Ban Haci Augustus un Luna di Actividad Historico!

1. Ki campaña special nos lo tene den augustus?

¹ Aki un par di luna e Reino di Dios lo cumpli 100 aña. Pesey, ta na su luga pa nos honra Jehova cu un campaña special! Den e binidero luna di augustus, nos lo parti un tratado nobo rond mundo. Su tema ta: Unda Bo Por Haya Contesta pa e Preguntanan Importante di Bida? E tratado aki ta anima e lector pa busca e contestanan den Bijbel y ta splic’e con nos website jw.org por yud’e den esey.

2. Con nos por apoya e campaña pa alaba Jehova “na bos halto” den augustus?

² Alaba Jehova “na Bos Halto”: Pa yuda publicadornan ta mas activo den sirbishi, a haci un provision special pa esnan batisa por traha pionero auxiliar di 30 ora durante augustus. Como cu augustus tin cinco diabierna, cinco diasabra y cinco diadomingo, hopi publicador cu ta traha of ta bay scol den siman lo por traha pionero e luna ey. Si bo yiu of un di bo studiantenan di Bijbel ta cumpli cu e rekisitonan pa bira publicador, papia mesora cu e coordinador di e cuerpo di anciano. Lo ta un gran animacion pa durante e luna historico aki nan bira publicador y traha hunto cu nos. Normalmente hopi pionero regular ta tuma vakantie durante augustus ya cu nan a alcansa nan oranan. Pero kisas nan por ahusta nan schedule pa nan por participa plenamente den e campaña special aki. Lo ta bon pa como famia boso cuminsa plania for di awor con boso lo bay apoya e campaña pa alaba Jehova “na bos halto” den augustus.—Esd. 3:11; Prov. 15:22.

3. Kico nos ta spera di logra cu e campaña special aki?

³ Aunke nos a yega di participa den campañanan similar, tur cos ta indica cu esun aki lo ta historico. Nos lo alcansa un maximo nobo di cantidad di ora, publicador y pionero auxiliar durante luna di augustus? Segun cu e aña di sirbishi 2014 ta yega na su fin, nos ta pidi Jehova pa e bendiciona e esfuerso mundial cu nos lo haci den augustus. Asina lo e por bira e luna den cua nos a yega di duna e testimonio di mas grandi den henter historia.—Mat. 24:14.