tres dia. Portanan ta habri for di 12:00 p.m. Ora cu e musica di introduccion cuminsa, nos tur mester tuma asiento pa asina e programa por cuminsa na un manera digno. Diabierna y diasabra e programa lo caba 8:55 p.m. y diadomingo lo e caba 7:40 p.m.
◼ Parkeermento: Luganan di parkeer lo ta gratis y lo ser ocupa segun e orden di yegada. Solamente esnan cu a haya un carnet por parkeer den e area reserva pa esnan deshabilita y esnan di edad avansa. Luganan di parkeer sa ta limita, pues ta bon pa nos bay mas tanto posibel hunto den un auto en bes di cada ken bin cu su mes auto.
◼ Wardamento di Asiento: Bo por warda asiento solamente pa esnan cu ta biba den cas cu bo y esnan cu bin cu bo den e mesun vehiculo of esnan cu bo ta studiando cu ne actualmente.—1 Cor. 13:5.
◼ Cuminda: En bes di bandona e sitio di congreso pa bay busca cuminda durante pausa, bin cu algo di come. Bo por bin cu un jug chikito cu por bay bou di bo stoel. No ta permiti pa bin cu jug grandi di picknick, ni nada di glas na e luga di congreso.
◼ Donacion: Nos por mustra aprecio pa e trabounan envolvi pa haci e congreso di districto posibel mediante nos contribucion boluntario pa e obra mundial na e congreso. Mester skirbi tur cheque na nomber di “Watch Tower.” Cuminsando e aña aki, por haci donacion tambe cu debit of credit card.
◼ Accidente y Emergencia: Si surgi un emergencia medico na e sitio di congreso, avisa un usher den bisindario y e lo notifica e Departamento di EHBO. Di e manera aki nos personal cualifica di prome auxilio por evalua e seriedad di e situacion y duna asistencia. Si ta necesario, e rumannan di EHBO mes lo yama 911. Asina nos ta evita cu e servicionan di emergencia ta haya demasiado yamada di telefon celular.
◼ Remedi: Si bo ta uza remedi, corda bin cu nan, ya cu esakinan lo no ta disponibel na congreso. Personanan diabetico cu ta uza hangua mester benta esakinan afo na un manera responsabel, ya cu nan ta cay bou di desperdicio peligroso. No benta nan den coy sushi na e luga di congreso ni na hotel.
◼ Sapato: Tur aña ta sosode accidente pa motibo di sapato inapropia. Pa preveni accidente, ta bon pa scoge sapato modesto cu ta keda firme na pia; esey lo yuda bo cana sin peliger riba trapi, lo evita cu bo sapato ta pega den rooster, etcetera.
◼ Hende Cu Tin Problema cu Oido: Lo transmiti e programa riba un frecuencia FM. Pa bo por scucha e programa, bo tin cu trece un radio di bateria y earphone.
◼ Stroller di Baby y Stoel: No trece stroller di baby ni stoel grandi cu por stroba otro hende na e sitio di congreso. Sinembargo, ta permiti stoel portatil di mucha of stoel pa den auto cu ta keda safe den asiento banda di e mayor.
◼ Perfume: Mayoria di congreso ta tuma luga den edificionan cera caminda nos ta depende di airco. Pesey, lo ta amoroso di nos parti pa limita uzo di perfume y colonia fuerte cu lo por causa reaccion alergico cerca esnan cu tin problema respiratorio of otro problema parecido.—1 Cor. 10:24.
◼ Formulario Por Fabor Atende (S-43-PA): Mester uza un formulario Por Fabor Atende pa duna informacion relaciona cu cualkier persona cu mustra interes como resultado di testimonio informal durante e congreso. Publicadornan mester bin congreso cu un of dos di e formulario ey. Mester entrega formulario yena na e Departamento di Literatura of na e secretario di bo congregacion ora bo ta bek den bo congregacion.—Wak Nos Ministerio di Reino di mei 2011, na Papiamento di Corsou, pagina 3.
◼ Restaurant: Honra Jehova su nomber mediante bo bon conducta na restaurant. Ta un custumber pa duna 10 pa 15 porciento di tip pa e servicio ricibi.
◼ Servicio di Boluntario: Si bo kier traha como boluntario, meld bo mes na e Departamento di Servicio di Boluntario na e congreso. Mucha bou di 16 aña por traha bou di guia di un mayor of voogd, of di un adulto aproba pa un di nan.
[Cuadro na pagina 6]
Con Nos Lo Ofrece e Invitacion?
Pa nos por cubri henter e teritorio, nos mester ta breve. Nos lo por bisa algo asin’aki: “Con ta bay? Rond mundo nos ta partiendo e invitacion aki. Nos tin un pa bo tambe. Pa mas detaye lesa e invitacion.” Sea entusiasma. Ora bo ta parti e invitacion durante weekend, bo por ofrece e revistanan tambe si ta apropia.