Tratado Nobo, Diseño Nobo!
1. Ki publicacion pa sirbishi tin un diseño nobo?
1 Na e Congreso di Districto 2013 “E Palabra di Dios Ta e Berdad!” nos a haya cinco tratado nobo. Despues a agrega e Noticia di Reino Num. 38, “E Mortonan Por Bolbe Biba?” na e grupo di tratadonan aki. Nan tur seis tin un diseño nobo cu ta hopi practico. Dicon e cambio aki? Con nos por uza e aspectonan nobo di e tratadonan aki den e trabou di cas pa cas?
2. Con e diseño nobo di e tratadonan ta yuda nos?
2 Dicon un Diseño Nobo?: Pa nos por logra bon resultado den sirbishi di cas pa cas, nos mester cumpli cu e cuater puntonan aki: (1) Puntra e persona su opinion pa cuminsa cu e combersacion. (2) Mustr’e loke Bijbel ta bisa. (3) Ofrec’e algun publicacion pa e lesa. (4) Laga un pregunta pendiente pa contesta na e siguiente bishita y traha un afspraak pa bolbe. E diseño nobo di e tratadonan ta yuda nos cumpli na un manera facil cu e cuater puntonan aki.
3. Con nos por ofrece e tratadonan nobo den sirbishi?
3 Con pa Uza Nan: (1) Despues di cuminda e persona, mustr’e e pregunta interesante cu tin parti dilanti di e tratado, y pidie su opinion. (2) Habri e tratado y combersa riba “Loke Bijbel Ta Bisa.” Si ta posibel, lesa e texto directamente for di Bijbel. Si e persona tin tempo, analisa “Kico Esaki Por Nifica pa Nos?” (3) Ofrec’e e tratado y pidie pa lesa e resto di informacion despues. (4) Prome cu bo bay, mustr’e e pregunta parti patras di e tratado bou di e subtema: “Algo pa Pensa Ariba” y traha un afspraak pa bolbe y analisa e contesta cu Bijbel ta duna.
4. Con nos por uza e tratadonan nobo ora di haci rebishita?
4 Ta facil pa haci e rebishita tambe. Djis uza e textonan cu tin parti patras di e tratado pa contesta e pregunta cu bo a laga pendiente na bo ultimo bishita, y hala e persona su atencion na e potret di e foyeto Bon Noticia cu tin riba e tratado. Prome cu bo bay, mustr’e e foyeto y e les cu ta duna mas informacion relaciona cu e tema cu boso a caba di trata, y ofrec’e e foyeto. Si e acepta e foyeto, traha un afspraak pa analis’e na e siguiente bishita. Asina bo a cuminsa cu un estudio di Bijbel. Of, na luga di ofrece e foyeto, bo por ofrece un otro tratado y traha un afspraak pa analis’e cu e persona.
5. Pakico ta bon pa uza nos tratadonan den sirbishi?
5 Pa mas cu 130 aña caba nos ta uza tratado den nos sirbishi. Nan a cambia di tamaño y diseño, pero nan ta bon yudansa pa duna testimonio. Laga nos haci bon uzo di nan diseño nobo pa sigui plama e conocemento di Bijbel rond mundo.—Prov. 15:7a.