Un Invitacion Personal

1. Na ki momento nos lo cuminsa parti invitacion pa e congreso?

¹ Ora bo haci hopi esfuerso y gasto pa prepara un cuminda special pa bo famia- y amigonan, no tin duda cu lo bo invita nan cu entusiasmo. Asina tambe a hinca hopi tempo den preparacion di e bankete spiritual cu nos lo haya na nos binidero congreso. Tres siman prome cu nos congreso cuminsa, Jehova ta duna nos e privilegio di invita hende pa asisti. Kico por yuda nos haci esaki cu entusiasmo?

2. Kico lo motiva nos pa participa plenamente den e campaña?

² Si nos pensa cuanto nos mes ta beneficia di e instruccion refrescante cu Jehova ta percura pa nos haya na nos congresonan, esaki lo motiva nos pa participa plenamente den e campaña. (Isa. 65:13, 14) Tambe nos mester corda cu tur aña e campaña aki ta duna bon resultado. (Wak e cuadro “E Campaña Ta Duna Resultado.”) Algun di e hendenan cu nos invita lo asisti na e congreso cu nos mientras cu otronan lo no haci esey. Pero, sin importa cuanto hende reacciona, nos esfuersonan durante e campaña ta trece alabanza na Jehova y ta mustra con generoso e ta.—Sal. 145:3, 7; Rev. 22:17.

3. Con nos lo parti e invitacionnan?

³ Cada cuerpo di anciano mester determina con lo parti e invitacionnan, si lo laga nan ora no haya hende na cas of si lo ofrece nan ora ta predica na luganan publico den nan teritorio. Den weekend, si ta apropia, nos lo ofrece e revistanan hunto cu e invitacion. Despues di e campaña, nos lo por ta contento cu nos a participa cu entusiasmo y cu mas tanto hende posibel tabata hunto cu nos na e bankete spiritual cu Jehova a percura.

E Campaña Ta Duna Resultado

Un par di aña pasa, un ruman muher cu a participa den e campaña pa parti invitacion a puntra su mes si tur e esfuersonan aki tabata bale la pena. El a pensa: Cuanto di e hendenan aki lo lesa e invitacion y asisti na e congreso? Riba e diasabra mainta di e congreso, el a mira un meneer cu ta pertenece na e religion sikh sinta no mucho leu di dje, pues el a dicidi di acerc’e y cera conoci cu ne. Parce cu e meneer a bin e congreso debi cu el a haya un di e invitacionnan. E tabatin un cantidad di pregunta y e ruman muher a contest’e tur. El a bisa cu e tabata disfruta di e programa y cu el a keda impresiona pa e manera di bisti y conducta di esnan presente. Riba e mesun dia ey, e ruman muher a cuminsa un combersacion cu un pareha cu tabata sinta banda di dje. Nan tambe a haya un invitacion y a bin e congreso cu bus. Nan a gusta e programa asina tanto cu nan a plania pa asisti diadomingo tambe. Ta e ora ey, e ruman muher a realisa con importante nos campaña anual ta.
Na un congreso recien, un pareha casa cu ta pionero regular a cera conoci cu un pareha casa di un tiki mas edad. E pareha di edad aki a splica cu ta pa prome biaha nan ta asisti. E pioneronan a puntra nan: “Ken a invita boso?” Nan a contesta: “Un dia nos a yega cas y a haya un invitacion bou di nos porta.” Nan a les’e y hasta a yena e coupon parti patras. Algun ruman na e congreso a parti nan cuminda cu e pareha. E pareha a gusta e programa asina tanto cu nan a plania pa bin e siguiente dia. A traha afspraak pa bishita nan y sigui cultiva nan interes.